Bubi gwa ka tangisa mu shango ha Satani e leba manyekhwa e kutanga. Satani wa ka tangisa a li engele we Ndzimu wa ka zwilizanila, ngono ha ‘a na chingwe nge malebeswa.’ (Johani 8:44) Wa ka yemula ku namatiwa, chithu cha ka fanila Ndzimu koga. Satani wa ka nyepela nkadzi we kutanga, Eva, e be e nsendedzela kuti a hwilile iye pa na kuti a hwilile Ndzimu. Adamu wa ka shanganyila na Eva mu ku sa hwilila Ndzimu. Thambo ya ka togwa na Adamu ya ka pelela ne ku ngongola ne lufu.​—Bala Genesisi 3:1-6, 19.

Ha Satani e sendedzela Eva kuti a si hwilile Ndzimu, wa ka be e shandukila bulawuli gwe Ndzimu, kene fanilo ye Ndzimu ye ku busa. Bathu ba njnji ba ka sala Satani shule ngono a ba to shaka kuti Ndzimu a ba buse. Ichecho cho thama kuti, Satani a chi be “mbusi we shango”.​—Bala Johani 14:30; 1 Johani 5:19.

Mishingo yose ye Ndzimu ya ka zwilizanila. Bathu ne baengele ba ka bumbiwa ne Ndzimu ba ka be be khona hwilila Ndzimu kwa ka pelela. (Ditironomi 32:4, 5) Ndzimu wa ka ti bumba ta ka sungunuka ku zwishalulila ku thama cha ka lulwama kene cha ka bipa. Ku sungunuka ikoku ko ti pa chibaka che ku lakidza kuti to da Ndzimu.​—Bala Jakubo 1:13-15; 1 Johani 5:3.

Jehova wa ka lechedzela ku shandukila bulawuli gugwe, chi nga kwe ku shanduka kwa ka shingikala ku Edeni. Ne kutini? Ku lakidza kuti a kuna ku busa kungwe ku nga batsha bathu, ha i si kukwe koga. (Nreri 7:29; 8:9) Shule kwe makole a li 6,000 nthu e chila, ko boneka kuti dumbu  nthu ha a nga khone ku zwibusa. Mibuso ye bathu ya ka kongwa ku pedzisa nghwa, bugebenga, ku sa tambunuka ne bugwele.​—Bala Jeremiya 10:23; Baroma 9:17.

Bubusi gwe Ndzimu a gu to fanana ne gwe bathu ne kuti ba no gu amuchila ba no be ne mbayilo. (Izaya 48:17, 18) Ku sathu ku ka noti ngayi, Jehova u nowo pedzisa mibuso yose ye bathu. Bathu ba no shalula ku busiwa ne Ndzimu ndibo koga ba nowo gala mu shango.—Izaya 11:9.​—Bala Daniele 2:44.

Lingilila vidiyo ye Ini Ndzimu e Dumilila ku Ngongola?

Satani wa ka ti bathu ba no shingila Jehova ne mabaka abo e bugovu. A u nga khona lakidza kuti ichecho manyekhwa? U nga khona! Bumoyonlefu gwe Ndzimu go ti pa chibaka che ku lakidza kuti to shaka busiwa ne Ndzimu kene ne bathu. To lakidza kuti to shalulani ne zila ya ti no chila nayo.​—Bala Jobe 1:8-12; Zwiani 27:11.

Ti nga lakidza kuti to shalula Ndzimu kuti a be Mbusi wedu ne ku zwidiya ne ku shanganyila mu ku namata kwe malebeswa kwa ka teyiwa mu Dama le Ndzimu, Baibili. (Johani 4:23) Ti nga lamba ku busiwa na Satani ne ku sa nginilila mu dzipolotiki ne nghwa, sa Jesu.​—Bala Johani 17:14.

Satani u no shingisa masimba awe ku thama kuti mazwibato a sa ka lulwama ne mishingo ya ka bipa i lingiwe ya ka lulwama. Ha ti lamba thama mishingo ya ka jalo, bakhwinya bedu ne makamu edu ba nga na ba ka ti suta kene be ti nyanyayidza. (1 Pita 4:3, 4) Ta ka fanila shalula. A towo zwizwalanya ne bathu ba no da Ndzimu? A towo hwilila milayo iye ye buchenjedu ne ina ludo? Ha ti thama ti jalo, towo be ti lakidza kuti Satani wa ka be e nyepa ha e ti bathu a ba nga hwilile Ndzimu ha ba ka lingisana ne mamo a ka sima.​—Bala 1 Bakorinta 6:9, 10; 15:33.

Ludo gwe Ndzimu mu bathu go lakidza kuti ku dziyidzika ne bubi zowo pela. Bathu ba no lakidza kuti ba no duma ichechi ba nowo shathila buchilo gu si nga pele mu shango.​—Bala Johani 3:16.