Bonu Biblu na dó ɖè vogbingbɔn e ɖò mɛ ɖěɖee ɖò Mawu sɛn wɛ nǔgbo nǔgbo lɛ é kpo mɛ ɖěɖee ma ɖò mɔ̌ wà wɛ ǎ lɛ é kpo tɛntin é xlɛ́ ɔ, é zán nǔjlɛdonǔwu elɔ: “Nǔwiwa yetɔn wɛ na zɔ́n bɔ mi na tuùn nǔ e ye nyí ɔ; ɖó è nɔ gbɛ̀ vǐwun ɖò wunkan mɛ ǎ, è ka nɔ gbɛ̀ fígi ɖò aklántigbo mɛ ǎ.” (Matie 7:16) Lee a sixu tuùn vǐwuntín ɖé ɖó vo nú wunkan ɖé, ɖó sínsɛ́n yetɔn lɛ wu gbɔn é ɔ, mɔ̌ wɛ a sixu tuùn sinsɛn nǔgbo ɔ ɖó vo nú adingban ɔ, gbɔn sínsɛ́n yetɔn lɛ alǒ nǔ elɔ lɛ e nɔ ɖè ye xlɛ́ é gblamɛ.

1.   Sinsɛn nǔgbo ɔ nɔ kplɔ́n nǔgbo e jinjɔn Biblu jí é mɛ, é nyí tamɛ-núkplɔnmɛ gbɛtɔ́ tɔn lɛ ǎ. (Jaan 4:24; 17:17) Nǔgbo e kúnkplá lindɔ̌n kpo nukúnɖiɖó gbɛ̀ mavɔmavɔ ɖò palaɖisi ayikúngban jí tɔn ɖé mɛ tɔn kpo lɛ é ɖò nǔgbo enɛ mɛ. (Ðɛhan 37:29; Ezayíi 35:5, 6; Ezekiyɛli 18:4, nwt) Gɔ́ na ɔ, nǔ ɖě nɔ glɔ́n ali n’i bonu é nɔ gɔn adingban-núkplɔnmɛ sinsɛn tɔn lɛ ɖè gbà ǎ.—Matie 15:9; 23:27, 28.

2.   Sinsɛn nǔgbo ɔ nɔ d’alɔ gbɛtɔ́ lɛ bɔ ye nɔ tuùn Mawu kaka jɛ nyikɔ tɔn Jehovah ɔ kplɔnkplɔn ye jí. (Ðɛhan 83:18, nwt; Ezayíi 42:8, nwt; Jaan 17:3, 6) É nɔ kplɔ́n mɛ lɛ ɖɔ Mawu bú dò alǒ lín dó ye ǎ; é nyɔ́ wà ɔ, é nɔ kplɔ́n mɛ ɖɔ Mawu ba ɖɔ mǐ ni ɖó kancica syɛnsyɛn ɖé xá emi.—Jaki 4:8.

3.   Sinsɛn nǔgbo ɔ nɔ tɛɖɛ̌ jí ɖɔ Jezu Klisu wɛ nyí mɛ e jí Mawu hun hwlɛngán sín ali gbɔn é. (Mɛsɛ́dó 4:10, 12) Mɛ ɖěɖee ɖò Sinsɛn nǔgbo ɔ mɛ lɛ é nɔ setónú nú gbeɖiɖe Jezu tɔn lɛ bo nɔ lɛ́ tɛ́n kpɔ́n bo nɔ xwedó kpɔ́ndéwú tɔn.—Jaan 13:15; 15:14.

4.   Sinsɛn nǔgbo ɔ nɔ sɔ́ ayi ɖó Axɔ́suɖuto Mawu tɔn jí ɖɔ é wɛ nyí nukúnɖiɖó ɖokpo e ɖè nú gbɛtɔ́ lɛ é. Mɛ ɖěɖee ɖò sinsɛn nǔgbo ɔ mɛ lɛ é nɔ ɖɔ xó nú mɛ ɖevo lɛ dó Axɔ́suɖuto enɛ wu kpo kanɖodónǔwu kpo.—Matie 10:7; 24:14.

5.   Sinsɛn nǔgbo ɔ nɔ jɛhun dó wanyiyi e ma ɖó cejɛnnabi ǎ é jí. (Jaan 13:35) É nɔ kplɔ́n mɛ ɖɔ è ni ɖó sísí nú mɛ e gosin akɔ vovo mɛ lɛ é bǐ, bo nɔ lɛ́ yí mɛ lɛ bǐ, ye na bo ɖó sinmɛ agbaza tɔn ɖebǔ, aca ɖebǔ, nɔ dó gbè ɖebǔ, alǒ gosin ninɔmɛ ɖebǔ mɛ ɔ nɛ. (Mɛsɛ́dó 10:34, 35) Wanyiyi nɔ sísɛ́ mɛ ɖěɖee ɖò sinsɛn nǔgbo ɔ mɛ lɛ é bɔ ye nɔ ɖ’alɔ ɖò ahwanfunfun mɛ ǎ.—Micée 4:3; 1 Jaan 3:11, 12.

6.   Sinsɛn nǔgbo ɔ ɖó kplékplé sinsɛngán lɛ tɔn ɖé bo nɔ sú axɔ́ ǎ, é ka nɔ lɛ́ sun gǎn-nyikɔ mɛ ɖěɖee nɔ wà devízɔ́ lɛ é ǎ.—Matie 23:8-12; 1 Piyɛ́ɛ 5:2, 3.

7.   Sinsɛn nǔgbo ɔ nɔ ɖó wǔ zɔ bǐ mlɛ́mlɛ́ ɖò toxóɖiɖɔ linu. (Jaan 17:16; 18:36) É ɖò mɔ̌ có, mɛ ɖěɖee ɖò sinsɛn nǔgbo ɔ mɛ lɛ é nɔ setónú nú acɛkpikpa fí e ye ɖè lɛ é tɔn, sɔgbe xá gbeɖiɖe Biblu tɔn elɔ: “Mi bo sɔ́ nǔ e nyí Dada Hlɔma tɔn tɔn ɔ jó nú Dada Hlɔma tɔn [e nɔte nú acɛkpikpa lɛ é], bo sɔ́ nǔ e nyí Mawu tɔn ɔ jó nú Mawu.”—Maki 12:17; Hlɔmanu lɛ 13:1, 2.

8.   Sinsɛn nǔgbo ɔ nɔ kúnkplá lee è nɔ zán gbɛ̀ gbɔn é bǐ, é nyí yɛsu fifɔ ɖé alǒ nǔwiwa mɔ̌tɔn mɔ̌tɔn ɖé kpowun ǎ. Mɛ ɖěɖee ɖò sinsɛn nǔgbo ɔ mɛ lɛ é nɔ zán nǔgbododó walɔ ɖagbe tɔn Biblu tɔn e yì aga lɛ é ɖò gbɛzán yetɔn bǐ mɛ. (Efɛzinu lɛ 5:3-5; 1 Jaan 3:18) Ye nɔ blawǔ ǎ, é nyɔ́ wà ɔ, “Mawu awǎjijɛnɔ ɔ” sinsɛn nɔ dó xomɛhunhun nú ye.—1 Timɔtée 1:11, nwt.

9.   Mɛ ɖěɖee ɖò sinsɛn nǔgbo ɔ mɛ lɛ é na sukpɔ́ ǎ. (Matie 7:13, 14) Hwɛhwɛ ɔ, è nɔ ɖè mɛ ɖěɖee ɖò sinsɛn nǔgbo ɔ mɛ lɛ é kpò, ko ye, bo nɔ lɛ́ klán gbè xá ye, ɖó ye ɖò jlǒ Mawu tɔn wà wɛ wutu.—Matie 5:10-12.

Sinsɛn nǔgbo ɔ sín xó nyí ‘sinsɛn elɔ wɛ nyɔ́ nukún ce mɛ’ xó ǎ

 Awovínú ɖé ɖò lee nǔ nɔ cí nú mɛ é kɛɖɛ jí zinzɔn dó dó sɔ́ sinsɛn ɖé mɛ. Biblu ɖɔ ɖ’ayǐ ɖɔ hwe ɖé nu na wá sù bɔ gbɛtɔ́ lɛ na “kplé nǔkplɔnmɛtɔ́ [sinsɛngán] wɔbuwɔbu ɖé lɛ nú yeɖée, bɔ ye na nɔ ɖɔ nǔ e nyɔ́ sè nú ye lɛ nú ye.” (2 Timɔtée 4:3) Amɔ̌, Biblu dó wusyɛn lanmɛ nú mǐ ɖɔ mǐ ni xwedó “sinsɛn e nyí sinsɛn mímɛ́, sinsɛn nǔgbo nǔgbo ɖò Mawu Tɔ́ ɔ nukɔn ɔ,” enyi mɛ gegě na bo ma tlɛ yí wǎn nú sinsɛn enɛ ɔ ǎ ɔ nɛ.—Jaki 1:27; Jaan 15:18, 19.