Nĩkĩ Andũ Makusaa?
Ũndũ Mbivilia yaasya
Ti ũndũ wa ũsengyo kũkũlya nĩkĩ andũ makusaa, na mũno mũno ĩla twakwʼĩĩwa nĩ mũndũ witũ. Mbivilia yaasya atĩĩ: “Ũmoa wa kĩkwʼũ nĩ naĩ.”—1 Akolintho 15:56.
Nĩkĩ andũ onthe mekaa naĩ na kũkwʼa?
Asyai maitũ ma mbee, Atamu na Eva, makwie nũndũ nĩmamũvĩtĩisye Ngai. (Mwambĩlĩlyo 3:17-19) Kĩkwʼũ nokyo kyaĩ kĩtonya kũmakwata nũndũ wa kũmũvĩtĩsya Ngai, nĩkwĩthĩwa Ngai nĩwe “mbuluti ya thayũ.”—Savuli 36:9; Mwambĩlĩlyo 2:17.
Kwĩsĩla kwa Atamu, nzyawa syake syonthe nĩsyalikile naĩnĩ. Mbivilia yaĩtye atĩĩ: “Nũndũ wa mũndũ ũmwe naĩ yalikile kũũ nthĩ, na kĩkwʼũ kwondũ wa naĩ; na kwa ũu kĩkwʼũ kyavikĩa andũ onthe, nĩkwĩthĩwa onthe nĩmeekie naĩ.” (Alomi 5:12) Andũ onthe makusaa nũndũ nĩmekaa naĩ.—Alomi 3:23.
Ũndũ kĩkwʼũ kĩkavetwa
Ngai nĩwathanĩte ĩvinda yĩla ‘ũkamelya kĩkwʼũ tene na tene.’ (Isaia 25:8) Nĩ kana amine kĩkwʼũ, no nginya ambe kũmina kĩla kĩetae kĩkwʼũ, nakyo nĩ naĩ. Ngai akeeka ũu atũmĩĩte Yesũ Klĩsto, ũla, ‘umasya naĩ ya nthĩ.’—Yoana 1:29; 1 Yoana 1:7.