Sajaʼttia pütchi
«Anakajaʼa müleka jüshatüle nakuaippa na wayuu achechetkana naaʼin sünain anoujaa sümaiwa paala. Müleka nnojorüle sukulajaain jaaʼin [...], meena aka jia naaʼin sünain jüchecherüin jaaʼin sünain jaʼatapajüin tü naaʼinrüinjatkat chi Maleiwakai jümüin saaʼu pansaain nünüiki jümüin» (HEBREOKANA 6:12).
1, 2. ¿Jamüsü choʼujaaka kanoulainjanain waya? Püküja wanee shiyaawase.
ANASHAATASÜ maʼin tü kanoulaakat jee shia wanee akuwaʼipaa kojutka maʼin. Choʼujaashaatasü maʼin kanoulainjatüin wayuu. Jee kanourale pia maaʼulu, paaʼinmajüinjatü punoula sümaa pükatsüinrüin shia. ¿Jamüsü choʼujaaka paaʼinrüin tia?
2 Jülüjataa paaʼin waraitüin pia süpaʼapünaa wanee anooui sümaa wüinyaasüin maʼin pia. Shiasaʼa püntapa sünain wüin, paaʼinmajashaatain shia suulia itüin sutuma kaʼi. Akaʼaya pia, püchajaain maʼin sukuwaʼipa süpüla püntüin sünain sooʼomüin wüin püsüinjatka wopuluʼupünaa. Maaʼulu yaa, müshii kepiakai waaʼin süpaʼa wanee anoouishii süka alin maʼin shiiʼiree tü kanoulaa shiimainsükat. Otta müsia, eesü süpüla sümalajaain tü wanoulakat nnojorüle waaʼinmajüin otta wakooʼomüinjüin shia. Maʼaka choʼujaain maʼin tü wüinkat wamüin süpüla katüin woʼu, choʼujaasü tü wanoulakat süpüla aleewain waya nümaa Jeʼwaa (Roma 1:17, TNM).
3. (1) ¿Kasa naaʼinraka Jeʼwaa wapüleerua süpüla wakatsüinrüin wanoula? (2) ¿Jarat tü piamasü kasa waaʼinrajatkat?
3 Nütüja aaʼu Jeʼwaa choʼujaain maʼin wamüin kanoulainjanain waya. Otta nütüja aaʼu kapüleein wamüin anoujaa otta ayatüin waya sünain. Müshijeseʼe nüshajirüin suluʼu tü Wiwüliakat nachiki wayuu namaiwajannuu anakana süpüla washatüin akuwaʼipa. Anuujeseʼe nünüiki Jeʼwaa wamüin nükajee Pablo: «Anakajaʼa müleka jüshatüle nakuaippa na wayuu achechetkana naaʼin sünain anoujaa sümaiwa paala. Müleka nnojorüle sukulajaain jaaʼin [...], meena aka jia naaʼin sünain jüchecherüin jaaʼin sünain jaʼatapajüin tü naaʼinrüinjatkat chi Maleiwakai jümüin saaʼu pansaain nünüiki jümüin» (Heb. 6:12). Sutuma tia, keeʼireesü saaʼin nupueulose Jeʼwaa washatüinjatüin sukuwaʼipa nanoula na wayuu namaiwajannuu wekirajaakana achiki suluʼu karaloʼutakat tüü. ¿Kasaka waaʼinrajatüin? Tü waaʼinrajatkat palajana maʼin shia wakatsüinrüin wanoula jee tü wanee kasa waaʼinrajatkat shia jülüjain waaʼin waneepia tü kasa waʼatapajakat nutuma Jeʼwaa.
4. (1) ¿Kasa naaʼinraka Satanaa süka niyoutashaatain tü kanoulaakat? (2) ¿Jamüshii nnojoliinjanakana mmoluin waya neema?
4 Ayataʼaya wakatsüinrüin wanoula. Niyoutashaatain maʼin Satanaa tü kanoulaakat otta nia aluwataaka naaʼu na manoujainsaliikana. Nia kasitka süpüla müinjatüin manoulain watta saalii wayuu. Nnojoliipejeʼe mmoluinjanain waya sutuma pülain maʼin nia woulia. Eeshii süpüla kanoulain waya otta wachecheraain sünain, soto waaʼin aleewain Jeʼwaa namaa napüshuaʼa na anoujakana sünain tü shiimainkat. Nümaale waya Jeʼwaa, waʼleejeechi chi Yolujaakai süpüla nuʼunamaatüin woulia (Sant. 4:7). Süpüla wountuin waaʼinrüin tia, choʼujaasü wakatsüinrüinjatüin wanoula nünain Jeʼwaa kaʼiwai. ¿Suluʼu jamüin?
5. ¿Kasa naaʼinraka na wayuu saashajaakana achiki tü Wiwüliakat süpüla kanoulainjanain naya?
5 Nnojoliishii jemein sümaa kanoulain na wayuu aküjünakana achiki suluʼu tü Wiwüliakat. Watüja aaʼu niain chi naaʼinkai Maleiwa kanainjeejachin tü kanoulaakat (Gal. 5:22, 23). Jamüshiijaʼa nachuntapuʼule kaaliinwaa nümüin Jeʼwaa naya wayuukana, nükatsüinrapuʼuin Jeʼwaa nanoula. Anasü washatüle nakuwaʼipa, wachunta nümüin Jeʼwaa chi naaʼinkai. Naapeechi nia wamüin pansaale wakuwaʼipa sümaa tü wachuntakat nümüin (Luc. 11:13). ¿Kasa maa waaʼinrajatka?
6. ¿Kasa waaʼinrajatka süpüla watüjain nanainjee na wayuu saashajaakana achiki tü Wiwüliakat?
6 Sünain karaloʼutakat tüü, wekirajaa anainrü nakuwaʼipa noʼutku neʼe na wayuu saashajaakana achiki tü Wiwüliakat. Eepejeʼe nooʼomüin na wayuu anakana maʼin anoula (paashajeʼera Hebreokana 11:32). Anashii wekirajaale maʼin nachiki naya wayuukana wekirajaapa wamüiwaʼa sünain tü Wiwüliakat. Wainma maʼin kasa eeka süpüla watüjain nanainjee. Nnojoleetpajaʼa ichein wanoula waashajeʼerüle neʼe nachiki. Shia anaka aluʼu wachajaale sooʼomüin pütchi süchiki nakuwaʼipa otta süchiki sukuwaʼipa wayuu eejatka nakalioʼu. Soteesü waaʼinya sünain müin naya aka waaʼin wayakana wapüshuaʼa (Sant. 5:17). Jülüjeesü waaʼin jamapuʼuin naaʼin suʼunnaa sülatüin namüin tü alatakat wamüin maaʼulu.
7-9. (1) ¿Jamüsüje naaʼin na wayuu namaiwajannuukana eereje süpüla naʼwaajüin Jeʼwaa maʼaka waaʼinrüin shia maaʼulu? (2) ¿Jamüsü wakatsüinrüinjatka wanoula sükajee tü kasa waaʼinrakat?
7 Wanee sukuwaʼipa süpüla wakatsüinrüin wanoula shia waaʼinrüle tü nuluwataakalü anain waya Jeʼwaa. Soto waaʼin nnojoluin kasain anain apüla wanoula nuʼupala nnojorüle waaʼinrüin tü kasa anasü nüchekakat (Sant. 2:26). Talatüsüjeʼe naaʼin na wayuu namaiwajannuukana nuluwataale naya Jeʼwaa sünain tü nuluwataakalü anain waya maaʼulu.
8 Jülüjataa paaʼin jameerüin naaʼin Abraham süküjünüle nümüin nnojoluinjachin nuʼwaajüin Jeʼwaa sümülatuʼu ipa apaaʼuwajuushi, süküjünüle nümüin nuʼwaajüinjachin nia namaa na wawalayuukana suluʼu tü Piichi Outkajaaleekat jee sünain tü outkajawaakat miyoʼu. Talatüsüje maʼin naaʼin Abraham naapüle süchiki jamüin shikeraajia tü nüküjakat Jeʼwaa nümüin (paashajeʼera Hebreokana 11:13). Jülüjataa paaʼin jameerüin naaʼin Elías saapünüle wanee aʼyatawaa nümüin eekai nnojoluin süpülajatüin oʼutaa naaʼin na nünüikimaajanakana Baal otta nnojoire eein wanee aluwataai eekai eʼrüliin wayumüin nümüin Jeʼwaa. Anasüje naaʼin sünain aküjaa sümüin wayuu süchiki tü kasa anasü naaʼinrajatkat Maleiwa. Na wayuu namaiwajannuu saashajaakana achiki tü Wiwüliakat, nnojotsüje nayoutajaain amaa tü aʼyatawaa naapakat Jeʼwaa wamüin maaʼulu.
9 Ayataʼaya wakatsüinrüin wanoula sükajee tü kasa waaʼinrakat. Waaʼinrüle tia, nayeena washatakana akuwaʼipa na wayuu wekirajaakana achiki suluʼu karaloʼutakat tüü. Müle shia watuma, meena aka saaʼin waʼaleewainyuu wamüin naya wayuukana maʼaka wekirajaain suʼttiajee karaloʼutakat tüü. Alüʼütpejeʼe sükalia süpüla weʼrüinjanain naya otta waʼaleewajaain namaa.
10. ¿Kasa piʼreeka maʼin amüin suluʼu tü Paʼaraiisükat?
10 Ayataʼaya jülüjain waaʼin tü kasa waʼatapajakat. Na wayuu namaiwajannuu waneepiakana nümaa Maleiwa, shiapuʼusü jülüjaka naaʼin tü kasa naaʼinrajatkat Jeʼwaa napüleerua. ¿Müsüche sukuwaʼipa putuma? Anashaateerü maʼin weʼrapa nasoʼiraain aaʼin naya wayuukana nutuma Jeʼwaa (paashajeʼera Aluwataaushikana 24:15). ¿Jülüjasüche paaʼin tü kasa püsakireekalü anain naya?
11, 12. Suluʼupa pia tü Paʼaraiisükat, ¿kasa püsakireeka anain wayuukana naainnua? (1) Abel. (2) Noé. (3) Abraham. (4) Rut. (5) Abigail. (6) Ester.
11 ¿Kasaje püsakiraka anain Abel? Eesüjaʼa pütüjaweerü saaʼu nüchiki chi nüshikai jee tü niikat, eesü pütüjaweere saaʼu müleka naashajaale namaa na aapiee aaʼinmajakana tü apainkat Edén. ¿Jama nüchiki Noé? ¿Kasa pütüjaweeka aaʼu? Eesüjaʼa pütüjaweere saaʼu müleka mmorüle nia neema na nefilimkana otta kasain naaʼinrüin süpüla naaʼinmajüin soʼu wanee juya süpüshuaʼa tü mürüt suluʼujatkat tü anuwakat. ¿Kasaje püsakiraka anain Abraham? Eeshijaʼa püsakirüle nia müleka kapüleere nümüin oʼunaa suluʼujee tü pueulokot Ur. Eeshi püsakirüle müleka niale Sem ekirajüin nia nüchiki Jeʼwaa.
12 Eesüjaʼa jülüjale paaʼin tü püsakireekalü anain na jieyuu namaiwajannuukana waneepiaka nümaa Jeʼwaa. Jamüshijaʼa pia, eeshi pütüjaweere saaʼu jamüin suʼwaajaka Jeʼwaa Rut. Eesü pütüjaweere saaʼu Müleka mmorüle Abigail sünain aküjaa nümüin Nabal tü saaʼinrakat nüpüleerua David. Jee müsia, eesü pütüjaweere saaʼu jamüin sukuwaʼipa Ester nümaa Mardoqueo süchikijee tü aküjünakat nachiki suluʼu tü Wiwüliakat.
13. (1) ¿Kasa eeka süpüla nasakirüin anain waya na wayuu asoʼiraainjanakana aaʼin? (2) ¿Jamüsü paaʼin sutuma eein süpüla piʼraajüin na tooloyuu otta jieyuu saashajaakana achiki tü Wiwüliakat?
13 Wainmeerü kasa nasakireenaka anain waya na tooloyuu otta jieyuu saashajaakana achiki tü Wiwüliakat. Jee watteerü saalii kasa anasü waküjeetka achiki namüin. Waküjeerü namüin kasain alatüin sülüʼütpa süpüla sajaʼttüin kasakat süpüshuaʼa otta waküjeerü namüin tü naaʼinrakat Jeʼwaa süpüla nükaaliinjain nupueulose suʼunnaa tia. Talateerü maʼin naaʼin natüjaapa saaʼu tü naaʼinrakat Jeʼwaa süpüla nikeraajüin süpüshuaʼa tü nümakat. Soʼu tia, nnojoleerü choʼujaain jülüjain waaʼin jamüin maʼin nayolojo na wayuu saashajaakana achiki tü Wiwüliakat, jama weʼreenain naya. Aluʼujasaʼa maaʼutpünaa yaa, choʼujaasü waaʼinrüin tia süpüla müinjanain weʼraajakai naaʼin naya waʼaleewainkana. Washatüle sukuwaʼipa nanoula, aʼyanaajiraajeena waya namaa nümüin Jeʼwaa süpüla kaʼika süpüshuaʼa.
