Nia Adán kooʼuliwoʼuka wayuu süpüshuaʼa. Müshiijeseʼe aijiraainjanain otta paaʼinwajiraainjanain waya, nnojotpejeʼe müin sukuwaʼipa wayuu maaʼulu. Nnojotsü keeʼireein naaʼin Maleiwa müinjatüin sukuwaʼipa wayuu.

«Anasü aire püpüla wayuu süpüshuaʼa maʼaka alin pia püpülajiraa» (LEVÍTICO 19:18).

«Anashii aire jüpüla na jüʼünüükana» (MATEO 5:44).

Aküjünüsü suluʼu 1 Corinto 13:4-7 tü waaʼinrajatkat shiimainre alin wapüla wayuu.

Nnojoleerü akulajaain waaʼin sünain kamanewaa.

Jülüja paaʼin tüü: ¿Jamüsü paaʼin kamaneere wayuu pümüin otta nnojoliire jashichin naya mojule wanee kasa putuma?

Nnojoleerü achunjain waaʼin.

Jülüja paaʼin tüü: ¿Jamüsüjeʼe paaʼin müleka püliʼrajünüle waneepia sutuma wayuu otta suchunjale naaʼin paaʼu?

Nnojoleena waya jeʼiyein.

Jülüja paaʼin tüü: ¿Jamüsü paaʼin müleka kojutule namüin na waneinnua tü pümakat otta nnojoliin macheʼein naya süchiirua nanüiki?

Moteerü waaʼin naainjala na waneinnua.

Jülüja paaʼin tüü: Nülatirüin Maleiwa naainjala na wayuu ayaawajaakana suulia naainjala. «Nnojoleerü niweetirakuʼu nümüin tü kasa mojusü waaʼinrakat, nnojoleechi jashichikuʼu müin nia wamüin weinshi» (Salmo 103:9). Anasü waaʼin motule naaʼin waainjala na waneinnua, makalaka motuinjatüin waaʼin tü kasa mojusü naaʼinrakat na waneinnua wamüin (Salmo 86:5).

Talateerü waaʼin anale nakuwaʼipa na waneinnua.

Jülüja paaʼin tüü: Nnojotsü anain waaʼin talatüle naaʼin wanee wayuu mojule wakuwaʼipa. Nnojoluinjatü talatüin waaʼin sülatüle kasa mojusü namüin na waneinnua, jaʼitaina naainjain kasa mojusü wamüin.

Süpüla anainjatüin wakuwaʼipa nutuma Maleiwa alinjatü wapüla wayuu maʼaka wekirajaaitpain anain. Shiimainre alin wapüla wayuu, wakaalinjeena naya.