“Teimatoa . . . n tauraoi n ikabwarabure ngkana iai bukini ngurenguremi i marenami.”​—I-KOROTE 3:13.

Ti bane ni bubure. Ti kona ni kaunia tabemwaang ke a kona ni kaunira, ai ngaia are ti bane ni kainnanoa te ikabwarabure i marenara. Ngkana ti kakabwarai buure, e a kona n toki ngkanne marakin nanora iroun te aomata are kaunira. Ti aki “kabooa ana buakaka te aomata n te buakaka,” ao ti aki naba teimatoa ni kakauringa te aomata kabwakana ke mamaarana. (I-Rom 12:17) Ma tera arora ngkana e a bon rangi ni maraki nanora ao ti a aki kona ni katoka iangoan te bwai are riki? Ti riai ngkanne ni maroro ma te karinerine ma te aomata anne n tii ngaira uoman. Tiara bwa ti na karekea te rau, ma tiaki n ae ti na kaotia bwa ti eti ao e bure te aomata anne.​—I-Rom 12:18.

“Kam na nanorinano n iangoia bwa a kakawaki riki tabemwaang nakoimi.”​—I-BIRIBI 2:3.

Ngkana ti nanorinano ao ti kakarinerine, a na kani memena aomata i rarikira. A ataia ae ti na bon akoiia ao n atataiaomata nakoia ao ti na bon aki kani karaoa te bwai ae a na un iai. Ma  ngkana ti aki toki n iangoira bwa ti kakawaki riki nakoia tabemwaang, ke ti aki toki n imanonoa ae e na iraki riki are iroura, ti karekea iai te itabarara ao te marakinnano. A na rarawa aomata ni mena i rarikira, ao ngkana iai raoraora ma e na rangi ni karako.

“E bon aki inanonano te Atua, ma a butimwaeaki irouna aomata nako aika maakua ma ni kakaraoa ae raoiroi, mai buakoia natannaomata nako.”​—MWAKURI 10:​34, 35.

E aki kakaokoroia n akoiia aomata ara tia Karikiriki ni kaineti ma abaia, aia taetae, teia, ke karani kunia. “E karaoiia natannaomata nako mairoun te aomata ae tii temanna.” (Mwakuri 17:26) Ai ngaia are, aomata ni kabane bon taari. Ngkana ti bwabwaina te karinerine ao te akoi nakoia aomata nako, ti na boni kakukureiia, ti na kukurei riki iai ngaira, ao e na kukurei ara tia Karikiriki.

“Kam na karina i aomi. . . te nimamannei.”​—I-KOROTE 3:12.

Ngkana ti nimamannei, a na boni mwengaraoi iai aomata ake i rarikira. A na aki maakinira ngkana a kan taetae nakoira ke ngkana a kani kaetiira, ibukina bwa a ataia ae ti na teimatoa n rau. Ao ngkana iai ae un iroura, e na boni kerikaaki unin te aomata anne n nimamanneira. E taku Taeka N Rabakau 15:1: “E rairaanako te un ae korakora te kaeka ae nimamannei, ma e kauekea te un te taeka ae kamarakinano.”

“E kakukurei riki te anga nakon te anganaki.”​—MWAKURI 20:35.

A bati aomata ni boong aikai aika nanonrang ao a a bon tii iaiangoiia naba i bon irouia. Ma a kukurei raoi ni koaua te koraki aika tituaraoi. (Ruka 6:38) A kukurei aomata aika tituaraoi ibukina bwa a tangiriia riki aomata nakoni bwaai. E kairiia te tangira anne bwa a na bwaina te kakaitau ao ni kaotiota kukureia ngkana iai ae tituaraoi naba nakoia. (I-Korote 3:15) Titirakiniko ni kangai, ‘Antai ae I kani memena i rarikina, te koraki ake a bwanga n tauti ao a aki kakakaitau, ke te koraki ake a tituaraoi ao a bwabwaina te kakaitau?’ Tera reireiara iai? Riiki bwa te aomata ae akoi n aron ae ko tangiriia naba aomata bwa a na karaoia.​—Mataio 7:12.