Si Jesus—Paano Sia Nagkabuhi?

“Ang akon kalan-on amo ang paghimo sa kabubut-on sang nagpadala sa akon kag ang pagtapos sa iya buluhaton.” —JUAN 4:34.

SANG ginhambal ini ni Jesus, bilog nga aga sila nga nagalakbay sang iya mga disipulo sa kabukiran sang Samaria. Ginapakita sini kon ano gid ang pinakaimportante sa iya kabuhi. (Juan 4:6, footnote) Nagpensar ang mga disipulo nga basi gutom na si Jesus, gani gin-agda nila sia nga magkaon. (Juan 4:31-33) Pero ginsugid ni Jesus ang katuyuan sang iya kabuhi. Mas importante sa iya ang paghimo sang hilikuton sang Dios sangsa pagkaon. Makita sa iya pagkabuhi, ginahambal, kag ginahimo, nga ginatuman niya ang Dios. Ano ang pila sa sini?

▪ Nagwali kag nagtudlo sang Ginharian sang Dios Ginapaathag sang Biblia ang hilikuton ni Jesus: “Naglibot sia sa bug-os nga Galilea, nga nagapanudlo . . . kag nagabantala sang maayong balita sang ginharian.” (Mateo 4:23) Wala lamang ginwali ni Jesus ang Ginharian sang Dios sa mga tawo. Gintudluan man niya sila, ukon ginpaathagan kag ginkumbinsi sila paagi sa maayo nga pagpangatarungan. Parte gid sa Ginharian ang mensahe ni Jesus.

Sa bilog niya nga ministeryo, gintudlo ni Jesus kon ano gid ang Ginharian sang Dios kag kon ano ang himuon sini. Ari ang pila ka kamatuoran parte sa Ginharian nga ginhambal ni Jesus kag kon diin nga bersikulo sa Biblia ini makita.

▪ Ang Ginharian sang Dios isa ka gobierno sa langit, kag si Jesus amo ang ginbutang ni Jehova nga Dios bilang Hari.—MATEO 4:17; JUAN 18:36.

▪ Pakabalaanon sini nga Ginharian ang ngalan sang Dios kag tumanon sini ang Iya kabubut-on sa duta subong sang sa langit.—MATEO 6:9, 10.

▪ Sa paggahom sang Ginharian sang Dios, mangin paraiso ang bilog nga duta.—LUCAS 23:42, 43.

▪ Malapit na lang mag-abot ang Ginharian sang Dios kag tumanon sini ang kabubut-on sang Dios sa duta. *—MATEO 24:3, 7-12.

▪ Naghimo sing milagro Nakilala si Jesus bilang “Manunudlo.” (Juan 13:13) Pero sa iya tatlo ka tuig kag tunga nga ministeryo, naghimo man sia sing mga milagro. May duha ini ka katuyuan. Una, pamatuod ini nga ginpadala sia sang Dios. (Mateo 11:2-6) Ikaduha, ginapakita sini nga labaw pa ang iya himuon sa palaabuton bilang Hari sa Ginharian sang Dios. Ari ang pila niya ka milagro.

▪ Ginpauntat niya ang unos sa dagat kag ang mabaskog nga hangin.—MARCOS 4:39-41.

▪ Ginpang-ayo niya ang mga masakiton, pati na ang mga bulag, bungol, kag piang.—LUCAS 7:21, 22.

▪ Ginpadamo niya ang pagkaon, gani madamo nga gutom ang nakakaon.—MATEO 14:17-21; 15:34-38.

▪ Tatlo ka beses nga nagbanhaw sia sang patay.—LUCAS 7:11-15; 8:41-55; JUAN 11:38-44.

Imadyina ang kabuhi sa duta kon maggahom na ining gamhanan nga Hari!

 ▪ Nagpakita sang mga kinaiya ni Jehova nga Dios Wala na sing mas makatudlo parte kay Jehova sangsa Iya mismo Anak, ang isa nga gintawag nga si Jesucristo. Bilang “panganay sa tanan nga tinuga,” mas madugay nga nakaupod ni Jesus si Jehova sangsa iban nga espiritu nga tinuga. (Colosas 1:15) May daku sia nga kahigayunan nga mailog ang panghunahuna sang iya Amay kag matun-an ang Iya kabubut-on, prinsipio, kag mga dalanon.

Gani nakasiling si Jesus: “Kon sin-o ang Anak wala sang nakakilala kundi ang Amay; kag kon sin-o ang Amay, wala sang nakakilala kundi ang Anak, kag sia nga sa iya luyag sang Anak nga ipahayag sia.” (Lucas 10:22) Sang nangin tawo si Jesus diri sa duta, handa sia kag gusto gid niya ipakilala ang iya Amay. Pinasahi gid ang ginasiling kag ginatudlo ni Jesus kay natun-an niya ini mismo sa langit kag sa mahimayaon nga presensia sang Labing Mataas nga Dios.—Juan 8:28.

Ang pagpakilala ni Jesus sa iya Amay mapaanggid sa ginahimo sang transformer sang koryente. Makakuha ini sang mataas nga boltahe kag dayon ginapanubuan ini para magamit sang mga konsumidor. Sang ari si Jesus sa duta, ang iya natun-an sa langit parte sa iya Amay gintudlo niya sa ordinaryo nga mga tawo sa paagi nga mahapos nila maintiendihan kag matuman.

Binagbinaga ang duha ka importante nga paagi nga ginpakilala ni Jesus ang iya Amay.

▪ Gintudlo ni Jesus ang kamatuoran parte kay Jehova—ang Iya ngalan, katuyuan, kag mga dalanon.—JUAN 3:16; 17:6, 26.

▪ Ginpakita ni Jesus ang matahom nga mga kinaiya ni Jehova paagi sa iya mga ginhimo. Nailog gid niya ang kinaiya sang iya Amay, amo nga pareho lang nga nagsiling sia: ‘Kon gusto mo makilala ang akon Amay, tan-awa lang ako.’—JUAN 5:19; 14:9.

Dalayawon gid ang pagkabuhi ni Jesus. Makabenepisyo pa gid kita kon usisaon naton kon ngaa napatay sia kag magkabuhi nahisuno sa aton natun-an parte sa iya.

[Nota]