Olee Otú Àjà Jizọs Chụrụ Si Bụrụ “Ihe Mgbapụta n’Ọnọdụ Ọtụtụ Mmadụ”?
Ihe Baịbụl kwuru
Àjà Jizọs chụrụ bụ ihe Chineke ji anapụta ma ọ bụ azọpụta ụmụ mmadụ n’aka mmehie na ọnwụ. Baịbụl kpọrọ ọbara Jizọs ji chụọ àjà ihe mgbapụta. (Ndị Efesọs 1:7; 1 Pita 1:18, 19) N’ihi ya, Jizọs kwuru na ya bịara ka ‘o were ndụ ya nye ka ọ bụrụ ihe mgbapụta n’ọnọdụ ọtụtụ mmadụ.’—Matiu 20:28, Bible Nsọ nke Union Version.
Gịnị mere o ji dị mkpa ka a gbapụta anyị?
Nwoke mbụ, bụ́ Adam, zuru okè mgbe e kere ya. Ọ gaara adị ndụ ebighị ebi ma a sị na o nupụrụghị Chineke isi. (Jenesis 3:17-19) Mgbe ọ mụtara ụmụ, o bufere ha mmehie. (Ndị Rom 5:12) Ọ bụ ya mere Baịbụl ji kwuo na Adam “rere” ma onwe ya ma ụmụ ya ka ha bụrụ ohu mmehie na ọnwụ. (Ndị Rom 7:14) Ebe ọ bụ na ha ezughị okè, e nweghị onye n’ime ha ga-akwụli ụgwọ a ga-eji nwetaghachi ndụ zuru okè ahụ Adam tụfuru.—Abụ Ọma 49:7, 8.
Chineke nweere ụmụ Adam ọmịiko n’ihi na ha enweghị olileanya ọ bụla. (Jọn 3:16) Ma, ebe ọ bụ na Chineke na-ekpe ikpe ziri, ọ gaghị eleghara mmehie ha anya ma ọ bụ gbaghara ha n’enweghị ezigbo ihe mere ọ ga-eji gbaghara ha. (Abụ Ọma 89:14; Ndị Rom 3:23-26) Chineke hụrụ ụmụ mmadụ n’anya, n’ihi ya, o wetara ihe ruru eru a ga-eji gbaghara ha mmehie ha, nke ga-emekwa ka ha pụọ n’aka mmehie kpamkpam. (Ndị Rom 5:6-8) Ọ bụ ihe mgbapụta bụ ihe ahụ ruru eru a ga-eji maka ya gbaghara ụmụ mmadụ.
Gịnị ka ihe mgbapụta ahụ pụtara?
Na Baịbụl, okwu ahụ bụ́ “ihe mgbapụta” pụtara ihe atọ ndị a:
Ụgwọ a na-akwụ akwụ.—Ọnụ Ọgụgụ 3:46, 47.
Ihe e ji agbapụta ihe ma ọ bụ atọhapụ ihe.—Ọpụpụ 21:30.
Ya na ihe e ji ya akwụ ụgwọ ya na-aha nhata. *
Legodị otú àjà mgbapụta Jizọs Kraịst chụrụ si mezuo ihe atọ a.
Ụgwọ a na-akwụ akwụ. Baịbụl kwuru na “e ji ihe dị oké ọnụ ahịa zụta” Ndị Kraịst. (1 Ndị Kọrịnt 6:20; 7:23) Ihe ahụ e ji zụta ha bụ ọbara Jizọs, nke o ji “zụtara Chineke ndị mmadụ si n’ebo niile na asụsụ niile na ndị niile na mba niile.”—Mkpughe 5:8, 9.
Iji gbapụta ihe. Àjà Jizọs chụrụ bụ ‘ihe mgbaputa tọhapụrụ’ anyị ná mmehie.—1 Ndị Kọrịnt 1:30; Ndị Kọlọsi 1:14; Ndị Hibru 9:15.
Ịha nhata. Àjà Jizọs chụrụ na ihe Adam tụfuru hà, ya bụ, ndụ zuru okè. (1 Ndị Kọrịnt 15:21, 22, 45, 46) Baịbụl kwuru, sị: “N’ihi na ebe ọ bụ na e mere ka ọtụtụ mmadụ ghọọ ndị mmehie site ná nnupụisi nke otu onye ahụ [Adam], otú ahụkwa ka a ga-eme ka ọtụtụ mmadụ ghọọ ndị ezi omume site ná nrubeisi nke otu onye ahụ [Jizọs Kraịst].” (Ndị Rom 5:19) Ihe a gosiri otú ọnwụ otu onye ga-esi gbapụta ọtụtụ ndị n’aka mmehie. N’eziokwu, àjà Jizọs chụrụ bụ nnọọ “ihe mgbapụta kwekọrọ ekwekọ maka mmadụ niile,” bụ́ ndị na-eme ihe ha kwesịrị ime iji rite uru na ya.—1 Timoti 2:5, 6.
^ Na Baịbụl, okwu e si sụgharịta “ihe mgbapụta” pụtara ụgwọ ma ọ bụ ego a kwụrụ maka ihe. Dị ka ihe atụ, okwu Hibru bụ́ ka·pharʹ pụtara “ikpuchi ihe.” Ọ na-apụtakarị ikpuchi mmehie. (Abụ Ọma 65:3) Okwu yiri ya bụ́ koʹpher pụtara ego a kwụrụ iji kpuchie ihe ma ọ bụ gbapụta ihe. (Ọpụpụ 21:30) Okwu Grik bụ́ lyʹtron, nke e si sụgharịta “ihe mgbapụta,” nwere ike ịpụta “ego e ji gbapụta ihe.” (Matiu 20:28; The New Testament in Modern Speech, nke R. F. Weymouth dere) Ndị na-ede akwụkwọ n’asụsụ Grik na-asụgharị ya ụgwọ a kwụrụ iji tọhapụ onye a kpụụrụ n’agha ma ọ bụ iji tọhapụ ohu.