Pensa na un di kes ligason más fórti ki pode ten entri dôs algen: kel ligason entri jémius verdaderu. Irmons jémiu ten un ligason txeu spesial. Odja kuzê ki Nancy Segal, ki é diretora di un séntru di studu sobri jémius na Kalifórnia, i ki tanbê é jémia, fla sobri kel-li. El fla ma, pa alguns algen ten un irmon jémiu é ten un algen ki “ta ntende tudu kuzê ki bu sta xinti sen bu meste splika.” Un otu mudjer splika kel ligason entri el ku se irman jémia di kel manera li: “Nu sabe tudu kuza sobri kunpanheru.”

Pamodi ki irmons jémiu konxe kunpanheru dretu si? Di akordu ku alguns studu ki fazedu, kel lugar i manera ki es ta kriadu ta djuda pa es ten un ligason spesial entri es. Má ta parse ma kel motivu prinsipal ki jémius verdaderu ten kel ligason spesial é pamodi es ten DNA * kuazi igual ku kunpanheru.

PENSA NA KEL-LI: Nos Kriador di sertéza konxe-nu midjór di ki kalker otu algen. Salmista Davidi fla: ‘Bu proteje-m déntu di bariga di nha mai. Nhas osu ka staba sukundidu di bo kantu N formadu sukundidu. Bus odju odja-m mésmu kantu N kumesa ta forma na bariga di nha mai; tudu párti staba skrebedu na bu livru’. (Salmo 139:13, 15, 16) É sô Deus ki sabe tudu informason ki sta na nos DNA. El sabe di kuzas ki dja nu pasa pa el i modi ki kes situason pô-nu ta ser ken ki nos é. Kel-li ta da-nu sertéza ma el ta ntende tudu kuza sobri nos.

Davidi ora: ‘Ó Jeová, dja bu analiza-m i bu konxe-m. Bu sabe óras ki N ta xinta i óras ki N ta labanta. Di lonji, bu ta sabe nhas pensamentu. N ka tene ninhun palavra na nha língua, má, abo Jeová, dja bu sabe tudu.’ (Salmo 139:1, 2, 4) Tanbê, Jeová konxe tudu nos sentimentu, i ti el ‘sabe tudu tendénsia di pensamentus’ ki nu ten. (1 Crónicas 28:9; 1 Samuel 16:6, 7) Kuzê ki kes testu li ta inxina-nu sobri Deus?

Alvês nu ka ta fla Deus kuzê ki nu ta pensa i ki nu ta xinti, má simé nos Kriador sabe kuzê ki nu ta faze i pamodi ki nu ta faze kes kuza. Tanbê, Deus sabe ma alvês nu ta krê faze un kuza dretu, má nu ka ta konsigi faze-l pamodi nos limitason. É Deus ki da-nu kapasidadi di mostra amor, pur isu el krê odja-nu ta pensa i ta aji di un manera ki ta mostra amor. Na verdadi, el sta ku vontadi di odja-nu ta faze si. — 1 João 4:7-10.

Bíblia ta garanti-nu

• ‘Odjus di Jeová sta riba di kes algen justu, i se obidu ta obi ses súplika.’ — 1 PEDRO 3:12.

• Deus ta promete: ‘N ta da-u sabedoria i N ta inxina-u na ki kaminhu ki bu debe anda. N ta da-u konsedju ku nhas odju fíksu na bo.’ — SALMO 32:8.

Sima dja nu odja, Deus ta ntende nos situason i nos sentimentu. Má sabe kel-li, ta djuda-nu lida ku difikuldadis? Odja kuzê ki kontise ku Ana, di Nijéria. El fla: “N staba ta pasa pa un situason txeu difísil. Pur isu, N ta perguntaba si baleba péna kontinua ta vive. Ami éra viúva i N tinha ki kuidaba di nha fidju-fémia ki staba na ospital ku idrosefalia (líkidu dimás na kabésa). Na kel mésmu ténpu, N diskubri ma N tinha kánser di mama i N meste fazeba operason, kimioterapia i radioterapia. Mi ku nha fidju-fémia, nu staba internadu na ospital omésmu ténpu. Éra difísil pa mi lida ku kel situason.”

Kuzê ki djuda Ana lida ku kel situason difísil la? El fla: “N ta pensaba na testus sima Filipenses 4:6, 7, ki ta fla: ‘Pas di Deus, ki ningen ka ta konsigi ntende, ta guarda nhos korason i nhos pensamentu’. Tudu bês ki N ta pensaba na kel testu li, N ta xintiba más pértu di Jeová i N ta lenbraba ma el ta ntende-m midjór di ki N ta ntende nha kabésa. Irmons ku irmans na kongregason tanbê djuda-m txeu.

“Ti inda N ten ki lida ku prublémas di saúdi, má situason di mi ku nha fidju-fémia dja midjora. Dja ki Jeová sta di nos ladu, nu prende ka fika ta pensa na kuzas kasábi óras ki nu sta pasa pa difikuldadis. Testu di Tiago 5:11 ta da-nu kel garantia li: ‘Pa nos, kes algen ki aguenta firmi é filís. Nhos obi ta fladu ma Jó aguenta firmi i nhos odja rezultadu ki Jeová da-l; nhos odja ma Jeová ten grandi konpaxon i el é mizerikordiozu.’” Jeová sabia dretu kuzê ki Jó staba ta pasa pa el. Nton, óras ki nu sta pasa pa kalker difikuldadi, nu pode ten sertéza ma Jeová sabe i ta ntende kuzê ki nu sta pasa pa el.