E dua na leqa e vakilai e vuravura taucoko na nodra dau lawaki se veivaqumi na vakailesilesi vakamatanitu. a Kena ivakaraitaki, donuya na gauna ni matedewa na COVID-19, era beitaki e levu na vakailesilesi vakamatanitu nira vakayagataka vakatawadodonu na ilavo me taqomaki ira na lewenivanua mai na matedewa. Qori e vakavuna mera tauvimate bibi ra qai mate tale ga e levu.

 E sa vakawakana tu na cakacaka vakailawaki ena matanitu. E kaya o David Cameron, na paraiminisita vakacegu e Peritania: “Era sa coko tu na veimatanitu kece e vuravura ena cakacaka vakailawaki.”

 Ia eda rawa ni vakadeitaka ni sa na vakarau oti kece vakadua na nodra dau cakacaka vakailawaki na matanitu. Na vuna? Dikeva na ka e kaya na iVolatabu ni na cakava na Kalou.

 E volai ena iVolatabu na ka e tukuna qo na Kalou: “Ni o yau o Jiova, au vinakata na lewadodonu, au cata na butako kei na ivalavala tawadodonu.” b (Aisea 61:8) E kila vinaka tu na Kalou na nodra dau vakalolomataki na lewenivanua ena nodra lawaki eso tale. (Vosa Vakaibalebale 14:31) E yalataka: “Nira sa vakacacani na vakaloloma, . . . au na tucake mai meu cakava e dua na ka.”—Same 12:5.

 Na cava ena cakava na Kalou? Na Kalou ena sega ni veisautaka na matanitu era veiliutaki tu qo, ia ena sosomitaka ga ena nona matanitu vakalomalagi e vakatokai na “Matanitu ni Kalou.” (Marika 1:14, 15; Maciu 6:10) E kaya na iVolatabu: “Ena nodra gauna na tui oya ena vakarautaka na Kalou ni lomalagi e dua na matanitu ena. . . vurumemeataka, ena vakawabokotaki ira na veimatanitu kece qori, ena tu ga me tawamudu.” (Taniela 2:44) Qori na sala ena vakaotia kina na Kalou na cakacaka vakailawaki eda raica tu nikua.

 Eda kila vakacava ni na sega ni lawaki na Matanitu ni Kalou? Dikeva e vica na vuna.

1.  1. Kaukaua. Na Kalou e solia na kaukaua ina nona Matanitu.—Vakatakila 11:15.

    Vuna e bibi kina: Ena rawa ga ni veiliutaki na matanitu vakatamata nira vakailavotaka na lewenivanua. Era temaki kina eso na vakailesilesi mera butakoca na ilavo qori, eso tale era veivaqumi se lawaki. Ia na Kalou e tokona na nona Matanitu, ena vakarautaka tu ga e veigauna na veika era gadreva na vakarurugi ena nona veiliutaki.—Same 145:16.

2.  2. iLiuliu. Na Kalou e lesi Jisu Karisito me iLiuliu ni nona Matanitu.—Taniela 7:13, 14.

    Vuna e bibi kina: O ira mada ga na iliuliu vinaka ena rawa nira lawaki ena nodra veivakamuai eso tale. (Dauvunau 7:20) Ia e vakadinadinataki ena ka e cakava o Jisu ni sega vakadua ni rawa ni vaqumi. (Maciu 4:8-11) Kena ikuri, e yavutaki na veika kece e cakava ena nona lomani ira qai kauaitaki ira dina na lewenivanua.—Same 72:12-14.

3.  3. Lawa. E uasivi na lawa ni Matanitu ni Kalou ra qai vakila na marau o ira era muria.—Same 19:7, 8.

    Vuna e bibi kina: Na lawa ni matanitu vakatamata e rui vereverea qai veivakaocai. Eso na gauna e sega ni yaga qai rawa mada ga ni dau uqeta na cakacaka vakailawaki. Ia na lawa ni Kalou ena vakilai tu ga na kena yaga. (Aisea 48:17, 18) Kena ikuri, na lawa qori eda vakadreti qai vakasalataki kina ena ka eda cakava kei na inaki eda cakava kina. (Maciu 22:37, 39) Eda namaka ga qori baleta ni Kalou e kila vinaka tu na lomada, ena raica tale ga me yavutaki ena loloma na muri ni nona lawa—Jeremaia 17:10.

 Mo rawa ni kila eso tale na yalayala ena iVolatabu me baleta na matanitu ena sega kina na lawaki.

•   Wilika na ulutaga “Matanitu Sega Ni Cakacaka Vakailawaki” mo kila e tolu tale na vuna ena sega kina ni lawaki na Matanitu ni Kalou.

•   Sarava na vidio Na cava na Matanitu ni Kalou? O na kila kina eso tale na ka me baleta na matanitu ni Kalou kei na ka ena cakava e vuravura.

•   Tovolea mada na neimami ituvatuva ni vuli iVolatabu e sega ni saumi. O na kila kina na sala mo vakila kina na yaga ni ka e yalataki tu ena iVolatabu.