E robota na vuravura na veika tawadodonu. Dikeva e rua na ivakaraitaki ena tabana ni lawa.

•   Ena Janueri 2018, e vakarota e dua na turaganilewa e Merika me sereki e dua na turaga e vesu tu voleka ni 38 na yabaki. E qai dikevi ena DNA ni cala na ka e beitaki kina.

•   Ena Seviteba1994, ratou vesu e tolu na cauravou e Aferika ni ratou sega ni via vakaitavi ena ivalu ena vuku ni nodratou vakabauta. Ena Seviteba 2020, sa 26 na yabaki nodratou bala tu e valeniveivesu. E sega ni matata na cala ratou beitaki kina se me rogoci tale nodratou kisi ena mataveilewai.

 Ke o sa sotava oti na veika tawadodonu, o na rairai duavata ena ka e tukuna o Jope ena gauna vakaivolatabu. E kaya: “Au tagi tiko ga ni kere veivuke, ia e sega na lewadodonu.” (Jope 19:7) O na rairai nanuma ena sega ni rawati na lewa dodonu dina ena gauna qo. Ia e yalataka na iVolatabu ni na vakayacori na lewa dodonu. Na ivakavuvuli vuku tale ga ena iVolatabu ena vukei iko ni o sotava na veika tawadodonu.

 O ira na sega ni muria na veidusimaki ni Kalou era vakavuna na veika tawadodonu. E kaya na iVolatabu na Kalou e ivurevure ni lewa dodonu dina. (Aisea 51:4) Ena iVolatabu, rau veisemati vinaka na lewa dodonu kei na yalododonu. (Same 33:5) Ena rawati na lewa dodonu ke matau qai donu nona ivalavala e dua, e salavata tale ga kei na ivakatagedegede ni Kalou. Ena yasana adua, na veika tawadodonu e vu mai na ivakarau e sega ni muri kina na ivakatagedegede savasava ni Kalou. Dikeva mada e vica na kena ivakaraitaki:

•   Nanumi keda ga. E veisemati na yalo ni nanumi keda ga kei na ivalavala ca. (Jemesa 1:14, 15) Nira vinakata e levu me yaco ga na lomadra era cakava kina vei ira eso tale na veika tawadodonu. Ia e vinakata na Kalou meda qara na ka e yaga vei ira eso tale. —1 Korinica 10:24.

•   Lecaika. Eso era sega ni kidava nira sa cakava tiko na ivalavala tawadodonu vei ira eso tale, ia na Kalou e okata qori me ivalavala ca. (Roma 10:3) Kena ivakaraitaki, ena vuku ni nodra lecaika eso tale e vakamatei kina vakatawadodonu o Jisu Karisito.—Cakacaka 3:15, 17.

•   Guce na veiliutaki vakatamata. Era kaya na veiliutaki vakapolitiki, bisinisi kei na iliuliu ni lotu e vuravura nira uqeta na lewa dodonu ra qai sega ni veivakaduiduitaki. Ia o ira sara ga era vakavuna na cala, veivaqumi, veivakaduiduitaki, kocokoco, veivakaduiduitaki ena ka vakailavo kei na duiyaloyalo—qori e vakavuna na veika tawadodonu. Eso na isoqosoqo qori era tokona o ira na via cakava na veika dodonu. Ia ena sega ni tini vinaka nodra sasaga e levu nira sega ni via muria na veidusimaki ni Kalou.—Dauvunau 8:9; Jeremaia 10:23.

 Io. E cata na veika tawadodonu, okati kina na rai kei na ivalavala e vakavuna na veika tawadodonu. (Vosa Vakaibalebale 6:16-18) E uqeti na parofita o Aisea me vola: “O yau o Jiova, a au vinakata na lewadodonu, au cata na butako kei na ivalavala tawadodonu.”—Aisea 61:8.

 Na lawa e solia na Kalou vei ira na Isireli ena gauna makawa, e vakaraitaka ni vinakata mera vakaraitaka na lewa dodonu. E vakaroti ira na turaganilewa mera kua ni ciqoma na veivaqumi kei na ivakarau kece e vakavuna na ivalavala tawadodonu. (Vakarua 16:18-20) E sega ni taleitaka mera lawakitaki na dravudravua kei ira na vakaloloma, qai sega ni vakadonui ira na sega ni muria nona ivakatagedegede.—Aisea 10:1-3.

 Io. Ena vuku i Jisu Karisito, ena vakaotia na Kalou na ivalavala ca e vakavuna na veika tawadodonu, ena qai vakalesui mai na bula uasivi. (Joni 1:29; Roma 6:23) Sa tauyavutaka tale ga e dua na Matanitu ena kauta mai na vuravura vou ni yalododonu, ena vakarautaka tale ga na lewa dodonu vei ira kece na kawatamata. (Aisea 32:1; 2 Pita 3:13) Me ikuri ni vakamacala me baleta na Matanitu vakalomalagi, sarava na vidio Na Cava na Matanitu ni Kalou?

 Ni robota na vuravura na lewa dodonu, ena qai vakilai na vakacegu kei na sautu. (Aisea 32:16-18) E talei vua na Kalou na noda bula, ena sega gona ni veivakaduiduitaki. Ena sega na lolosi, tagiyaso kei na mosi e vu mai ena veika tawadodonu. Eda na sega tale ga ni nanuma tiko na veika tawadodonu e caka vei keda. (Aisea 65:17; Vakatakila 21:3, 4) Mo kila e levu tale na ka, raica na ulutaga “Na Cava ena Cakava na Matanitu ni Kalou?”

 Io. E nuitaki na parofisai e tu ena iVolatabu, e donu na itukutuku vakasaenisi kei na itukutuku makawa e volatukutukutaka. Eda rawa gona ni nuitaka na ka e volai kina. O rawa ni vulica e levu tale na ka ni o dikeva e vica na ulutaga qo:

•   Eda Kila Vakacava ni Dina na iVolatabu? (vidio)

•   “Parofisai Era Yaco Dina”

•   “Yaco Dina na ka e Parofisaitaki”

•   “Reasons to Trust the Bible”

 O ira na tamata vinaka ena gauna vakaivolatabu era cakava eso na ka me kua ni caka vei ira na veika tawadodonu. Kena ivakaraitaki, a vakarerei vakatawadodonu na yapositolo o Paula qai rawa ni vakamatei kina. Ia e sega ni ciqoma o Paula na veika tawadodonu qori, mani vakayagataka na veika vakalawa me kerea nona veivuke o Sisa.—Cakacaka 25:8-12.

 Ena guce na sasaga vakatamata me vakaotia na veika tawadodonu e vuravura. (Dauvunau 1:15) Ia e levu era vaqaqacotaka nodra vakabauta na vosa ni yalayala ni Kalou me baleta na vuravura vou ni yalo dodonu. Rawa kina nira cavuraka laivi na veilecayaki ni lomadra, ra qai vakila na vakacegu ni vakasama.