PÜTCHI SÜNAINKA SÜTA TÜ REWIISÜTAKAT
¿Jaralii na aküjüliikana pütchi nüchiki Jeʼwaa?
«Kakaliaichi teʼraajüin Mike. Anoujashi nia nünain Jeʼwaa. Wainmajüsü taaʼin saaʼu tü iküleesia nuʼunakalü aluʼu. ‹¿Jaraiche chi Jeʼwaa naashajaakai achiki? ¿Jamüshii nnojoliika naainjain miʼiraa shikiira wanee kasa?›, maa müsü taaʼin taleʼeruʼu. Ayoʼujaasü taaʼin naaʼu Mike müleka sümaale nia wayuu mojulaasü.» (Becky, chejeʼewat California, Estados Unidos)
«Wanaa sümaa nekirajüin na aküjüliikana pütchi nüchiki Jeʼwaa wanee wayuuirua teʼraajüin, ‹¿Jaraliiche naya? ¿Jaratche keʼinaajalaka sünülia tü iküleesia noʼunakalü anain?›, mapuʼushi taya.» (Zenon, chejeʼewai Ontario, Canadá)
«Antapuʼushii na aküjüliikana pütchi tepialuʼumüin. Antayaashii taaʼinruʼu shiiʼiree naapülijüinjachin taya sümaa taʼwayuuse süka nnojoliin woʼunüin suluʼu wanee iküleesia. ‹Wanaawasü süpüshuaʼa tü iküleesiakalüirua, jaʼitakajeʼe na aküjüliikana pütchi, nnojoleena waya nekirajüin nüchiki chi Maleiwakai›, mapuʼushi taya.» (Kent, chejeʼewai Washington, Estados Unidos)
«Nnojotpuʼusü taapüin nachiki na aküjüliikana pütchi.» (Cecilie, chejeʼewat Esbjerg, Dinamarca)
Eeshiijaʼa piʼrüinnale na aküjüliikana pütchi sünain aküjaa pütchi sainküin piichi, kaayeruʼu, sünain neitajüin karalouktairua jee sünain nekirajüin wayuu sünain tü Wiwüliakat. Eeshiijaʼa süpüla nayain aapüin pümüin karalouktakat tüü. «¿Jaraliiche na aküjüliikana pütchi nüchiki Jeʼwaa?», eesüjaʼa maa müle paaʼin.
¿Pütüjawee aaʼu kasain nanoujain anain? ¿Pütüjawee aaʼu jalejeekualüin napüla tü nneerü nawalaajakalü aka tü naʼyataainkat jee müsia tü piichi outkajaalee nakumajakat? ¿Pütüjawee aaʼu jamüin nantawaika pipialuʼumüin sünain aküjaa pütchi jee jamüin naküjaka pütchi kaayeruʼupünaa?
Anuu sünüiki Cecilie: «Teʼrajaain suluʼu Internet kasain aküjünüin nachiki na aküjüliikana pütchi nüchiki Jeʼwaa. Taapüin nachiki sünain wainmain kasa mojusü naainjaka. Suluʼujee tia, nnojotsü taya arütkaweein nanainmüin». Shiasaʼa saashajaapa tia wayuukot namaa na aküjüliikana pütchi, shiyaawata aaʼu alawaain tü aküjünakat nachiki sümüin.
Pütüjaweere saaʼu tü naainjakat na aküjüliikana pütchi nüchiki Jeʼwaa, paashajaa namaa. Naya kakumalaka rewiisütakat tüü jee müsia naküjeerü pümüin tü pütüjaweekalü aaʼu nachiki (Proverbios 14:15). Wekirajaa sünain jaraliin na aküjüliikana pütchi nüchiki Jeʼwaa, kasain nanoujain anain otta kasain naʼyataain anain.
