Eeshii süpüla neʼrajüin jaʼrai shikii miyoone wayuu tü ashaitaa kanüliakat Copa Mundial de la FIFA aainjünaka nowienpüroʼu 20 sünainmüin tisienpüroʼu 18 soʼu juyakat 2022. Wainma na wayuu jülüjakana aaʼin eein süpüla paaʼinwaain na wayuukana sutuma ashaitaa makalü aka saaʼin tüü.

•   «Eesü süpüla suʼwanajaain nakuwaʼipa na wayuukana sutuma tü ashaitaakat, naainjeein wanee kasa sutuma, paaʼinwaain naya; nnojotsü eein waneirua kasa makalü atuma sukuwaʼipa wayuu» (Nelson Mandela, aluwataapuʼushi nia saaʼu mmakat Sudáfrica).

•   «Tü ashaitaakat fútbol […] anasü nakuwaʼipa na wayuukana sutuma, talatajiraasü naaʼin, aijiraashii naya otta kojuyashii na naatakana oumain anajakana shia» (Gianni Infantino, shikiipüʼükai tü kanüliakat FIFA). a

 ¿Eeshiiche süpüla suuntuin tia tü kanüliakat mundial de fútbol jee waneirua ashaitaa? ¿Eesüche süpüla suuntuin paaʼinwaain jee jimatüin saaʼin wayuu?

 Sünain tü kanüliakat mundial de fútbol aainjünaka soʼu juyakat tüü, aashajaana maʼin achiki poliitika maʼaka saaʼin tü eekat süpüla naaʼinrüin na wayuukana, koʼuin sukuwaʼipa wayuu otta nnojoluin wanaawain suwashirüin tü mmakat.

 Mayaainjeʼe müin sukuwaʼipa, wainma na wayuu jülüjakana aaʼin anain naaʼin na wayuukana sutuma ashaitaa makalü aka saaʼin tüü. Nnojoliipejeʼe paaʼinwaain waneepia na wayuukana sutuma tia mayaainjeʼe keeʼireein naaʼin shia. Naata neʼe tü kasa jülüjakat naaʼin na wayuukana sutuma jee tü naaʼinrakat, nnojotka paaʼinwaain atuma naya. Süküjatüjülia tü Bibliakat müinjatüin nakuwaʼipa na wayuukana «sülüʼütpa sükalia süpüla sajaʼttüin kasa mojusü» (2 Timoteo 3:1-5, TNM).

 Süküjain tü Bibliakat süchiki wanee kasa anakat maʼin, shia paaʼinweenain na wayuu sainküin mmakat. Paaʼinweena naya nuluwataapa Maleiwa saaʼu tü mmakat (Lucas 4:43, TNM; Mateo 6:10, TNM).

 Nieechi Jesucristo, chi aluwataainjachikai nutuma Maleiwa, eejeechikai atuma jimataa aaʼin saaʼu tü mmakat. Müsü sünüiki tü Bibliakat:

•   «Wainmeena na lotokana akuwaʼipaa otta eejeerü jimataa aaʼin waneepia» (Salmo 72:7).

•   «Nükaalinjeechi chi wayuu müliashi achuntakai kaalinwaa […]. Nükaalinjeena naya suulia müliaa jee napüleeruaanüin aaʼin» (Salmo 72:12, 14).

 Maaʼulu yaa, paaʼinwashii wainma wayuu suluʼu 239 mma sutuma tü nikirajakalü anain Jesús otta nnojoluitpa üttüin naaʼin sünain wayuu. Süpüla pütüjain sooʼomüin süchiki tia, paashajeʼera tü pütchi makalü anülia: «Wasünneʼera suluʼujee waaʼin tü üttaakalü aaʼin».