MẸDELẸ DỌ LALA. Doto dopo yí anademẹ Biblu tọn lẹ hihodo jlẹdo nuplọnmẹwe he tọ́n to 1920 lẹ gblamẹ yiyizan nado plọnmẹ lẹnunnuyọnẹn todin go. Mẹhe ma nọ tindo sisi na Biblu de tlẹ sọgan kanse eyin e na yọnbasi nado yí anademẹwe ọdinatẹẹ hoho he masọ tin ba lẹ tọn do plọn lehe yè na zan ọdinatẹẹ yọyọ dintọn lẹ do. Mọdopolọ, mẹdelẹ nọ pọ́n Biblu hlan taidi owe he ko dohó taun de.

Naegbọn mẹde nado yí anademẹwe hoho mọnkọ zan to aihọn he ko yinukọn to nuyọnẹn wintinwintin mẹ ehe mẹ? Na nọtẹn Intẹnẹt tọn madosọha lẹ wẹ tin he nọ to awuwlena nudọnamẹ po anademẹ yọyọ lẹ po mapote. Tito-to-whinnu televiziọn tọn lẹ nọ bẹ anademẹ lẹ hẹn sọn weyọnẹntọ lẹ, wesetọ lẹ po wekantọ lẹ po dè. Podọ owe ayinamẹ tọn lẹ sù taun to wesatẹn lẹ bo ko lẹzun ajọ́ daho de.

Po nudọnamẹ yọyọ agọe pete tọn enẹlẹ po, naegbọn mẹde nado lẹhlan Biblu—yèdọ owe he ko yin tadona sọn nudi owhe 2 000 die gbọ́n? Be homọdọdonugotọ lẹ sin owhẹ̀ ma whẹ́n nado dọ dọ owe hoho mọnkọtọn yiyizan na anademẹ taidi yíyí owe lẹnunnuyọnẹn tọn kavi anademẹwe ọdinatẹẹ tọn he ko dohó lẹ zan ya? Na nugbo tọn, nuyijlẹdonugo enẹ ma sọgbe. Lẹnunnuyọnẹn po azọ́n nuyọnẹn wintinwintin tọn po nọ yawu diọ, amọ́ be nuhudo dodonu tọn gbẹtọvi lẹ tọn ko diọ wẹ ya? Gbẹtọ lẹ gbẹ́ to gblọndo dín na nuhewutu mí do wá gbẹ̀, bo gbẹ́ to ayajẹ po hihọ́ jẹ obá de mẹ po dín, gọna haṣinṣan dagbe to whẹndo mẹ po họntọnjiji dagbe po.

Mahopọnna lehe Biblu ko dohó sọ, e gbẹ́ na gblọndo na kanbiọ enẹlẹ po devo lẹ po. E sọ dohia dọ Mẹdatọ mítọn wẹ yin dowatọ emitọn. E nọ na mí anademẹ to adà gbẹzan tọn lẹpo mẹ bo nọ gọalọna mí nado pehẹ nuhahun depope. (2 Timoti 3:16, 17) Humọ, e sọ dohia dọ anademẹ etọn nọ yọ́n-na-yizan tẹgbẹ—yèdọ ayinamẹ he ma nọ dohó gbede! Biblu lọsu dọmọ: “Ohó Jiwheyẹwhe tọn tin to ogbẹ̀.”—Heblu lẹ 4:12.

Be nugbo wẹ nuhe Biblu dọ ehelẹ yin ya? Be e ko dohó wẹ, kavi e gbẹ́ yọ́n-na-yizan hú owe devo depope, bosọ yin owe he to ogbẹ̀ nugbonugbo de wẹ ya? Lẹndai zinjẹgbonu Atọ̀họ̀-Nuhihọ́ lọ Tọn ehe tọn, he yin tintan to zinjẹgbonu vonọtaun debọdo-dego lẹ mẹ wẹ nado gọalọna we nado mọ gblọndo na kanbiọ ehelẹ.