Mahapos lang hambalon nga simbulo lang sang kalainan si Satanas sa Biblia. Pero amo gid bala sina ang ginatudlo sang Biblia? Kon amo, ngaa ginsambit sini nga nagapakighambal si Satanas kay Jesucristo kag sa Labing Gamhanan nga Dios? Binagbinaga ang duha ka halimbawa sini.

Sang ginsugdan ni Jesus ang iya ministeryo, ginsulay sia sang Yawa sing tatlo ka beses. Una, gintinguhaan ni Satanas nga sulayon si Jesus nga gamiton ang iya gahom halin sa Dios sa mahamkunon nga paagi agod busgon ang iya kagutom. Dayon, ginhangkat sang Yawa si Jesus nga irisgo ang iya kabuhi kag mangin maiyaiyahon. Sang ulihi, gintanyag ni Satanas sa iya ang tanan nga ginharian sang kalibutan kabaylo sang isa lang ka buhat sang pagsimba. Ining tatlo ka malalangon nga pagsulay ni Satanas ginsikway ni Jesus paagi sa paggamit sang Kasulatan.—Mateo 4:1-11; Lucas 4:1-13.

Kay sin-o si Jesus nagapakighambal? Sa iya bala malain nga kinaiya? Suno sa Kasulatan, si Jesus “isa nga natilawan sa tanan nga butang kaangay naton, apang wala sing sala.” (Hebreo 4:15) Nagasiling man ini: “Wala sia sing nahimo nga sala, kag wala man sing masapwan nga pagdaya sa iya baba.” (1 Pedro 2:22) Nakapabilin si Jesus nga himpit kag nakahupot sang iya integridad. Wala sia sing malain nga kinaiya. Gani maathag nga wala sia nagaistorya sa iya malain nga kinaiya, kundi sa isa ka matuod nga persona.

Ang ila pag-istoryahanay nagapabakod pa sang ebidensia nga si Satanas matuod nga persona.

• Dumduma nga gintanyag sang Yawa kay Jesus ang tanan nga ginharian sa kalibutan kabaylo sang isa ka buhat sang pagsimba. (Mateo 4:8, 9) Mangin wala pulos ini nga pagtanyag kon indi matuod si Satanas. Dugang pa, wala ginduhaduhaan ni Jesus ang daku nga awtoridad ni Satanas.

• Sa tapos ginsikway ni Jesus ang mga pagsulay sang Yawa, “ginbiyaan niya sia tubtob nga may kahigayunan sia liwat.” (Lucas 4:13) Sa sini nga kahimtangan, makasiling bala kita nga si Satanas isa lang ka malain nga kinaiya, ukon masupog nga kaaway?

• Talupangda nga “nag-abot ang mga anghel kag nag-alagad” kay Jesus. (Mateo 4:11) Yadto bala nga mga anghel matuod nga espiritu nga mga persona, nga nagpalig-on kag nagbulig kay Jesus? Huo. Ti, ngaa maghunahuna pa kita nga si Satanas indi espiritu nga persona?

Ang ikaduha nga halimbawa amo ang parte sa mahinadlukon sa Dios nga si Job. Ina nga rekord nagasaysay sang duha ka pag-istoryahanay sang Yawa kag sang Dios diin gindayaw sang Dios si Job sa iya integridad. Ginsiling ni Satanas nga nagaalagad lamang si Job sa Dios sa mahamkunon nga mga rason kag ginpasibangdan niya nga ginbakal lang sang Dios ang pagkamainunungon ni Job. Gani nangangkon si Satanas nga mas kilala niya si Job. Gintugutan ni Jehova si Satanas nga kuhaon kay Job ang iya pagkabutang, kabataan, kag bisan ang iya kapagros. * Sang ulihi, napamatud-an nga husto si Jehova parte kay Job, kag butigon si Satanas. Ginpakamaayo sang Dios si Job sa iya integridad.—Job 1:6-12; 2:1-7.

Sa pag-istoryahanay sang Dios kag ni Satanas, nagapakig-istorya bala si Jehova sa iya malain nga kinaiya? Ang Biblia nagasiling: “Ang iya [Dios] dalanon himpit.” (2 Samuel 22:31) Ang Pulong sang Dios nagasiling man: “Balaan, balaan, balaan si Jehova nga Dios, ang Labing Gamhanan.” (Bugna 4:8) Ang balaan nagakahulugan nga putli, sagrado, kag wala sing sala. Si Jehova himpit kag wala sing kasawayan. Wala gid sia sing malain nga kinaiya.

Pero mahimo ang iban magsiling nga si Job indi man matuod, nga himuhimo lang ang ila pag-istoryahanay. Mapatihan bala ina? Ginapakita sang iban nga teksto sa Biblia nga matuod nga persona si Job. Halimbawa, mabasa naton sa Santiago 5:7-11 nga gingamit si Job subong halimbawa agod palig-unon ang mga Cristiano nga magbatas sa mabudlay nga kahimtangan kag subong pahanumdom nga ginapakamaayo ni Jehova ang mga nagabatas. Ano pa ang pulos sini kon si Job indi matuod kag ang mga pag-atake ni Satanas himuhimo lang? Dugang pa, sa Ezequiel 14:14, 20, si Job ginsambit kaupod nanday Noe kag Daniel sa listahan sang tatlo ka matarong nga tawo. Kaangay nanday Noe kag Daniel, si Job matuod nga persona, isa ka tawo nga may daku nga pagtuo. Kon si Job matuod, indi bala nga matuod man ang iya kasumpong nga naghingabot sa iya?

Maathag gid sa Biblia nga si Satanas matuod nga espiritu nga persona. Pero, mahimo ka maghunahuna, ‘Makahalit bala sia sa akon kag sa akon pamilya sa sining moderno nga kalibutan subong?’

Handurawa nga may grupo sang kriminal nga gulpi lang nagkadto sa inyo siudad. Pat-od gid nga mabutang sa katalagman ang seguridad kag magakabalaka ang mga tawo. Karon talupangda ang kaanggid nga kahimtangan: si Satanas kag ang iya mga demonyo—mga matuod nga espiritu nga tinuga nga pareho sa iya nga nagrebelde man sa Dios—yara na sa duta. Ano ang mangin resulta? Hunahunaa ang makita mo sa lokal kag internasyonal nga mga balita.

• Nakita mo bala ang paglapnag sang kasingki bisan pa sang pagtinguha sa bilog nga kalibutan nga pauntaton ini?

• Nakita mo bala ang paglapnag sang mga kalingawan nga nagapasanyog sang espiritismo, bisan pa indi ini luyag sang mga ginikanan?

• Nakita mo bala ang padayon nga pagkaguba sang palibot bisan pa sang mga panikasog nga salbaron ini?

• Daw may sayop gid bala sa katilingban—nga daw may nagaimpluwensia sa katawhan padulong sa kahalitan?

Talupangda kon sin-o ang ginasiling sang Biblia nga kabangdanan sini: “Gani gintagbong ang daku nga dragon, ang orihinal nga man-ug, ang isa nga ginatawag Yawa kag Satanas, nga nagapatalang sa bug-os napuy-an nga duta; gintagbong sia sa duta, kag ang iya mga anghel gintagbong upod sa iya. . . . Kailo sa duta kag sa dagat, bangod ang Yawa nagpanaug sa inyo, nga may daku nga kaakig, kay nahibaluan niya nga malip-ot na lamang ang iya tion.” (Bugna 12:9, 12) Sa tapos mabinagbinag ang mga pamatuod, madamo ang naghinakop nga si Satanas makatalagam gid nga espiritu nga persona nga aktibo nga nagaimpluwensia sa aton palibot.

Mahimo mabalaka ka kon paano ka maamligan sa sini. Nagakaigo lang ina. Ang masunod nga artikulo magahatag sa aton sing praktikal nga bulig.