Salamo 72:1-20
Ane ta Solomona totona.
72 Dirava e, king dekenai emu hahemaoro herevadia oi hadibaia,Bona king ena natuna dekenai emu kara maoromaoro oi hadibaia.+
2 Ia be mai kara maoromaoro ida emu taunimanima ia durua be namo,Bona mai kara momokani ida ladana maragi taudia ia durua.+
3 Namona be ororo badadia ese taunimanima dekenai maino idia mailaia,Bona ororo maragidia ese kara maoromaoro idia mailaia.
4 Ia ese taunimanima huanai ladana maragi taudia ia gimaia be namo,Ia ese ogogami taudia edia natudia memero ia hamauria,Bona koikoi dalanai kohu idia abia taudia ia hamasea be namo.+
5 Idia ese oi do idia gari henia ela bona hanaihanai,Dina ia noho hanaihanai hegeregerena,Bona hua ia noho hanaihanai hegeregerena.+
6 Ia be idia utua rei latanai ia diho medu bamona,Ia be tano ia haparia medu bamona.+
7 Iena lohia negana lalonai kara maoromaoro do ia bada,+Bona maino do ia bada herea+ ela bona hua do ia hedinarai lou lasi.
8 Ia be davara ta amo ela bona davara ma ta do ia lohiaia,Bona Sinavai* amo ia lao bona tanobada ena dokona do ia lohiaia.+
9 Tano kaukau ai idia noho taudia be iena vairanai do idia tui diho,Bona iena inai taudia ese kahu do idia ania.+
10 Tarasisi ena king taudia bona motumotu idauidau edia king taudia,+Bona Sieba ena king taudia bona Seba ena king taudia ese harihari gaudia do idia henia.+
11 King ibounai be iena vairanai do idia tui diho,Bona bese idauidau ibounai ese ia do idia hesiai henia.
12 Badina ia ese heduru totona idia noinoi ogogami taudia do ia hamauria,Ladana maragi taudia bona heduru idia abia lasi taudia do ia hamauria danu.
13 Ia ese ladana maragi taudia bona ogogami taudia do ia hebogahisi henia,Bona ogogami taudia do ia hamauria.
14 Ia ese hisihisi bona dagedage karadia amo idia do ia hamauria,*Bona iena matana ai edia rara be dava bada gauna.
15 King ia mauri daudau bona ia dekenai Sieba ena golo idia henia be namo.+Ia totona idia guriguri hanaihanai be namo,Bona dina ibounai ia idia hanamoa be namo.
16 Tanobada ai aniani be do ia momo herea,+Ororo latanai witi be do idia momo herea,King ena au huahua be do idia momo herea, Lebanona ai bamona,+Bona siti ibounai ai taunimanima do idia momo herea, tanobada ena tubutubu gaudia bamona.+
17 Iena ladana ia noho hanaihanai be namo,+Bona ena ladana do ia boio lasi, dina ia boio diba lasi bamona.Taunimanima be ia dainai namo do idia davaria,+Bese ibounai ese ia do idia gwauraia moale tauna.
18 Iehova Dirava, Israela ena Dirava, idia hanamoa be namo,+Ia sibona ese gaukara namodia momo ia karaia.+
19 Iena ladana hairaina ita hanamoa hanaihanai be namo,+Bona ena hairai ese tanobada ibounai ia hahonua be namo.+Amen bona Amen.
20 Iese ena natuna Davida ena guriguri be iniseni ia doko.+
