Iesu Amo Ita Dibaia Gaudia

Ma Haida Ita Kara Namo Henia Dalana

Dahaka dainai ma haida ita hebogahisi henia?

Ena be taunimanima ese oi idia hebogahisi henia lasi, to oi be idia oi hebogahisi henia, a? Bema ita ura Iesu ita tohotohoa, vadaeni taunimanima ibounai, ita idia inai henia taudia danu, ita hebogahisi henia be namo. Iesu ia gwau: “Bema umui idia lalokau henia taudia sibona do umui lalokau henia, umui emui namo be dahaka? Kara dika taudia ese idia dekenai idia lalokau henia taudia be idia lalokau henia danu. . . . To umui dekenai idia badu taudia do umui lalokau henia, . . .  umui be Dirava Ataiai Momokani ese iena natuna do ia halaoa umui. Badina be Dirava ese ia dekenai idia tanikiu henia lasi taudia bona kerere taudia danu ia bogahisihisi henidia.”​​—⁠Luka 6:​32-​36; 10:​25-​37.

Dahaka dainai ma haida edia dika ita gwauatao?

Ita kerere neganai, ita ura Dirava ese iseda dika ia gwauatao. Iesu ia gwau, Dirava ita guriguri henia iseda dika ia gwauatao totona. (Mataio 6:​12) To Iesu ia gwau danu, Dirava be eda dika do ia gwauatao bema mai iseda ura ida ma haida edia dika ita gwauatao. Ia gwau: “Bema taunimanima edia dika umui gwauatao neganai, emui Tamana, guba dekenai  ia noho ese emui dika danu do ia gwauatao. To bema taunimanima edia dika umui gwauatao lasi, emui Tamana ese emui dika danu do ia gwauatao lasi.”​​—⁠Mataio 6:​14, 15.

Edena dala ai ruma bese idia moale diba?

Ena be Iesu ia headava lasi, to iena haheitalai amo ruma bese hamoalea dalana do ita dibaia. Iena hereva bona kara be namo herea dainai, ita tohotohoa be namo. Mani henunai idia noho point toi ita itaia:

1. Tau ese iena adavana ia lalokau henia, ia sibona ia lalokau henia hegeregerena. Iesu be haheitalai namona tatau dekenai. Iena aposetolo taudia ia hamaoroa: “Taravatu matamatana lau henia umui dekenai, inai bamona: Umui ta ta dekenai umui lalokau henia. Lau ese umui dekenai lau lalokau henia hegeregerena.” (Ioane 13:34) Unai sisiba be mai anina bada tatau dekenai, badina Baibel ia gwau: “Tatau e, emui adavana do umui lalokau henia, Keriso ese ekalesia ia lalokau henia bamona. Keriso ese danu iena mauri ia atoa diho ekalesia dainai. Unai bamona danu, namona be tatau ese edia adavana do idia lalokau henia, idia edia tauanina idia lalokau henia hegeregerena. Adavana ia lalokau henia tauna ese sibona ia lalokau henia noho. Badina be tau ta ese sibona ena tauanina ia badu henia diba lasi. To ia ubua noho, bona ia naria noho, Keriso ese ekalesia ia ubua bona naria noho hegeregerena.”​​—⁠Efeso 5:​25, 28, 29.

2. Tau bona hahine idia badinaia heheni be namo. Heudahanai karana be Dirava ese ia inai henia bona ruma bese maurina ia hadikaia diba. Iesu ia gwau: “Be, Buka Helaga umui duahia lasi, a? Ia torea, . . . ‘inai dainai tau be iena tamana sinana do ia rakatania, iena adavana dekenai do ia hakapua, vadaeni idia ruaosi be tamona idia noho. Unai dainai idia be rua lasi, edia anina be tamona. Dirava ese ia hakapua taudia, be taunimanima ese do idia hapararaia lasi.’ . . . To lau ese umui lau hamaoroa, bema iena adavana ia heudahanai lasi, to tau ta ese iena adavana ia rakatania, vadaeni hahine ta ma ia adavaia, unai tau be heudahanai tauna.”​​—⁠Mataio 19:​4-9.

3. Memero kekeni ese edia tama sina idia kamonai henia be namo. Herevana Iesu be goevadae bona ena tama sina be goevadae lasi taudia, to Iesu be idia ia kamonai henia. Baibel ia gwau, Iesu ena mauri lagani be 12 neganai: “Ia be [ena tama sina] danu Nasareta dekenai idia lao, bona ia kamonai henia idia dekenai.”​​—⁠Luka 2:​51; Efeso 6:​1-3.

Dahaka dainai inai hakaua herevadia ita badinaia?

Iesu be ena hahediba taudia dekenai gau momo ia hadibaia murinai, ia gwau: “Inai bema umui diba, bona bema umui karaia, be do umui namo.” (Ioane 13:17) Momokani, bema ita ura Keristani taudia momokanidia ai ita lao, namona be Iesu ena sisiba ita badinaia sibona lasi, to ma haida ita kara namo henidia. Ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.”​​—⁠Ioane 13:⁠35.

Hereva ma haida dibaia totona, Baibel be Dahaka Ia Hadibaia? * bukana ena karoa 14 itaia.

[Footnote]

[Pictures on page 22, 23]

Kohu ia halusia kava merona ena parabole amo ita diba, hebogahisi bona dika gwauatao karana be mai anina bada.​​—⁠Luka 15:​11-​32

[Picture on page 23]

Tau bona hahine idia badinaia heheni be namo