Jeová gosta txeu di inxina se povu. Pamodi kel-li, se organizason dja faze txeu skóla pa trena alunus pa kuida di kes diziginason ki es ta resebe. Un di kes skóla é Skóla pa Pregadoris di Reinu. Na kes últimu anu, organizason di Jeová sta ta sforsa txeu pa midjora ka sô kes matéria di kes skóla, má tanbê kes prédiu undi kes skóla ta fazedu. Obijetivu prinsipal di kes mudansa li é pa kes skóla ser un lugar más sábi pa kes instrutor inxina i pa kes alunu prende. Modi ki bus kontribuison sta ta djuda kunpri kel obijetivu li?

 Pa txeu anu, es ta kustuma fazeba kes skóla di nos organizason na Salons di Reinu i Salons di Asenbleia. Má, pamodi ki nu sta faze i konpo prédius ki gósi sta uzadu sô pa kes skóla di nos organizason? Nu ben odja três motivu.

 Más nisisidadi. Irmon Christopher Mavor, ki é ajudanti di Kumison di Sirvisu di Grupu Enkaregadu di Óbra, fla: “Kes filial fla-nu ma es meste di más irmon ku irmans pa djuda na trabadju di pregason. Pur izénplu, na anu di 2019, filial di Brazil fla ma es mesteba di uns 7.600 irmon ku irmans pa bai pa Skóla pa Pregadoris di Reinu, asi pa es pode djuda na tiritóriu di ses filial.” Filial di Mérka fla ma es meste di pionerus ki ten spiriénsia pa djuda trena otus irmon pa da tistimunhu na públiku na sidadis grandi, na kais i na kadia. Tanbê, sta mestedu irmons pa djuda na Dipartamentu di Dizenhu i Konstruson i na kes Kumison di Ligason ku Ospital. Kes irmon ku irmans ki kursa Skóla pa Pregadoris di Reinu pode djuda na tudu kes kuza li.

 Txeu pitison. Txeu filial fla ma es ka sta konsigi txoma tudu kes irmon ki manda pitison pa bai pa skóla. Pur izénplu, na Brazil sô na un anu, filial resebe uns 2.500 pitison pa Skóla pa Pregadoris di Reinu. Má, dja ki ka tinha lugar pa resebe tudu kes alunu, filial konsigi txoma sô 950 alunu.

 Bons lugar pa alunus fika. Óras ki alunus ta bai pa skóla na un Salon di Reinu ô na un Salon di Asenbleia, normalmenti es ta fika na kaza di kes irmon ku irmans di kel lugar. Kel-li ta da dretu na kes lugar undi ki ten poku turma kada anu. Má, na kes lugar undi ki ten txeu turma, talvês kes publikador ka ta konsigi resebe kes alunu duránti txeu mês na un anu. Pur isu, fazedu lugaris pa kes studanti fika. Kes lugar ta fika pértu di sala di aula i es fazedu di un manera ki ta djuda kes studanti tra pruvetu di skóla.

 Un prédiu ki ten un sala di aula, kuartus pa kes instrutor i pa uns 30 alunu, i otus lugar ki instrutoris i alunus ta meste, ta kusta alguns milhon di dóla. Má, kel valor li ta dipende txeu di undi ki kel lugar ta fika i di otus kuza.

 Normalmenti kes skóla ta fika na un lugar ki ka ten txeu barudju, fóra di un sidadi grandi. Má, ki é fásil pa pesoas uza transpórti públiku. Tanbê, nu ta djobe kes lugar undi ki ten más irmon ku irmans, asi pa es pode djuda na konpo kes prédiu i kes ekipamentu.

 Na kes skóla ten bibliotéka, lugar di studa, konputador, mákina di faze kópia i otus ekipamentu. Normalmenti ta ten un lugar undi kes alunu i kes instrutor pode kume djuntu. Tanbê, ten lugar undi es pode faze izersísiu i divirti.

 Má, más inportanti é kes sala di aula. Troy, ki ta trabadja na Dipartamentu Mundial di Prujétu di Konstruson na Warwick na Nova Iórki, fla: “Pa nu konsigi faze salas di aula ki ta sérba bon pa kes alunu, nu pidi ajuda na Dipartamentu di Skólas di Organizason. Es da-nu orientasons sobri kal ki debe ser tamanhu di kes sala, modi ki es debe fika organizadu, ki tipu di lus nu debe uzaba i ki ekipamentus di son i vídiu nu ta mesteba.” Zoltán, ki é un instrutor di Skóla pa Pregadoris di Reinu na Ungria, fla kel-li sobri kes ekipamentu di son: “Na komésu nu ka tinha mikrofóni. Pur isu, txeu bês nu ta pidiba kes alunu pa papiaba más altu. Má gósi ki kada méza ten un mikrofóni, nu ka ten kel prubléma li más!”

 Kuzê ki kes instrutor i kes alunu ta atxa di kes novu prédiu pa faze skólas? Ánjila, ki bai pa Skóla pa Pregadoris di Reinu na Palm Coast, na Flórida, na Mérka, fla: “Kel anbienti é txeu trankuilu. Tudu kuza na kel lugar, ki ta inklui kel sala di aula i nos kuartu, priparadu di un manera ki ta djuda-nu konsentra midjór pa nu pode studa i prende.” Csaba, ki é un instrutor di Skóla pa Pregadoris di Reinu na Ungria, gosta txeu di kume djuntu ku kes alunu. El fla: “Kes alunu ta xinti más avontádi ku nos i es ta konta-nu ses spiriénsia. Pamodi kel-li nu ta konsigi konxe-s midjór i djuda-s di akordu ku ses nisisidadi.”

 Pa kes instrutor i kes alunu, kes novu prédiu ki ta fazedu skóla é un benson di nos ‘Grandiozu Instrutor’, Jeová. (Isaías 30:20, 21) Un irman di Filipinas ki bai pa Skóla pa Pregadoris di Reinu na un prédiu ki es konpo pa bira skóla, fla kel-li: “Kel anbienti di skóla lenbra-nu ma nos é ka sô alunus, má konvidadus spesial di Jeová. El krê pa nu ten un spiriénsia sábi timenti nu ta studa kuzas profundu ki sta na se Palavra.”

 Kes prédiu ki ta uzadu pa faze skóla sô ta pode fazedu, konpodu i sustentadu pamodi nhos kontribuison, ki txeu bês ta fazedu na donate.isa4310.com. Obrigadu pa kes kontribuison ki nhos ta faze di korason!