Désdi ki ómi kriadu, nos Kriador sénpri pâpia ku algen através di anjus ku profétas. Tanbê, el manda pa skrebe se mensaji i se promésas pa futuru. Kes promésa di Deus pode muda bu vida. Má, undi ki nu pode atxa kes promésa di Deus oji?

Kel mensaji di Deus pa nos sta na Skrituras Sagradu. (2 Timóteo 3:16 ) Má, modi ki Deus uza profétas pa skrebe se mensaji? (2 Pedro 1:21 ) Deus poi se pensamentus na menti di kes algen, i dipôs es skrebe kel mensaji. Kel-li é sima óras ki dónu di un inpréza ta pidi se sekretáriu pa skrebe un karta ki el krê manda. Kel sekretáriu pode skrebe kel karta, má autor é kel dónu di inpréza. Di mésmu manera, Deus uza ómis pa skrebe se mensaji, má el ki é Autor di kes Skritura Sagradu.

Mensaji di Deus é rei di inportanti. Pur isu, el krê pa algen di ‘tudu nasons, tribus, línguas i povus’ lé i ntende se mensaji. (Apocalipse 14:6 ) Deus sta ta djuda pa kel-li kontise. Nu ta atxa Skrituras Sagradu interu ô párti di el na más di 3 mil língua. Kel-li é mutu más di ki kalker otu livru ki ten na mundu.