1. Mayaainjeʼe nüchepchiain Maleiwa na anoujüshiikana, ¿jamüsü naataka nakuwaʼipa noulia na wanee achepchieekana?

NÜCHEPCHIA Maleiwa na anoujüshiikana otta aishii naya nüpüla. Na wayuu achepchieekana maaʼulu müliashii otta mojutsalii atumawaa. Aluʼusaʼa na achepchiee saashajaakana achiki tü Wiwüliakat, achepchieeshii naya süka naaʼin namüiwaʼa süka anamiain maʼin chi Nalaamainkai. Naashin Pablo, nüchepchiainnapa Maleiwa na anoujüshiikana otta aʼyataainjana naya nümüin süka alin nia napüla (Roma 6:22). ¿Kasa sünainpünaaka nüchepchiain Maleiwa na anoujüshiikana? ¿Kasa waainjüinjatka suulia nüchepchiain waya Satanaa? ¿Kasa neʼreetka na achepchiee jüüjüükana waneepia nümüin Jeʼwaa?

2. (1) ¿Jamüshii eeka na achepchiee makateekana nümaa nalaamain? (2) ¿Jamüsü süsotünüinjatka nücheʼe chi achepchieekai?

² Sünainjee tü pütchi naapakat Jeʼwaa nümüin Moisés, watüjaa aaʼu alin nüpüla Maleiwa na nüchepchiakana. Sülatapa aipirua juya sünain achepchieein wanee judío, ajütünüinjachi nia nutuma chi nülaamainkai (Éx. 21:2). Shiasaʼa müin aire nüpüla chi nülaamainkai otta niʼyataweere nümüin, aainjünüinjatü wanee kasa nüka saashin tü pütchi aapünakat nümüin Moisés. Naapaainjachi nia chi nülaamainkai, niʼitaainjatü tü nücheʼekat sünain wanee piichoʼu süpüla nüsotuinjatüin shia süka wanee utia (Éx. 21:5, 6). ¿Jamüsü süsotünüinjatka nücheʼe chi achepchieekai? Süpüla noonooinjachin waneepia nümaa chi nülaamainkai otta niʼyataainjachin nümüin. ¿Kasa shikirajaka anain waya tia? Süka waapüitpain waaʼin nümüin Jeʼwaa, oonooinjana waya nümaa süka alin nia wapüla.

3. ¿Jamüshii waapaka waaʼin nümüin Maleiwa?

³ Süpüla woutiisainjanain waya, waneeküin nüchepchiainjanain waya Jeʼwaa. Waapüin waaʼin nümüin süka woonoweein nümaa süka süpüshuaʼa waaʼin otta süka waainjeein tü nüchekakat. Nnojotsü jaralüin apüleeruain waaʼin süpüla  waapüinjatüin waaʼin nümüin Jeʼwaa. Na tepichikana naapüin naaʼin nümüin Jeʼwaa süka naaʼin namüiwaʼa; nnojotsü shiain süka aneein naya namaa na kachonniikana naya. Waapüin waaʼin nümüin Jeʼwaa süka alin nia wapüla. Pansaasü tia sümaa tü sümakat 1 Juan 5:3, maka mayaa: «Müleka waaʼinrüle tü nuluwataakat anain waya chi Maleiwakai, shiimüin alin nia wapüla».

4. ¿Jamakuwaʼipalii nüchepchiain waya Maleiwa «süpüla aaʼinraa tü kasa anasü nüchekakat»?

⁴ ¡Talatüsü maʼin waaʼin sutuma nüchepchiain waya Jeʼwaa! Süka wanoujüin sünain naakajirüin waya Jesuu, taashishii waya suulia tü kaainjalaakat. Mayaainjeʼe ayatayülüinya isain wachiki lotuin wakuwaʼipa, wacheka achikirü nuluwataain waaʼu Jeʼwaa nümaa Jesuu. Pansaasü süchiki tia nutuma Pablo, müshi nia: «Süka ouktüichipain Cristo saaʼu saainjala wayuu, [...] anakaja jiyaawatüle saaʼu sünain taashiinapain jia suulia süchepchiaa kaainjalaa». Süchikijee, naapiraka waya suulia wanee kasa: «Soto jaaʼin wane kasa. Müleka jaapajiraale jukuaippa nümüin wane wayuu süpüla nüchepchiainjanain jia, nieechi jülaamainka. Akaajaa müleka jaapajiraale jukuaippa sünain aaʼinraa kasa mojusü, süchepchieena jia kaainjalaa, je oukteena jia saaliijee. Aluʼujasa müleka jaapajiraale jukuaippa nümüin Maleiwa süpüla jüüjüüinjanain jia nümüin, loteerü jukuaippa nuʼupala. Taapüin analuʼut nümüin chi Maleiwakai jaaʼu. Süchepchiapüʼüshii jia kaainjalaa paalainka. Je jooluʼu, oonooshii jia süka süpüshua jaaʼin sümaa tü shiimüin ekirajünakat anain jia maaʼulu yaa. Taashiinapa jia suulia süchepchiaa kaainjalaa. Nüchepchiainapa jia Maleiwa süpüla aaʼinraa tü kasa anasü nüchekakat jüpüleerua» (Roma 6:10, 11, 16-18). Müshi Pablo: «Oonooshii jia süka süpüshua jaaʼin». Süka waapüin waaʼin nümüin Jeʼwaa, keeʼireesü waaʼin woonooin nümaa Jeʼwaa süka süpüshuaʼa waaʼin. Süka lotuin nukuwaʼipa, «nüchepchiainapa [waya] süpüla aaʼinraa tü kasa anasü nüchekakat».

5. ¿Kasa eejiraaka amaa waya? ¿Jamüshii eejiraainjanaka waya sümaa tia?

⁵ Ayateere waya nüchepchiain Jeʼwaa, eesü piamasü kasa eejiraainjanaka amaa waya. Tü palajatkat shia tü nümakat Pablo: «Tacheküin taaʼinreein tü kasa anasü nuluwataakat anain Maleiwa, süka shiiʼiranajaaitpain takuaippa nütüma. Otta müleka shiimüinre tia, ¿jamakaʼa taneekakaʼa waneepia aaʼinraa tü kasa mojusükat? Shia süka taleʼeruʼuin kaainjalaa. Je sükajee tüü, müsü aka eekai wane atkawaa sütüma tü takuaippa jeketkat. Je müshi aka kapükai taya, süka nnojolüin tountüin taaʼinrüin tü anasükat» (Roma 7:22, 23). Süka waleʼeruʼuin tü kaainjalaakat, eejiraainjana waya waneepia suulia waaʼinrüin kasa mojusü. Mayaainjeʼe taashin waya nutuma Maleiwa, sotuinjatü waaʼin nüchepchiain waya (1 Ped. 2:16, NM).

6, 7. ¿Kasa naainjaka Satanaa süpüla anain maʼin nutuma shiyolojo tü kasakalüirua?

⁶ Tü wanee kasa eejiraainjanakalü amaa waya shia tü kasa nuluwataakalü aaʼu Satanaa. Nüchajaa akuwaʼipat Satanaa süpüla weʼrüinjanain wayumüin nümüin Jeʼwaa. Nüchepchieeshii waya Satanaa makalaka nuuʼulaküin waaʼin (paashajeʼera Éfeso 6:11, 12). Anasü maʼin shiyolojo tü kasakalüirua nutuma shiiʼiree nimeejüin waya. Müshi chi aluwataaushikai Juan: «Nnojo keejiain jümüin tü kasa mojusü naaʼinrakat na manoujainsaliikana. [...] Chi wayuu eekai nüshateein nakuaippa na manoujainsaliikana, maalinsai Maleiwa nüpüla je nnojoleerü naaʼinreein tü nüchekakat nüpüleerua. Tü nakuaippakat na manoujainsaliikana, nnojotsü niʼikalain chi Maleiwakai namüin. Tü kasa mojusü naaʼinrakat, keejiasü namüin süka kaainjaraliin naya. Keeʼireesü naaʼin kaainjalaa. Nachuntüin naaʼin tü neirakaakat amüin je aʼwaatawaa suluʼu nawashirüin ooʼulaka suluʼu tü naaʼinrakat» (1 Juan 2:15, 16).

⁷ Tü noʼunakalü achiirua na wayuukana, shia washirüinjanain naya. Naashin Satanaa, shia aapaka neʼe talataa aaʼin tü nneetkat. Shia eeʼiyatünaka namüin na wayuukana wainmainjatüin nawashirüin otta namaʼanainjatüin wainma kasa.  Shia keeʼireeka naaʼin Satanaa weʼrajüin sukua miʼiraa otta yonna wanaa namaa na manoujüinsaliikana. Shia ootunaka anain waya wanaawainjatüin wakuwaʼipa namaa na manoujüinsaliikana.

8, 9. ¿Kasa eeka süpüla sülatüin wamüin? ¿Jameerü wakuwaʼipa sülatüle wamüin tia?

⁸ Müshi chi aluwataaushikai Pedro nachiki na anoujüshii wanaawakana akuwaʼipa namaa na manoujüinsaliikana: «Aʼwaataashii maʼi na ekirajüliikana sünain alawaa suluʼu nakuaippa süka pütchi naleʼeruʼujeejatü noʼupala na wayuu ajuittüinapakana naʼakajee na manoujainsaliikana. Shiiʼiree kachiiruain naaʼin süchiki kaainjalaa na anoujashiikana natüma, aʼwaataashii noʼupala, süka pütchi eekai kemeʼeriain, suluʼu tü kasa saaʼinrakat wayuu kaainjarannuu. Na ekirajüliikana sünain alawaa, jaʼitaina nayaʼinya neʼe süchepchiain tü kaainjalaakat, ekirajüshii naya wayuu sünain laülawaa namüiwa süpüla aaʼinraa eekai nacheküin. Naʼalain neʼe tü namakat. Maa aka wane wayuu eekai naapajiraain nukuaippa süpüla aʼyatawaa nümüin nülaamain, akaajaa na ekirajüliikana sünain alawaa sünain süchepchiain kaainjalaa süka naapajiraain nakuaippa sünain aaʼinraa waneepia kasa mojusü» (2 Ped. 2:13, 18, 19).

⁹ Woʼunüle süchiirua tü weirakaakalü amüin, nüchepchieena waya chi Yolujaakai (1 Juan 5:19). Eeshii süpüla süchepchiain waya tü keeʼirewaakalü aaʼin washirüü. Süchepchiapa waya, nnojoleena waya süjütüin.

10, 11. ¿Jaralii na jemetakana maʼin nümüin Satanaa? ¿Jamüsü mojeetka nukuwaʼipa wanee anoujüshi nikirajaale suluʼu wanee eʼikülee miyoʼu?

¹⁰ Naya jooka nüpüla Satanaa na isakana achiki nayaawatüin saaʼu nakuwaʼipa. Alatüsü tia sümüin Eva. Maaʼulu yaa, naya jemetaka maʼin nümüin Satanaa na jimaʼaliikana otta na majayünnüükana. Niyoukta achikirü Satanaa, naapüin naaʼin wanee jintüi nümüin Maleiwa süpüla nüchepchiain nia. Shia nüchajaaka achiki Satanaa niʼrüinjachin wayumüin wanee wayuu aapakai naaʼin nümüin Maleiwa.

¹¹ Jülüja waaʼin nukuwaʼipa chi achepchiee anakai amüin süsotünüin nücheʼe. Aisü shia nümüin süsotünaiwaʼaya, shiasaʼa mapa alatüsü tü saaliikat. Shiaʼala neʼe apütaaka tü süchikanainkat utia. Eesü kapüleere nümüin wanee jintüi naatain nukuwaʼipa noulia na koleejiajiraakana nümaa. Tü jülüjakat saaʼin wayuu nutuma Satanaa, shia nnojoluin kasain aapüin talataa aaʼin sümüin wayuu suulia ekirajawaa suluʼu eʼikülee miyoʼu. Aluʼusaʼa wayakana anoujüshiikana, shia waaʼinmaaka tü wakuwaʼipakat nümaa Maleiwa. Müshi Jesuu: «Anataʼaleeshiijaʼa maʼi jia eʼrakana  sünain cheʼojaain chi Maleiwakai jümüin» (Mat. 5:3). Na wayuu aapakana aaʼin nümüin Maleiwa, nnojoishii nüchepchiainjanain Satanaa. Shia kojutka namüin tü nünüikikat Jeʼwaa, naaʼinmaasü shia soʼukai jee saʼwai (paashajeʼera Salmo 1:2 *). Nikerotüle wanee anoujüshi sünain ekirajawaa suluʼu eʼikülee miyoʼu, iseerü nüchiki naaʼinmaain tü nukuwaʼipakat nümaa Jeʼwaa.

12. ¿Kasa naneeküinjatka na jimaʼaliikana otta na majayünnüükana?

¹² Müshi Pablo namüin na anoujüshii chajanakana Corinto: «Piuunale jia wanaa sümaa jeenakünüin, nnojo mojuin jaaʼin sütüma tia. Otta müleka saapünüle taashii jümüin nütüma chi kachepchiakai jia, oʼuneenaja nümaʼanajee» (1 Cor. 7:21). Nükalioʼu Pablo, eejana na anoujüshii achepchieekana otta müliashii naya natuma na nalaamainkana. Makalaka naashajaain Pablo süchiki analeeinya nnojoliire achepchieein waya. Suluʼu wainma mma, achuntünüsü namüin na tepichikana koleejiainjanain naya. Miyoʼupa naya, naneeküinjatü tü keeʼireekat naaʼin, eesü süpüla naneeküin naʼyataain waneepia nümüin Maleiwa. Nnojotpejeʼe motuinjatüin naaʼin wanee kasa: naneeküle ekirajawaa suluʼu wanee eʼikülee miyoʼu, nnojoleerü taashin nakuwaʼipa süpüla aʼyatawaa waneepia nümüin Maleiwa (paashajeʼera 1 Corinto 7:23).

13. ¿Kasa anaka süpüla nekirajaain anain na anoujüshiikana?

¹³ Müshi Pablo namüin na anoujüshii chajanakana Colosas: «Kamalainchonsü maʼi nanüiki na aküjüliikana alawaa jümüin. Jalia jia jükanajuʼulaajayaa sütüma tü namakat. Tü nekirajakat anain, pütchi alawaa neʼe, naleʼeruʼujeejatü neʼe, shia tü shikirajapüʼukat anain tü natuushi manoujainsatkalüirua. Nnojotsü müin aka tü pütchi shiimüin nüküjakat Cristo wamüin» (Col. 2:8). Tü nekirajakalü anain na atüjüshiikana maʼin, pütchi alawaa neʼe otta naleʼeruʼujeejatü neʼe. Tü aainjünakat suluʼu wanee eʼikülee miyoʼu, shia saapünüin diploma namüin na wayuukana. Mayaainjeʼe profesionaalüin naya, nnojotsü kasain natüjaain aaʼu. Aluʼusaʼa na aʼyataakana nümüin Jeʼwaa, ekirajaashii süchiirua wanee kasa akaaliinjaka naya süpüla naʼyataain nümüin Maleiwa. Pansaasü maʼin nakuwaʼipa sümaa tü nümakat Pablo nümüin Timoteo: «Eekai keisalain sümüin nukuaippa nuʼupala Maleiwa, müleka talatüle naaʼin sümaa tü nüchekakat Maleiwa nüpüleerua, anashaatasü maʼi tia. Je maaʼulu yaa, müleka eere tü wekakat, eere washeʼin, talatüinjana waya sümaa tia» (1 Tim. 6:6, 8). Nnojotsü naaʼinmaain  na anoujüshiikana wainmainjatüin diploma namaʼana. Shia naaʼinmaaka nakaaliinjüin wainma wayuu süpüla nanoujüinjanain nünain Maleiwa (paashajeʼera 2 Corinto 3:1-3).

14. ¿Jamüsü nünüiki Pablo suluʼu Filipos 3:8 süchiki nüchepchiain nia Maleiwa nümaa Kürisüto?

¹⁴ Jülüjataa paaʼin jooluʼu nukuwaʼipa chi aluwataaushikai Pablo. Ekirajünüshi nia nutuma Gamaliel, wanee eʼiküi sünain tü karaloukta nüchikimaajatkat Maleiwa. Tü ekirajünakalü anain Pablo, meematsü aka saaʼin tü ekirajünakalü anain wayuu suluʼu wanee eʼikülee miyoʼu. ¿Jamüsü nünüiki süchiki tü nikirajaakalü anain ooʼulaka süchiki nüchepchiain nia Maleiwa nümaa Kürisüto? Müshi nia: «Ooʼulaaichipa taya suulia kachiiruaa aaʼin süpüshua tü kasa taʼwaataapüʼükat aluʼu. Müitpa aka saaʼin wane shiʼyarüla mma tamüin. Chi kachiiruakai jooluʼu taaʼin, nia Cristo» (Filip. 3:8). Jiakana jimaʼaliikana otta majayünnüükana; jiakana kachonshiikana, jülüja jaaʼin tü nümakat Pablo süpüla jütüjaain saaʼu tü jüneeküinjatkat (piirakaa sümüin tü ayaakuaakat).

15, 16. ¿Kasa ekirajünaka anain waya sutuma nupueulose Jeʼwaa? ¿Kasapülajatü tü ekirajünakalü anain waya?

¹⁵ ¿Kasa aainjünaka suluʼu wanee eʼikülee miyoʼu? Shia weʼraka tü aʼülüjirawaakat ooʼulaka tü atkawaakat süchiirua wanee kasa. Eesü amaʼüjirawaa akuwaʼipa otta waneeirua kasa yarüttüsü (Éf. 2:2). Naata sukuwaʼipa nupueulose Jeʼwaa, ekirajünüshii waya suluʼu nupueulose Jeʼwaa süka anaka akuwaʼipa. Ekirajünüshii waya semaanawai sünain tü outkajawaakat Ekirajawaa süpüla Aküjaa Pütchi. Eesü wanee ekirajawaa napülajatka na tooloyuu maʼwayuusekana sümaa pürekutsoolüin naya (Ekirajawaa sünain tü Wiwüliakat napüla na Tooloyuu Maʼwayuusekana). Otta wanee ekirajawaa napüla na kaʼwayuusekana sümaa pürekutsoolüin naya (Ekirajawaa sünain tü Wiwüliakat napüla na Anoujüshii Kaʼwayuusekana). Tü nikirajakalü anain waya Jeʼwaa, süpülajatü woonooin nümaa.

¹⁶ Eeshii süpüla wekirajaain sünain wainma kasa suluʼu Índice de las publicaciones Watch Tower otta suluʼu Watchtower Library. Süpüshuaʼa tü kasa ekirajünakalü anain waya süpülajatü waʼwaajüin Jeʼwaa otta süpülajatü wakaaliinjüin na wayuukana süpüla anajiraain naya nümaa Maleiwa (2 Cor. 5:20). Otta na anajiraakana nümaa Maleiwa, ekirajeena wainma wayuu (2 Tim. 2:2).

17. ¿Kasa neʼraka na aneekakana nekirajünüin nutuma Maleiwa?

¹⁷ Aashajaashinka Jesuu nachiki waneeinnua achepchiee, na jüüjüükana nümüin chi laamakai, anasü nünüiki namüin otta nuluwataain naya sünain waneeirua aʼyatawaa (paashajeʼera Mateo 25:21, 23). Woʼunüle süchiirua wekirajaain sünain tü kasa nüchekakat Maleiwa, talateerü waaʼin otta weʼreerü wainma kasa sünainjee. Anuu süchiki tü alatakat nümüin Michael; tütüshi maʼin nia sünain koleejiaa. Makalaka nuunejaanüin sünain wanee outkajawaa süpüla naashajaain süchiki tü nikirajaainjatkalü anain suluʼu wanee eʼikülee miyoʼu. Nüküjaka Michael nikirajaainjachin wanee kasa jaloulinjatka nümüin süpüla nipijaainjachin. Aʼyataamaatüshi nia sutuma tü nikirajaakalü anain sümaa pürekutsoolin nia. ¿Mojusüche naaʼin sutuma nnojolin nuʼunüin suluʼu wanee eʼikülee miyoʼu? Müshi nia: «Anashantasü tü tekirajaakalü anain sutuma pürekutsoolin taya otta sutuma laülaashin taya suluʼu tü outkajaaleekat. Wainma tü kasa teʼrakat nutuma Jeʼwaa otta wainma tü kasa taʼyataakalü anain nümüin. Alanaʼaleesia sünain anain tia suulia tü nneerü eekat süpüla takanajüin. Talatüsü maʼin taaʼin süka nnojolin toʼunüin suluʼumüin wanee eʼikülee miyoʼu».

18. ¿Jamüsü watüjaaka saaʼu shiain anain maʼin tü nikirajakalü anain Maleiwa?

¹⁸ Anashaatasü tü nikirajakalü anain waya Maleiwa süka sükaaliinjüin waya süpüla waʼyataainjanain nümüin. Otta sükaaliinjüin waya süpüla waainjüinjatüin tü keeʼireekat naaʼin. Sükaaliinjüin waya süpüla waʼatapajüinjatüin wojuʼitinnüin suulia waainjala (Roma 8:21). Otta sükaaliinjüin waya süpüla weeʼiyatüinjatüin nümüin chi Walaamainkai alin maʼin nia wapüla (Éx. 21:5).