¿Kasache wayu na aapieekana?
Susoutaka eʼipajee tü Bibliakat
Na aapieekana pülashii naya suulia wayuu (2 Pedro 2:11). Chashii naya iipünaa saashin tü Bibliakat otta nnojoishii naya shiʼrüin wayuu (1 Reyes 8:27; Juan 6:38). «Meʼrajusalii», eeshii namünüle amüin (1 Reyes 22:21; Salmo 18:10).
¿Jamakuwaʼipalii süpüla eeinjanain na aapieekana?
Nukumajala Maleiwa na aapieekana. Nukumajiraain naya nümaa Jesús, «chi Nüchon niʼirumakai». Anuu sünüiki tü Bibliakat nüchiki Jesús: «Süka niain aluwataanüin [Jesús] nütüma Maleiwa süpüla akumajaa tü kasakalüirua süpüshua chakat iipünaa je yaa mmoluʼu, tü shiʼrakat wayuu je tü nnojotkat shiʼrüin» otta na aapieekana (Colosas 1:13-17). Na aapieekana maʼwayuusesalii naya, nnojoishii kachoin naya otta nüchonnii naya Maleiwa napüshuaʼa (Job 1:6; Marcos 12:25). Akumajuushii naya waneʼewai nakua.
Eetüjüliʼiya na aapieekana süpülapünaa sukumajünüin tü mmakat. Wanaa sümaa nukumajüin Maleiwa tü Mmakat, «aʼwaatüshii sümaa naʼwatüin najapü» na aapieekana (Job 38:4-7, TNM).
¿Jeʼrashii na aapieekana?
Nnojotsü süküjain tü Bibliakat jeʼrashiin na aapieekana, shia neʼe süküjaka wattain maʼin naalii. Niʼrüin chi aluwataaushikai Juan wattashaata maʼin saalii aapieeirua (Alateetkat Mapeena [Apocalipsis] 5:11).
¿Kanüliashiiche naya otta naatawaisüche nakuwaʼipa?
Aa. Süküjain tü Bibliakat nanülia piamashii aapiee: Miguel nümaa Gabriel (Daniel 12:1; Lucas 1:26). a Eeshii waneinnua aapiee asakinnaka anain kasaichin nanülia, nnojotpejeʼe naküjain nanülia (Génesis 32:29; Jueces 13:17, 18).
Naatawai nakuwaʼipa na aapieekana otta naatawai tü jülüjakat naaʼin. Eeshii süpüla yootiraain naya namaa na waneinnua aapieekana otta naʼwaajüin Jehová (Lucas 2:13, 14; 1 Corinto 13:1). Eesü süpüla naneeküin naaʼinrüinjatüin tü kasa anasükat otta tü kasa mojusükat. Maʼaka saaʼin tü naaʼinrakat na aapiee eʼrakana wayumüin nümüin Maleiwa wanaa nümaa Satanás (Mateo 25:41; 2 Pedro 2:4).
¿Eeshiiche aapiee laülaaka naaʼu na wane aapieekana?
Aa. Nia Miguel chi sülaülakai tü aapieekalüirua (Judas 9; Alateetkat Mapeena 12:7). Eeshii na aapiee serafine münakana, kojutushii naya otta aʼyataashii naya nümülatuʼu Jehová (Isaías 6:2, 6). Eeshii waneʼeya aapiee querubine münüshii, kojutushii naya otta naya na nuluwataakana Maleiwa sünain aaʼinraa wanee aʼyatawaa. Na querubinekana naya aaʼinmajaka tü apain chajatkat Edén wanaa sümaa nüjünajaain Maleiwa Adán sümaa Eva (Génesis 3:23, 24, TNM).
¿Eeshiiche süpüla nakaaliinjain waya?
Aa. Nükaaliinjain Maleiwa na wayuukana nakajee na aapieekana. Anuu sukuwaʼipa nutuma:
Nuʼunirüin Maleiwa nakuwaʼipa na aʼyataakana nümüin nakajee na aapieekana süpüla naküjain pütchi süchiki tü Nuluwataayakat (Alateetkat Mapeena 14:6, 7). Anasü sukuwaʼipa tü naaʼinrakat na aküjakana tü pütchikat otta na aküjünakana amüin tü pütchikat natuma na aapieekana.
Naaʼinmajüin na aapieekana na anoujashiikana suulia mojuin nakuwaʼipa natuma na mojulaashiikana (Mateo 13:49).
Nuʼunirüin na aapieekana nakuwaʼipa na waneepiakana nümaa Maleiwa otta naaʼinmajüin naya (Salmo 34:7; 91:10, 11; Hebreokana 1:6-8).
Nakaaliinjeechi Jesús na aapieekana süpüla najaʼttirüin tü mojulawaakat otta tü müliaakat (2 Tesalónica 1:6-8).
¿Eeshiche wanee aapiee aaʼinmajaka waya waneʼewai wakua?
Naaʼinmajüin na aapieekana nanoula na aʼyataakana nümüin Maleiwa, nnojoipejeʼe niʼitaain Maleiwa wanee aapiee sünain aaʼinmajaa na anoujashiikana waneʼewai nakua (Mateo 18:10). b Nnojoishii nakaaliinjain na aapieekana na aʼyataakana nümüin Maleiwa sünain süpüshuaʼa tü kasa alatakat namüin otta tü ooʼulakünakalü aka naaʼin. Süküjain tü Bibliakat niiʼiyateerüin wamüin Maleiwa jamüinjatüin wojuʼitia saʼakajee müliaa. Naapeerü wamüin kekiwaa otta nükaaliinjeena waya süpüla wachecherüin waaʼin suʼunnaa müliaa (1 Corinto 10:12, 13; Santiago 1:2-5).
Pütchi nnojotka shiimain nachiki na aapieekana
Nanoujaka anain na waneinnua: Anamia napüshuaʼa na aapieekana.
Tü shiimainkat: Süküjain tü Bibliakat eein «tü yolujaa mojulaasükalüirua» otta «na aapiee kaainjalakana» (Éfeso 6:12; 2 Pedro 2:4, TNM).
Nanoujaka anain na waneinnua: Matüjainsalii outaa na aapieekana
Tü shiimainkat: Oʼutuneena aaʼin na aapiee mojulaashiikana nümaʼaleʼeya chi Yolujaakai (Judas 6).
Nanoujaka anain na waneinnua: Outapa wanee wayuu aapieeshi nia.
Tü shiimainkat: Na aapieekana nnojoishii nayain na wayuu outakana paala jee asoʼiraaka aaʼin. Nnojoishii wayuuin naya (Colosas 1:16). Na anoujashii aneekünakana süpüla chain iipünaa, eejeena naya süpüla kaʼikat süpüshuaʼa (1 Corinto 15:53, 54). Akaʼaya naya, aapüneerü namüin laülawaa noulia na aapieekana.
Nanoujaka anain na waneinnua: Akumajünüshii na aapieekana süpüla naʼyataain namüin na wayuukana.
Tü shiimainkat: Naaʼinrüin tü nümakat Maleiwa na aapieekana, nnojotsü shiain naaʼinrüin tü wamakat namüin (Salmo 103:20, 21). Nütüjaa aaʼu Jesús niainjachin Maleiwa nuchuntuin amüin kaaliinwaa, nnojoishii nayainjanain na aapieekana (Mateo 26:53).
Nanoujaka anain na waneinnua: Eeshii süpüla woʼuraajüin namüin na aapieekana.
Tü shiimainkat: Müleka woʼuraajüle, waʼwaajüin chi woʼuraajakai amüin. Makalaka niainjachin waʼwaajüin neʼe Maleiwa nümüiwaʼa (Alateetkat Mapeena 19:10). Wanaa sümaa woʼuraajüin, niainjachi neʼe woʼuraajaka amüin Maleiwa sükajee nünülia Jesús (Juan 14:6).
a Suluʼu waneirua Biblia, ashajünüsü tü pütchikat Lucifer suluʼu Isaías 14:12. Saashin waneirua wayuu, tia pütchikat shia tü nünüliakat Satanás, chi aapiee eʼrüijaakai wayumüin. «Chi kawaralakai» maluʼulu tia pütchikat suluʼu hebreo. Suluʼu Isaías 14:12, nnojoishi niain aashajaanüin achiki Satanás, naya aashajaanaka achiki nooʼuliwoʼu na aluwataakana saaʼu Babilonia, tü pueulo eʼrüinjatkat japülii nutuma Maleiwa saaʼujee yaletüin saaʼin (Isaías 14:4, 13-20). Tü aküjüneekalü achiki süka tü pütchikat «chi kawaralakai» shia neʼrüin japülii nooʼuliwoʼu na aluwataakana saaʼu Babilonia.
b Naashin waneinnua wayuu, eeshi wanee aapiee aaʼinmajawaika Pedro. Müsü nanüiki süka isain Pedro suluʼujee tü kaatsetkat (Aluwataaushikana 12:6-16, TNM). Wanaa sümaa nuʼunuin Pedro sünain anaʼlawaa namüin na anoujashiikana, naküjain nümüin neʼrüin «chi aapiee aaʼinmajakai nia». Eesüjaʼa süpüla müin nanüiki süka nüntayaain naaʼinruʼu chi aapieekai sünain aapiraa nüchiki Pedro.
Eesüjaʼa kamalainjeerüle pümüin aashajeʼeraa tüü
SUSOUTAKA EʼIPAJEE TÜ BIBLIAKAT
¿Jarai chi Miguel münakai?
Eesü wane nünüliaya eeka süpüla piʼrajüin.
AAPIRIA WAYUU
¿Eeshiche wane aapiee aaʼinmajakai pia waneepia?
¿Shiimainche naaʼinmajüin pia wanee aapiee?
SHIKIRAJAKA ANAIN TÜ BIBLIAKAT
Jamüsü sukuwaʼipa tü ekirajawaakat
Pikirajaa sünain tü Bibliakat, nnojoishi awalaajüinjachin pia.