Sin-o Gid si Jesucristo?

“Sang nagsulod sia sa Jerusalem, nagkinagula ang bug-os nga siudad, nga nagasiling: ‘Sin-o sia?’ Ang kadam-an nagsiling: ‘Sia ang manalagna nga si Jesus, gikan sa Nazaret sang Galilea!’”—MATEO 21:10, 11.

NGAA nagkinagula ang mga tawo sang nag-abot si Jesucristo * sa Jerusalem sang tigpamulak sang 33 C.E.? Madamo sa ila ang nakabati parte kay Jesus kag sa iya tumalagsahon nga hinimuan, kag ginpanugid nila ini. (Juan 12:17-19) Pero, wala sila kahibalo nga mangin daku gid ang impluwensia sini nga tawo sa bilog nga kalibutan asta subong!

Binagbinaga ang pila ka halimbawa.

▪ Ang kalendaryo sa madamo nga lugar nabase sa tuig nga ginapatihan nga natawo Jesus.

▪ Mga duha ka bilyon ka tawo, ukon mga 30 porsiento sang populasyon sang kalibutan, ang nagasiling nga mga Cristiano sila

▪ Ang Islam, nga may sobra sa isa ka bilyon ka miembro, nagatudlo nga si Jesus “isa ka propeta nga labaw pa kanday Abraham, Noe, kag Moises.”

▪ Madamo sa mapuslanon nga ginsiling ni Jesus ang pirme mabatian subong. Ari ang pila sa sini:

‘Ang inyo “huo,” huo, ang inyo “indi,” indi.’ —MATEO 5:37.

‘Wala sing makapaulipon sa duha ka agalon.’—MATEO 6:24.

‘Ang tanan nga luyag mo himuon sa imo, himuon mo man sa iban.’—MATEO 7:12.

‘Ang maayo nga kahoy indi makapamunga sing malain nga bunga.’—MATEO 7:18.

‘Ang nagagamit sing espada, sa espada man mapatay.’—MATEO 26:52.

‘Mangin mahinatagon, kag ang mga tawo magahatag sa inyo.’—LUCAS 6:38.

Makita gid ang impluwensia ni Jesus sa mga tawo halin pa sang una. Pero lainlain ang pagpati parte sa iya. Gani, mahimo mamangkot ka, ‘Sin-o gid si Jesucristo?’ Ang Biblia lamang ang makasugid kon diin naghalin si Jesus, paano sia nagkabuhi, kag kon ngaa napatay sia. Ini nga mga kamatuoran makaapektar gid sa imo kabuhi subong kag sa palaabuton.

[Nota]