Nnojoire anain wanee waʼaleewain suluʼu nikii, eesüjaʼa nnojorüle watüjaain saaʼu tü waaʼinrajatkat süpüla wakaalinjain nia. Eepejeʼe süpüla wamüliajüin naaʼin soʼunnaa tü alatakat nümüin. ¿Kasa waaʼinrajatka süpüla wountuin tia?

«Anasü jülüjale maʼin jaaʼin tü münakat jümüin» (SANTIAGO 1:19, TNM).

Wanee sukuwaʼipa süpüla wakaalinjain wanee waʼaleewain shia waapajüle nünüiki yooteepa nia. Nnojo shapaain paaʼin saaʼu tü püküjeekat nümüin, tü jülüjeetkat paaʼin shia nütüjaain saaʼu paapajeein nünüiki jee pümüliajeein naaʼin. Piyaawata saaʼu jamüin makaʼa naaʼin otta nnojo piyoujain nia. Eesüjaʼa airuʼurule nünüiki pümüin chi paʼaleewainkai jee mojeerüle naaʼin saaʼujee tü nümakat pümüin (Job 6:2, 3).

«Jümüliala naaʼin na mojukana aaʼin» (1 TESALÓNICA 5:14, TNM).

Eesüjaʼa shapaale naaʼin chi paʼaleewainkai jee süntajaale nikiiruʼumüin nnojolin kasain anain apüla nia. Müsüjeseʼe anain püküjale nümüin alin nia püpüla. Paaʼinrüle tia, pümüliajeerü naaʼin jee pükatsüinreerü naaʼin mayaainjeʼe nnojoluin pütüjaain saaʼu jamüinjatüin sukuwaʼipa pünüiki nümüin.

«Shiimainre alin nüpüla naʼaleewain wanee wayuu, aishi nia nüpüla waneepia» (PROVERBIOS 17:17).

Püküja nümüin pükaalinjeein nia. Püsakira nia palajana kasain akaalinjüneein anain nia. Eesüjaʼa kapüleere nümüin chi paʼaleewainkai nüküjain  pümüin kasain choʼujaain nümüin. Mülejeʼeya nukuwaʼipa, eesü süpüla püküjain waneirua kasa eeka süpüla paainjain nümaa, maʼaka saaʼin juwaraijaain. Püküja nümüin eein süpüla piyaʼlajüin kasa nümüin choʼujaale shia nümüin, eein süpüla pipitajüin nipia jee shiale waneirua kasa (Galacia 6:2).

«Nnojo jaashichijaain sümüin wayuu» (1 TESALÓNICA 5:14, TNM).

Eeshijaʼa nnojoire yooteein chi paʼaleewainkai pümaa. Püküja nümüin eein süpüla neenajüin pia yooteepa nia pümaa. Sutuma ayuulin nia, eesüjaʼa naaʼinreerüle wanee kasa mojeetka pümüin jee shiale airuʼuluin nünüiki pümüin. Eesüjaʼa nuwüinjeʼerüle tü naaʼinreekalü pümaa jee jashichire nia pümüin. Pükaalinjapa chi paʼaleewainkai, nnojo jashichin pia nümüin jee pümüliala naaʼin (Proverbios 18:24).

Anuu sünüiki Farrah a: «Takaalinjamaatüin tü taʼaleewainkat suchuntule tamüin kaalinwaa. Mayaainjeʼe nnojoluin eein süpüla tanouteʼerüin süpüshuaʼa tü alatakat sümüin, eesü süpüla taapajüin sünüiki. Eesüjaʼa shiale neʼe choʼujaain saapajünüin sünüiki süpüla anain saaʼin» (tü saʼaleewainkat nnojotsü ekeein sutuma shapaain maʼin saaʼin).

Anuu sünüiki Ha-eun: «Eesü wanee taʼaleewain aaʼinmaaka waneepia kasa anasü otta kamaneesü maʼin shia tamüin. Soʼu wanee kaʼi seenajaain taya shipialuʼumüin jee suʼlakajaaka tayaaluʼu wanee eküülü jemetüsü maʼin. Süka anain taaʼin sümaa, taküjain sümüin tü suluʼukat taaʼin. Sükatsüinrüin maʼin taaʼin soʼu tia» (ayuuisü Ha-eun sutuma tü depresión clínica münakat).

Anuu nünüiki Jacob: «Nnojoishii jashichijaamaatüinjanain waya namüin na ayuuikana. Saainjapa tü taʼwayuusekat wanee kasa mojuka tamüin, tayaawata aaʼu müinña sukuwaʼipa sutuma tü ayuulii sünainkat. Nnojoishi jashichin taya sümüin jee tamülialüin saaʼin» (ayuuisü tü nuʼwayuusekat sutuma tü depresión clínica münakat).

Anuu nünüiki Enrico: «Sükaalinjain maʼin taya tü taʼwayuusekat jee sümülialüin taaʼin choʼujaapa sümüliannüin taaʼin. Shapaapa maʼin taaʼin shiʼrüin, nnojotsü süpüleeruain taaʼin shiiʼiree taaʼinrüin waneirua kasa nnojotka taaʼinreein amüin. Süka sükaalinjeein maʼin taya, eesü suuʼulaale suulia saaʼinrüin waneirua kasa kamalainka sümüin. Kamaneesü maʼin shia. Aisü maʼin shia tapüla» (ayuuishi nia sutuma shapawaa aaʼin).