30 ME 2023
LARISI

Frè nou yo nan Teykovo santi Jewova ede yo

FÈ L JWE

Tribinal distri Teykovski gen pou l fè konnen desizyon li pran nan ka ki konsène frè Sergey Galyamin, frè Anatoliy Lyamo, frè Vladimir Spivak ak frè Aleksandr Vasichkin. Komisè a poko fè konnen ki santans li ta renmen yo ba yo.

Enfòmasyon pèsonèl

Sergey Galyamin

Dat ak kote li fèt: 1967 (Teykovo, rejyon Ivanovo)

Byografi: Li gen yon atelye pou repare soulye, e li travay ladan l.

Li te marye ak Lyudmila an 1991. Yo gen twa pitit fi.

Li te sezi lè l te aprann Bondye gen yon non. Li te asiste yon reyinyon Temwen Jewova yo, e bèl akèy li te jwenn te fè l kwè toutbon li jwenn laverite. Sergey te batize an 2001 e Lyudmila te batize an 2002.

Kòmantè li fè

Ki leson enpòtan ou aprann nan sitiyasyon difisil sa a?

Lè m te fèk aprann fason otorite yo t ap trete frè ak sè yo, mwen te fache e mwen te mal wè sa. E sa te fè m kòmanse ap enkyete m pou sa k ka rive m. Men mwen te sonje pawòl ki nan Sòm 73:26 yo ki di: “Kò m ak kè m gendwa febli, men, Bondye pwoteje kè m. Se li ki mas wòch mwen.” M te jwenn rapèl sa a nan bon moman. M te rann mwen kont sa pa nesesè pou m ap fache e pou m ap imajine tout bagay ki ta ka rive. Sa ki pi saj pou m fè se ranfòse relasyon m ak Jewova epi konte sou li nèt.

Anatoliy Lyamo

Dat ak kote li fèt: 1963 (Poga, rejyon Briyansk)

Byografi: Li te travay nan konstriksyon wout anba tè.

Li te marye ak Galina an 1993. Yo gen de pitit ak de pitit pitit.

Li t ap chèche laverite, e lojik ki nan Bib la te atire l. Anatoliy te batize an 1995 e Galina te batize an 1997.

Kòmantè li fè

Ki jan fanmi espirityèl ou a soutni w?

Mwen bay frè m ak sè m yo pi plis valè toujou kounye a. Mwen pa gen mo pou m esplike jis ki nan pwen Jewova te sèvi ak frè ak sè yo pou ede m. Pandan otorite yo t ap mennen ankèt yo, mwen te jwenn anpil difikilte. Men, Jewova te itilize frè ak sè yo pou pran swen fanmi m. Yo te vin nan tribinal la tou pou yo soutni m, yon bagay ki te mande pou yo gen anpil kouraj. E chak jou, mwen te resevwa mesaj kote yo te fè m konnen yo priye pou mwen e pou fanmi m. Sa te motive m pou m ede lòt moun k ap pase anba eprèv tou.

Vladimir Spivak

Dat ak kote li fèt: 1955 (Litin, Ikrèn)

Byografi: Li te sèvi nan lame anvan l te vin yon Temwen Jewova.

Li te marye ak Nellie an 1979. Nellie te kòmanse etidye Labib an premye. Yo te asiste yon kongrè Temwen Jewova yo ansanm an 1992. Sa Vladimir te wè ak sa l te tande yo te gen gwo efè sou li. Nellie te batize an 1994 e Vladimir te batize an 1997.

Kòmantè li fè

Ki sa ki ede w goumen ak dekourajman?

Youn nan bagay ki vrèman manke m se asiste asanble yo ak kongrè yo. Lefètke yo pa pèmèt mwen asiste yo, e lefètke yo ban mwen lòt restriksyon ankò, pafwa sa konn fè m pèdi fòs e sa konn dekouraje m. Men, m konnen mwen pa poukont mwen. Jewova ak frè m ak sè m yo toujou avè m. Mwen konnen Jewova ap toujou soutni m, l ap toujou pwoteje m, e l ap ede m andire eprèv mwen yo.

Aleksandr Vasichkin

Dat ak kote li fèt: 1969 (Briyansk, rejyon Briyansk)

Byografi: Li te sèvi nan lame anvan l te vin Temwen Jewova. Sa pa gen lontan depi li t ap travay kòm jadinye.

Li te marye ak Nataliya an 1993. Yo gen de pitit.

Li te sezi pou wè jan Temwen Jewova yo te akeyi l lè l te asiste reyinyon yo. Li menm ak madanm li te kòmanse etidye Labib. Nataliya te batize an 1994 e Aleksandr te batize an 1995.

Kòmantè li fè

Ki sa k ede w pou w pa ret konsantre twòp sou eprèv w ap jwenn yo?

M rann mwen kont chak fwa m ap plenyen akoz sitiyasyon m, sa fè m dekouraje. Donk, olye m chita ap mande tèt mwen poukisa se mwen sa rive, mwen reflechi pito sou privilèj mwen genyen pou m pale de Jewova. Epitou, mwen fè efò pou m sonje bagay m ap viv yo la pou yon ti tan sèlman. Talè konsa, yo pap la ankò. Depi m rete fidèl ak Jewova, m ap ka kontinye byen pwofite relasyon sere m gen ak Jewova a ansanm ak relasyon sere m gen ak frè ak sè yo pou toutan.

Nou konnen kèlkeswa eprèv nou jwenn nan sistèm sa a, yo la pou yon ti tan lè nou konpare yo ak benediksyon Jewova rezève pou sèvitè fidèl li yo, benediksyon k ap la pou toutan. — 2 Korentyen 4:17, 18.

Dat ak evènman ki te pase

10 avril 2020

Ankèt kriminèl la kòmanse.
11 avril 2020

Otorite yo fouye kay frè yo.
16 avril 2020

Yo mete restriksyon sou deplasman yo ka fè.
2 fevriye 2023

Pwosè a kòmanse.

Lòt sijè ki enteresan

NOUVÈL

Yo nan prizon pou lafwa yo — Larisi

Gen Temwen Jewova nan peyi Larisi yo mete nan prizon pou lafwa yo. Aprann nan istwa yo, e w ap ka enprime yon lis ki gen Temwen nan peyi Larisi ki nan prizon.

NOUVÈL