ANDŨ methĩawa na mawoni me kĩvathũkany’o ĩũlũ wa thayũ na kĩkw’ũ. Amwe maĩkĩĩaa kana mũndũ akw’a, nĩvatonyeka akaendeea kwĩthĩwa e kyũmbe kĩngĩ, kana akaendeea kwĩthĩwa thayũ vandũ vangĩ. Angĩ maĩkĩĩaa kana mũndũ akw’a, asyaawa ĩngĩ na ayĩendeea kwĩthĩwa thayũ. Namo angĩ maĩkĩĩaa kana mũndũ akw’a, ũu wake wĩthĩawa wathela.

Nũtonya kwĩthĩwa na woni wĩ kĩvathũkany’o na mawoni asu andũ methĩawa namo kwosana na ũndũ ũeetwe kana kĩthĩo kya kwenyu. Nĩkwĩthĩwa mawoni ĩũlũ wa ũndũ kwĩthĩawa ĩla mũndũ wakw’a me kĩvathũkany’o mũno, ve vandũ tũtonya kũkwata ũw’o ĩũlũ wa ũndũ ũsu?

Kwa myaka maana maingĩ, atongoi ma ndĩni nĩmethĩĩtwe maimanyĩsya kana thayũ wa mũndũ ndũkusaa. Vakuvĩ athaithi ma ndĩni syonthe ila nene maĩkĩĩaa kana thayũ ndũkusaa, na nũendeeaa kwĩkala wĩkalonĩ wa syũmbe sya veva ĩla mũndũ wakw’a. Athaithi asu nĩ ma ndĩni sya Kĩklĩsto, Hindu, Kĩyuti, Aisilamu, na ndĩni ingĩ. Namo andũ ma ndĩni ya Buddha maĩkĩĩaa kana mũndũ akw’a asyaawa ĩngĩ mavinda maingĩ ũndũ vatonyeka, na ũu ũituma ũtonyi wake wa kũsũanĩa wĩthĩwa ũseonĩ mwingĩ kana mũuonĩ mwingĩ. Na kĩu nĩkyo andũ ma ndĩni ya Buddha metaa Nirvana.

Nũndũ wa momanyĩsyo asu, andũ aingĩ ĩũlũ wa nthĩ nĩmaĩkĩĩaa kana kĩkw’ũ nĩkyo kĩtumaa mũndũ athi wĩkalonĩ ũngĩ. Kwoou, andũ aingĩ monaa kĩkw’ũ kĩ kya vata nũndũ nĩkĩtumaa mũndũ athi kwĩkala thayũ ũngĩ, na monaa kwĩ kwenda kwa Ngai andũ makusae. Ĩndĩ Mbivilia ĩmanyĩasya kyaũ ĩũlũ wa ũndũ ũsu? Wĩkũlw’a ũsome kĩlungu kĩla kĩatĩĩe na nũũkwata ũsũngĩo wa kwendeesya.