MAƔZƖ se ŋwɛɛ nɛ ŋcɔŋnɩ video nakʋyʋ, ŋgʋ kɩwɩlɩɣ hendu teyu kɩbanʋ weyi ɛ-hɩɖɛ sɛ ɛjaɖɛ yɔɔ nɛ ŋsɔɔlɩ ɛ-tɔm yɔ. Video kajalaɣ hɔɔlɩŋ wɩlɩɣ alɩwaatʋ ndʋ hendu teyu ɛnʋ ɛɛkɛ pɩɣa nɛ ɛpaɣzɩ kpɛlɩkʋʋ minziiki nɛ pʋwayɩ ɛkpasɩ pɩ-taa yɔ. Hɔɔlɩŋ weyi ɩtɩŋ pʋwayɩ yɔ ɩ-taa, pawɩlɩ ɛzɩma ewobi ajɛɛ ndɩ ndɩ taa nɛ eteɣ hendu ɛyaa sakɩyɛ ɛsɩndaa nɛ ɛ-hɩɖɛ sɛɛ ɛjaɖɛ yɔɔ yɔ. Ɛlɛ kɛdɛzaɣ hɔɔlɩŋ taa lɛ, ɛkɔma nɛ ɛkpadɩyɩ nɛ ɛsɩ.

Video kʋnɛ kɩ-taa tɔm tɩkɛ tɔm kulubutu, ɛlɛ kɩwɩlɩɣ mbʋ pɩlakɩ ɖeyi ɖeyi ɛyʋ wezuu caɣʋ taa yɔ. Paa ɛyʋ ɛtɩɩkɛ hendu teyu, ɛjaɖɛ yɔɔ lɛɣtʋ ñɩnɩyʋ, hola aleɣya laɖʋ yaa weyi ɛ-hɩɖɛ sɛ camɩyɛ yɔ, mbʋ pɩɖɔŋ e-wezuu caɣʋ taa. Ɛyʋ pɩzɩɣ nɛ ɛla tʋma kɩbana sakɩyɛ e-wezuu caɣʋ taa, ɛlɛ maɣzɩ nɛ ŋna tʋma kɩbana wena payɩ ɛpɩzaɣ se ɛla, ye akpadɩyɩtʋ nɛ sɩm pataawɛɛ yɔ.

Paa pɩkɛ pʋtɔdɩyɛ tɔm yɔ, mbʋ pɩkaɣ talʋʋ paa weyi e-wezuu caɣʋ taa. (Eklesɩyastɩ 9:5) Paa ɖɩtɩɩñaɣ pana ɛzɩma yɔ, ɖɩɩpɩzɩɣ nɛ ɖɩlɩɩ akpadɩyɩtʋ nɛ sɩm pe-nesi tɛɛ. Pɩtasɩ lɛ, kɛgbɛdɩsaɣ nakɛyɛ yaa kʋdɔŋ sɔsɔʋ nakʋyʋ pɩzɩɣ nɛ kiyele nɛ ɖe-wezuu sɩɩ tɩnaɣ tuda yem. Ɛzɩ Bibl yɔɔdʋʋ yɔ, ɖɩwɛ ɛzɩ tanaŋ tɛɛ “hulumiye nɖɩ ɖɩlɩɣ alɩwaatʋ pazɩ nɛ pʋwayɩ lɛ, ɖɩmʋʋ yɔ.”—Yakubu 4:14.

Ɛzɩma ɛyʋ pɩzɩɣ nɛ ɛsɩ tuda yem paa ɛzɩmtaa yɔ pʋyɔɔ lɛ, nabɛyɛ wɛnɩ lɩmaɣza anɛ: “Ðɩtɔɔ nɛ ɖɩñɔɔ, mbʋ pʋyɔɔ yɔ cee ɖɩkaɣ sɩbʋ.” (1 Kɔrɛntɩ mba 15:32) Ɛlɛ mba pɛwɛnɩ lɩmaɣza ana yɔ, panawa se papɩzɩɣ nɛ pasɩ paa ɛzɩmtaa nɛ pɛfɛyɩnɩ lidaʋ nakʋyʋ cee wayɩ yɔɔ. Paa pɩɩla ɛzɩma yɔ, wiɖiyi ŋkaɣ pɔzʋʋ se: ‘Wezuu kpeekpe yɔ?’ Ŋkaɣ tɔm ndʋ pɔzʋʋ kɔzɩ kɔzɩ alɩwaatʋ ndʋ ŋkaɣ katʋʋ kaɖɛ naɖɩyɛ yɔ. Le ɖɩpɩzɩɣ nɛ ɖihiɣ tɔm cosuu?

Sɔnɔ, ɛyaa sakɩyɛ pɩsɩɣnɩ ɛjaɖɛ yɔɔ lɛɣtʋ ñɩnɩyaa yɔɔ se pasɩnɩ-wɛ. Toovenim, ɛjaɖɛ yɔɔ lɛɣtʋ ñɩnɩyaa nɛ ɖɔkɔtɔnaa yeba nɛ ɛyaa wezuu ɖaɣlɩɣ sɔnɔ. Pɩtasɩ lɛ, lɛɣtʋ ñɩnɩyaa nabɛyɛ ɖiɣni ñaɣʋ pana se wezuu ɛtasɩ ɖaɣlʋʋ nɛ pɩkpaɖɩ mbʋ. Ɛlɛ paa patɩɩñaɣ pana ɛzɩma yɔ, paapɩzɩɣ nɛ pocosi tɔm tʋnɛ tɩ-yɔɔ: Ɛbɛ yɔɔ ɖɩkpadɩyɩɣ nɛ ɖɩsɩkɩ? Lidaʋ wɛɛ se ɖɩkaɣ wabʋ ɖo-koyindu weyi ɛkɛ sɩm yɔ? Tɔm ñʋŋ weyi ɩkɔŋ yɔ, ɩkaɣ tazʋʋ tɔm pɔzʋʋ mbʋ pɩ-taa nɛ icosi tɔm tʋnɛ tɩ-yɔɔ: Wezuu kpeekpe yɔ?