Grupu Enkaregadu di Óbra sta ku gana di uza kontribuisons pa faze prédius ki ta djuda-nu kontinua ta faze nos trabadju di pregason. Pur izénplu, duránti anu di sirvisu di 2023, kes filial di Tistimunhas di Jeová gasta más di 500 milhon di dóla pa kunpra, faze, konpo i mante Salons di Reinu i Salons di Asenbleia na mundu interu. a Na kel kuantidadi li, ka sta inkluidu kuzê ki kongregason na mundu interu gasta pa kuida di ses Salon di Reinu.

 Alén di kel-li, kes kontribuison ta uzadu pa faze i pa kuida di prédius di filial, ki ta djuda na organiza i apoia trabadju di pregason na mundu interu. Kes trabadju ki filial ta faze biradu más sinplis asi pa kes kontribuison pode uzadu pa faze i konpo Salons di Reinu i Salons di Asenbleia. Má simé inda meste txeu dinheru pa kuida, konpo ô muda un filial di un lugar pa kel otu. Pamodi ki kes prujétu li é inportanti? Modi ki kes filial ta apoia trabadju di pregason ki é txeu inportanti? Nu ben odja.

 Txeu prédiu di Betel dja ten más di 30 ô 40 anu! Nicholas di Dipartamentu di Dizenhu i Konstruson splika: “Mésmu óras ki nu ta kuida dretu di un prédiu, ku ténpu el ta fika bédju i el ta straga. Konpo kes prédiu ka sô ta djuda pa es fika novu otu bês má tanbê pa es kontinua ta uzadu.”

 Kes prédiu di Betel tanbê meste muda di akordu ku nisisidadi di organizason. Désdi ki txeu di kes prédiu di Betel fazedu nunbru di publikador na mundu interu omenta txeu. Pamodi kel-li nu meste ten más voluntáriu pa trabadja na Betel. Pur isu, kes prédiu di Betel ki antis tinha txeu spasu gósi dja fika pertadu!

 Suguransa na kes prédiu tanbê é un kuza txeu inportanti. Dja ki nu sta ta vive na ténpu di fin, ten kada bês más dizastri na naturéza ki ta poi nos vida na prigu. (Lukas 21:11) Pa kes prédiu fika más suguru pa kes algen ki ta trabadja na el, sta ta uzadu kes manera di faze konstruson más modérnu, asi pa kes prédiu pode uzadu pa da ajuda na ténpu di dizastri i pa kontinua ta apoia trabadju di pregason dipôs ki un dizastri na naturéza kontise.

 Duránti anu di sirvisu di 2023, dibaxu di orientason di Grupu Enkaregadu di Óbra, kumesa ta fazedu prujétus di konstruson inportanti na 43 prédiu di filial. Kel-li krê fla ma na kuazi metadi di kes prédiu di Betel na mundu interu fazedu algun tipu di trabadju di konstruson. Favor, repara alguns izénplu ki ta mostra ma kes trabadju ki fazedu ten txeu valor.

 Angola. Matt, ki ta faze párti di Kumison di Filial di Angola, fla: “Nu ten priviléjiu di odja kel profesia di Ageu 2:7 ta kunpri di un manera spesial. Sô na 10 anu nunbru di publikador omenta 60 pursentu! Pur isu, kes algen ki ta trabadja na Betel bira três bês más txeu. Má, nu ka konsigi konvida txeu algen sima nu ta kreba pa trabadja li pamodi nos Betel ka éra grandi. Pur isu txeu betelita tevi ki trabadja más duru i más óra.”

 Pur isu diziginadu alguns irmon pa es pode intendeba kuzê ki nu pode fazeba pa tinha más spasu na Betel. Na kumesu es pensa ma konpo kel prédiu ta sérba un soluson midjór i más rápidu. Má dipôs di pensa dretu es txiga konkluzon ma konpo kel prédiu ka éra midjór manera di uza kontribuisons. Envês di kel-li es fla ma kunpra i konpo un prédiu ki ta fikaba la pértu éra midjór. Matt fla: “Kantu irmons pâpia ku Kumison di Filial, sobri kunpra i konpo kel prédiu, nu fika preokupadu i nu pensa si ka ta sérba midjór nu faze un prédiu novu. Má gósi nu ta odja klaru ma kel sujiston ki es da-nu éra kel midjór pa nos. Jeová abênsua kel disizon li.”

 Talvês Betel di Angola ta ben meste di más spasu na futuru. Má kel novu prédiu djuntu ku kes kaza ki montadu na kel txon di Betel, i kes apartamentu lugadu djuda pa ten spasu ki filial meste pa kontinua ta apoia kel trabadju ki ta fazedu na pregason ki sta omenta kada bês más txeu.

 Japon. Kes prédiu prinsipal di Betel fazedu dja ten kuazi 40 anu i na maioria di kes prédiu nunka ka fazedu un trabadju grandi pa konpo-s. Irmons faze txeu sforsu pa kes prédiu ka straga, má sikrê ku tudu kel sforsu kes prédiu dja sta bédju i gósi es meste konpodu. I é kel-li ki sta ta fazedu manenti.

 Ku ténpu rotina di betelitas ba ta muda. Antis di 2015, Betel ta priparaba kumida pa es. Pur isu, txeu kuartu di Betel tinha sô un “kuzinha” pikinoti. Má gósi é betelitas ki ta pripara maioria di ses kumida. Nton, kuzinha dja konpodu pa fika más fásil pa kes betelita pripara ses kumida. Kumiko, un irman ki ta trabadja na Betel di Japon, fla: “Es novu kuzinha ta faze-m xinti sima si N sta na kaza, i kel-li djuda-m kustuma ku kel novu rotina na Betel.”

 Trabadju ki sta fazedu na Betel di Japon é txeu inportanti pa trabadju di pregason na mundu interu. (Mateus 28:19, 20) Pamodi Traduson di Mundu Novu konplétu ta inprimidu sô na dôs lugar na mundu, i Japon é un di es. Pur isu es prujétu di konpo Betel, ta inklui instalason di un sistéma ki ta korta kes pájina i dipôs el ta tra kes puera, asi kel lugar di inprimi ta fika más suguru pa saúdi. Kusta kuazi un milhon di dóla pa kunpra i instala es sistéma, má kel-li é un garantia ki filial pode kontinua ta inprimi i manda kes publikason i Bíblia ki ta djuda nos fé fika más fórti.

 Sikrê es staba na kel trabadju di konpo Betel irmons kontinua ta faze kel trabadju di inprimi Bíblia pamodi éra txeu inportanti. Trey, ki é ménbru di Kumison di Filial di Japon, fla: “Duránti kel konstruson, organizason lansa Traduson di Mundu Novu na más língua i pesoas na mundu interu sta mesteba más Bíblia. Txeu dipartamentu i pesoas tevi ki trabadja djuntu pa organiza, instala kes novu ekipamentu i inprimi publikasons omésmu ténpu.” Sikrê ku txeu difikuldadi, inprimidu kuazi 220 mil Bíblia tudu mês entri marsu i agostu di 2023. I kel-li kontise kantu trabadju di konstruson staba más txeu. I na tudu trabadju di kel konstruson li nu ka gasta más di ki kel ki nu sta speraba.

 Manera ki kel trabadju li fazedu ta djuda pa Betel ka gasta txeu inerjia. Kes novu painel solar ki sta ben instaladu ta ben djuda na popa uns 120 mil dóla di kónta di lus tudu anu. Tanbê sta ben instaladu janélas ku três painel di vidru ki ta popa uns 10 mil dóla di inerjia tudu anu. Enbóra kes kuza ki uzadu pa popa inerjia é karu, ta atxadu ma es pode popa-nu más di 3,5 milhon di dóla timenti kes painel i kes janela tiver ta funsiona. Tanbê es ta djuda ka straga meiu anbienti.

 Kes prujétu di konpo kes dôs Betel ta mostra kantu trabadju mestedu pa Betel pode kontinua ta apoia trabadju di pregason. Má, trabadju inda ka kaba. Aron, un irmon ki ta trabadja na Dipartamentu di Dizenhu i Konstruson di Sedi Mundial fla: “Dja nu faze txeu trabadju, má inda tene txeu trabadju pa faze.” Modi ki es trabadju ta ben fazedu? Aron kontinua ta fla: “Djuntu ku kontribuisons, ki ta djuda-nu faze kes prujétu inportanti li, tanbê nu sta kontenti ku kes voluntáriu ki apoiaba di korason i kes ki sta ta faze mudansa pa es pode ben apoia na futuru. Nhos kontribuison i kes ki ta apoia di korason é un próva ma Jeová sta ta apoia i abênsua es trabadju.” — Salmo 110:3.

 Tudu nos trabadju di konstruson i di konpo ta fazedu ku kes kontribuison di korason, i txeu di es ta fazedu através di donate.isa4310.com. Obrigadu pa kes kontribuison ki nhos ta faze di korason.