“Pamodi ki Deus ka faze algun kuza?”
“N TA FIKA TA FAZE KEL PERGUNTA LI: PAMODI KI DEUS KA FAZE ALGUN KUZA?” — Papa Bentu 16, na un vizita ki el faze na kanpu di konsentrason na Auschwitz, na Pulónia.
DIPÔS KI KONTISE UN DISGRASA, DJA BU KUSTUMA PERGUNTA: ‘PAMODI KI DEUS KA FAZE ALGUN KUZA?’ Ô TALVÊS DJA KONTISE ALGUN KUZA KASÁBI NA BU VIDA I BU PERGUNTA: ‘DEUS TA PREOKUPA KU MI?’
Talvês bu ta xinti sima Xeila, ki ta vive na Mérka. El kriadu na un família txeu relijiozu. Xeila fla: “N sabia ma Deus é nos Kriador. Pur isu, désdi pikinoti N krê prendeba sobri el. Má nunka N ka xinti ma el éra nha amigu. N ta atxaba ma el ta odjaba mi, má sô di lonji. N ka ta atxaba ma Deus ta odiaba mi, má tanbê N ka ta kriditaba ma el ta preokupaba ku mi.” Pamodi ki Xeila tinha dúvida ma Deus ta amaba el? El fla: “Nha família pasa pa disgrasa un tras di kel otu, i ta parseba ma Deus ka ta preokupaba ku nos.”
Sima Xeila, talvês bu pode ten sertéza ma ta izisti un Deus Tudu-Poderozu. Má, bu pode ka ten sertéza si el ta preokupa ku bo di verdadi. Jó, ki éra un ómi justu i ki tinha fé na puder i sabedoria di Kriador, tanbê tinha dúvidas sima kes-li. (Jó 2:3; 9:4) Dipôs ki Jó pasa pa disgrasa un tras di kel otu, i ta parseba ma se situason ka sta midjoraba, el pergunta Deus: ‘Pamodi ki bu ta sukundi bu róstu i bu ta atxa ma mi é bu inimigu?’ — Jó 13:24.
Kuzê ki Bíblia ta fla? Nu debe kulpa Deus óras ki ta kontise un disgrasa? Ten próvas ki ta mostra ma Deus ta preokupa ku tudu algen i ku kada un di nos? Nu pode ten sertéza ma Deus konxe-nu, el ta ntende-nu, el ta xinti nos dór i el ta djuda-nu lida ku nos prubléma?
Manera ki Deus faze-nu ta mostra ma el ta preokupa ku kada un di nos. Na kes otu artigu, nu ta ben odja kel-li. (Romanos 1:20) Dipôs, nu ta ben odja kuzê ki Bíblia ta fla sobri amor ki Deus ta xinti pa nos. Sima bu ta ba ta konxe Deus através di Bíblia i di kuzas ki el kria, bu ta ten más sertéza ma el ta ‘kuida di bo’. — 1 João 2:3; 1 Pedro 5:7.
