Omido 3 500 da pita, Jehova Kalunga okwa li a lombwela ovo have mu longele osho ve na okuninga, opo va kale nonakwiiwa iwa, a ti: “Onde mu hololela omwenyo nefyo, enangeko noupuna netulomutima. Hoololeni hano omwenyo, mu shiive okukala nomwenyo, nye noludalo leni.” — Deuteronomion 30:19.

Ovanhu ovo ova li ve na okuninga ehoololo li li mondjila, ngeenge ova hala oku ka kala nonakwiiwa iwa. Kunena, nafye otu na okuninga ehoololo la faafana. Ombiibeli oye shi yelifa nawa kutya omunhu oku na oku shi enda ngahelipi, opo a hoolole onakwiiwa iwa, ya ti: ‘Ngeenge mu hole Omwene Kalunga keni nokupwilikina ondaka yaye.’ — Deuteronomion 30:20.

LIHONGA MOMBIIBELI: Opo u kale u hole Jehova, ou na tete okulihonga kombinga yaye mOmbiibeli. Eshi to lihongo, oto ka mona kutya oku li Kalunga omunahole, oo e ku halela osho sha denga mbada. Ote ku shivi u kale ho ilikana kuye ‘molwaashi oku na ko nasha naave.’ (1 Petrus 5:7) Ombiibeli oya udaneka kutya, ngeenge owa ningi eenghendabala u ehene popepi naye, “ota ka ehena popepi” naave. — Jakob 4:8.

TULA MOILONGA OSHO TO LIHONGO: Okupwilikina kuKalunga osha hala okutya okudulika kewiliko laye olo li li mOmbiibeli. Eshi to ningi ngaho, oto “ka kala u nelao meendjila doye ndele oto kala nouwa.” — Josua 1:8.