WEZUU ŋgʋ ɖɩcakɩ sɔnɔ yɔ, pɩtɩkɛ ŋgʋ Ɛsɔ kaasɔɔlaa se ɛyaa ɩcaɣ. Ɛsɔ kaasɔɔlaa se ɛyaa mba pañaŋɩ-ɩ, petisiɣ e-kewiyitu kɩkɩlɩtʋ tɔɔʋ yɔɔ nɛ pamaɣzɩɣnɩ ɛ-sɔɔlɩm nɛ ɛ-wɛtʋ lɛɛtʋ yɔ, pawadɩ tɛtʋ yɔɔ. Pɩɩwɛɛ se pala tʋmɩyɛ nɔɔ kʋɖʋmaɣ taa, alɩwaatʋ ndʋ pɔcɔŋnɩ pɔ-hɔŋ yɔɔ, pɛkpɛlɩkɩɣ nɛ patɩlɩɣ wondu kɩfatʋ nɛ palakɩ se tɛtʋ kpeekpe ɛpɩsɩ paradisuu yɔ.

• “Ɛsɩnzɩ yoŋ tɩŋa piwolo pɩtalɩ tɛtʋ kamaɣ yɔɔ.”—Keɣa 45:10.

• “Alɩwaatʋ ndʋ paɖʋwa yɔ tɩtalɩ se . . . ŋɖɩzɩ mba pɛwɛɛkɩɣ tɛtʋ yɔ.” —Natʋ 11:18.

• “Tɛtʋ taa ɛyʋ nɔɔyʋ ɛɛkaɣ tɔm se: ‘Pɩwɩɣ-m.’”—Izaayii 33:24.

• “Me-liu ɛyaa samaɣ kaɣ tɔɔʋ ke-nesi tɛɛ tʋma yɔɔ.”—Izaayii 65:22.

Ɛzɩma natʋ tɔm tʋnɛ tɩkaɣ labʋ? Ɛsɔ lɩzɩ ɛ-Pɩyalʋ Yesu se ɛkɛnɩ ɛsɔdaa komina ŋgʋ kɩtalɩ pilim yɔ ki-wiyaʋ nɛ eɖiyi tɛtʋ. Komina ŋgʋ Bibl yaɣ se Ɛsɔ Kewiyaɣ. (Danɩyɛɛlɩ 2:44) Bibl yɔɔdɩ Yesu tɔm se: ‘Ɛsɔ kaɣ-ɩ cɛlʋʋ . . . kewiyaɣ kpelaɣ, nɛ ɛkaɣ tɔɔʋ kewiyitu.’—Luka 1:32, 33.

Yesu kaawɛ tɛtʋ yɔɔ lɛ, ɛlabɩ piti lakasɩ sakɩyɛ nɛ ɛwɩlɩ se alɩwaatʋ ndʋ ɛpaɣzɩɣ kewiyitu tɔɔʋ yɔ, ɛkaɣ yebu nɛ ɛyaa wezuu caɣʋ wɛ ɖeu nɛ pɩkɩlɩ lɛɛlɛɛyɔ.

• Ɛwa kʋdɔmɩŋ ndɩ ndɩ nɛ ɛwɩlɩ se ɛkaɣ yebu nɛ ɛyaa ɛjandʋ tɩŋa payɩ sɩɩ tɩnaɣ.—Maatiyee 9:35.

• Eyeba nɛ teŋgu yɔɔ kancʋʋlaɣ sɔsɔɔ nakɛyɛ sɩɩ tɩnaɣ nɛ ɛwɩlɩ se ɛwɛnɩ ɖoŋ se ɛla nɛ helim sɔsɔm yaa asɛyʋʋ nakʋyʋ ɛtaakʋ nɔɔyʋ. —Maarkɩ 4:36-39.

• Ɛcalɩ ɛyaa kudokiŋ sakɩyɛ nɛ ɛwɩlɩ se ɛkaɣ cɔnʋʋ ɛyaa tomnaɣ yɔɔ kɩcɛyɩm ɖeɖe.—Maarkɩ 6:41-44.

• Eyeba nɛ lɩm pɩsɩ sʋlʋm nesi ɖɔkʋʋ kazandʋ natʋyʋ taa nɛ ɛwɩlɩ se ɛkaɣ yebu nɛ ɛyaa nɩɩ leleŋ pe-wezuu caɣʋ taa.—Yohanɛɛsɩ 2:7-11.

Ɛzɩma ŋpɩzɩɣ nɛ ŋla nɛ ŋhiɣ wezuu ŋgʋ Ɛsɔ ñɔɔzaa nɛ ɛsɩɩ mba pɔsɔɔlɩ-ɩ yɔ? Pɩcɛyaa se ŋɖɔ “nʋmɔʋ” nakʋyʋ taa. Bibl yɔɔdaa se kɩkɛ nʋmɔʋ ŋgʋ kiwokini “wezuu taa, nɛ ɛyaa pazɩ yem naɣnɩ-kʋ” yɔ.—Maatiyee 7:14.

Ɛbɛ wezuu nʋmɔʋ kɛnaa? Ɛsɔ yɔɔdaa se: “Ma Kɩbaɣlʋ ñɛ-Ɛsɔ weyi ɛwɩlɩɣ-ŋ mbʋ pɩwɛ wazaɣ yɔ, weyi ɛɖɔkʋʋ-ŋ nʋmɔʋ ŋgʋ ŋɖɔŋ kɩ-taa yɔ.” (Izaayii 48:17) Ye ɖɩɖɔŋ Ɛsɔ nʋmɔʋ ŋgʋ kɩ-taa, pɩ-tɔbʋʋ se ye ɖɩmʋʋ ɛ-lɔŋ tasʋʋ yɔ, ɖɩnɩɣ leleŋ ɖe-wezuu caɣʋ taa nɛ pɩkɩlɩ.

 Yesu yɔɔdaa se: “Mɛkɛnɩ nʋmɔʋ nɛ toovenim nɛ wezuu.” (Yohanɛɛsɩ 14:6) Ye ɖitisiɣ toovenim tɔm ndʋ Yesu wɩlaa yɔ tɩ-yɔɔ nɛ ɖɩmaɣzɩɣnɩ ɛ-kɩɖaʋ yɔ, ɖɩpɩzɩɣ nɛ ɖɩñɔtɩnɩ Ɛsɔ nɛ ɖɩnɩɩ leleŋ ɖe-wezuu caɣʋ taa nɛ pɩkɩlɩ.

Ɛzɩma ŋpɩzɩɣ nɛ ŋñɩnɩ wezuu nʋmɔʋ? Ɛsɔ sɛtʋ agbaa ɖɔwa, ɛlɛ Yesu paɣ-ɖʋ se: “Pɩtɩkɛ mba payaɣ-m se: ‘Kɩbaɣlʋ, Kɩbaɣlʋ’ yɔ, pa-tɩŋa pakaɣnɩ sʋʋ ɛsɔdaa Kewiyaɣ taa, ɛlɛ weyi ɛlakɩ man-Caa weyi ɛwɛ ɛsɔdaa yɔ ɛ-sɔɔlɩm yɔ, e-ɖeke ɛkaɣnɩ sʋʋ.” (Maatiyee 7:21) Ɛtasɩ yɔɔdʋʋ se: “Ɩkaɣ-wɛ tɩlʋʋ nɛ pe-pee.” (Maatiyee 7:16) Bibl pɩzɩɣ nɛ kɩsɩnɩ-ŋ nɛ ŋtɩlɩ toovenim Ɛsɔ sɛtʋ.—Yohanɛɛsɩ 17:17.

Ɛzɩma ŋpɩzɩɣ nɛ ŋɖɔ wezuu nʋmɔʋ taa? Pɩpɔzʋʋ se ŋkpɛlɩkɩ nɛ ŋtɩlɩ weyi ɛ-cɔlɔ wezuu lɩnaa yɔ. Ɛnʋ lɛ anɩ? Suwe payaɣ-ɩ? Wɛtʋ ndʋ ɛwɛna? Ɛbɛ ɛwɛɛ ɛlakɩ se pɩwazɩ-ɖʋ? Ɛbɛ ɛsɔɔlaa se ɖɩla? *

Pɩtɩkɛ tʋmɩyɛ labʋ, tɔɔnaɣ tɔɔʋ, aleɣya nɛ hɔʋ yɔɔ cɔnʋʋ ɖeke yɔɔ Ɛsɔ lɩzɩ ɛyaa. Ða-Lɩzɩyʋ sɔɔlaa se ɖɩtɩlɩ-ɩ nɛ ɖɩpɩsɩ ɛ-taabalaa. Ye ɖɩlakɩ Ɛsɔ sɔɔlɩm yɔ, ɖɩwɩlɩɣ-ɩ se ɖɩsɔɔlɩ-ɩ. Yesu yɔɔdaa se: “Wezuu maatɛŋ kɛlɛ se pɛwɛɛ nɛ patɩlɩɣ-ŋ, ña Ɛsɔ toovenim tʋ kʋɖʋm koŋ.”—Yohanɛɛsɩ 17:3.

Pɩsa nɛ ñɔ-tɔm kɛdɩnɩ Ɛsɔ toovenim tʋ lɛ, pɩpɔzʋʋ se ŋkpɛzɩ nɩŋgbanzɩ nasɩyɩ. Pɩpɩzɩɣ pɩlabɩ-ŋ ɛzɩ pɩwɛ kaɖɛ yɔ. Ɛlɛ toovenim taa lɛ, ye ŋkpɛzɩ kajalaɣ nɩŋgbaŋaɣ yɔ, ŋnaɣ se pɩkɛ nʋmɔʋ ŋgʋ kɩ-ɖɔm haɣ taa leleŋ siŋŋ yɔ. Yehowa Aseɣɖe Tɩnaa sɔɔlaa se pɛkpɛlɩkɩnɩ-ŋ Bibl lone nɖɩ ɖɩ-taa ŋsɔɔlaa yɔ, nɛ alɩwaatʋ ndʋ tɩkɛdɩɣnɩ-ŋ yɔ tɩ-yɔɔ se pɩsa nɛ ŋhiɣ tɔm ndʋ ɛyaa pɔzʋʋ ɖoŋ ɖoŋ Ɛsɔ yɔɔ yɔ, tɩ-yɔɔ cosuu. Ŋpɩzɩɣ ŋtɩŋnɩ intɛrnɛɛtɩ lone www.isa4310.com yɔɔ nɛ ŋma-ɖʋ tɔm.