Nnojoire niain Maleiwa kasirüin tü kasa mojusükat, ¿jamakaʼa wainmaka maʼin wayuu müliaka sutuma jamü jee sutuma nnojoluin kasain eein sümaʼana? ¿Jamüsü wainmaka maʼin atkawaa, ayuulii, süsetaka wüin jee sukutkujaaka mma? Saashin tü Wiwüliakat, müliasü wayuu sünainjee apünüinsü kasa:

1. Sutuma eein na kapülakana aaʼin nakuwaʼipa neʼe namüiwaʼa, kachiiruakana aaʼin washirü jee üttakana aaʼin. «Na wayuukana aluwataashii naaʼu na waneinnua süpüla namojujain nakuwaʼipa» (Eclesiastés 8:9). Müliasü maʼin saaʼin wayuu sutuma müliain naya atumawaa jee sükajee eein na kapülakana aaʼin nakuwaʼipa neʼe namüiwaʼa.

2. Sutuma sülatalaʼa sümüin kasa mojusü. Süküjainya tü Wiwüliakat müliain wayuu süka «sülatalaʼa sümüin kasa mojusü sümüin wayuu süpüshuaʼa» (Eclesiastés 9:11). Jamüshijaʼa pasiruwaale wanee wayuu, eesü shiale neʼe süka wanaajirain nia sümaa tia otta shialejeʼe süka nnojoluin eejüin naaʼin.

3. Sutuma nuluwataain chi Yolujaakai saaʼu wayuu sainküin mmakat. Süküjain tü Wiwüliakat süchiki jaralin kasirüin tü müliaakat, müsü shia: «Tü wayuu manoujainsatkalüirua suluʼu mmakat süpüshua, nia aluwataaka saaʼu chi Yolujaakai» (1 Juan 5:19). Chi Yolujaakai, nia Satanaa wanee meʼrujusai pülakai maʼin, niapuʼushi wanee aapiee anamiakai nümaiwa, akatsaʼa «niyouktüin tü shiimüinkat» (Juan 8:44). Watta naalii na aapiee wanaawakana aaʼin nümaa Satanaa. Eʼrüshii wayumüin naya nümüin Maleiwa süka shiain naaʼinreein amüin tü kasa suchuntaakat naaʼin jee yolujaa münüshii naya suluʼujee tia (Génesis 6:1-5, TNM). Suluʼujeereʼeya niʼrüijaain wayumüin Satanaa sümaa tü yolujaakalüirua nümüin Maleiwa, naaʼinrirüin wayuu watta maʼin saalii kasa mojusü jee mojuleeitpa maʼin tü kasa naaʼinrakat maaʼulu. Jashichishi maʼin chi Yolujaakai maaʼutpünaa otta niʼikeʼerüin wayuu sainküin mmakat süpüshuaʼa, müsüjeseʼe sümüin tü Wiwüliakat: «Jia kepiakana sainküin mmakat süpüshuaʼale, müleʼo maʼi tü müliaa jiʼreetkat» (Alateetkat Mapeena 12:9, 12). Mojulaashaatashi maʼin Satanaa otta talatüshi maʼin nia müliale wayuu niʼrüin. Nia kasitka süpüshuaʼa tü kasa müliakat maʼin atuma wayuu, nnojoishi niain Maleiwa kasirüin tia.

JÜLÜJA PAAʼIN TÜÜ: Chi müliakai atuma wayuu maainjalasat, nia chi eekai mojulaashaatain maʼin. Nnojotpejeʼe müin nukuwaʼipa Maleiwa, müsü tü Wiwüliakat nüchiki: «Aipürai maʼin wayuu Maleiwa» (1 Juan 4:8, TNM). Müsüjeseʼe nnojoluin süntapünaain suluʼu wekii naaʼinrajatüin Maleiwa wanee kasa mojusü jee nnojotka lotuin akuwaʼipa (Job 34:10).

Mayaapejeʼe müin tia, eeshijaʼa pümüle: «¿Jamüsüche nuuʼulaka Maleiwa ayatüin naaʼinrüin Satanaa kasa mojusü?». Watüjaaitpa saaʼu nüʼürülain Maleiwa tü kasa mojusükat jee aisü nümüin müliale waya niʼrüin. Saashin tü Wiwüliakat, waküjainjatü nümüin Maleiwa süchiki tü kasa shapaakalü atuma waaʼin, süka jamüin, kapülain naaʼin wakuwaʼipa (1 Pedro 5:7, TNM). Süka pülain maʼin Maleiwa jee alin waya nüpüla najaʼttireerü tü müliaakat, wekirajaajeerü anain tia sünain tü wane pütchikat. *