Danielle yɛ Jehovah Dasefo, na ɔwɔ South Africa. Da kor bi, ohun dɛ obi egya ne baag wɔ beebi a wɔtɔn kɔfe. Obuee baag no mu no, ohun dɛ sika na credit kaad hyɛ mu. Nna Danielle pɛ dɛ ɔhwehwɛ baag no wura na ɔdze n’adze ma no. Dɛm ntsi, ɔhwɛɛ baag no mu dɛ obenya onyii no n’address anaa no fon nɔmba na ɔafrɛ no. Naaso ɔbarimba bi ne dzin pɛ na ohun no wɔ baag no mu. Dɛm ntsi ɔdze credit kaad no kɔr ɔbarimba no ne bank dɛ bi a wobohu ne nɔmba anaa n’address a, nkyɛ ɔnam do ahwehwɛ ɔbarimba no, naaso ennkesi hwee. Iyi nyina mu no, Danielle ammpa abaw. Ɔsanee hwɛɛ baag no mu na ohun dɛ dɔkta bi no nɔmba gu krataa bi do. Ɔfrɛɛ dɛm nɔmba no na okesii ɔbaa bi do. Ɔbaa no kaa kyerɛɛ Danielle dɛ ɔdze no nɔmba no bɛma ɔbarimba a ne baag ayew no ma ɔaafrɛ no.

 Dɔkta no frɛɛ ɔbarimba a n’adze ayew no, na ɔkaa kyerɛɛ no dɛ ababaa bi a wɔfrɛ no Danielle ehu ne baag no, na ɔpɛ dɛ ɔsan dze n’adze ma no bio. Aber a ɔbarimba no tsee dɛm no, ɔyɛɛ no nwanwa paa. Ntsi ɔyɛɛ dɛ obehyia Danielle na ɔagye ne baag no. Aber a okodur beebi a wobehyia no, ohun Danielle na ne papa. Wɔkaa kyerɛɛ ɔbarimba no dɛ wɔyɛ Jehovah Adasefo, na wɔbɔ mbɔdzen dɛ wɔdze Bible mu afotusɛm bɔbɔ hɔn bra. Dɛm ntsi aber biara wɔyer hɔnho dɛ wobedzi nokwar.​—Hebrewfo 13:18.

 Ekyir yi, ɔbarimba no kyerɛɛw tɛst mesegye na ɔdze kɛdaa Danielle na ne papa ase dɛ wɔdze ne baag no brɛɛ no. Ɔkaa dɛ: “Meda hom ase paa dɛ hom yɛɛ dza hom botum biara dɛ hom bɔhwehwɛ me dze me baag no abrɛ me. Aber a mihyiaa hom no, mbrɛ hom sii tseew hom enyim nye me kasae no maa m’enyi gyee papaapa, na dza hom yɛe no, mo werɛ rimmfir da. Dɛm ntsi, mepɛ dɛ medze sika yi ma hom dze da hom ase. Minyim dɛ hom dze ndzɛmba bɔ afɔr mbrɛ ɔbɛyɛ a hom botum asom Nyankopɔn yie. Nokwar a Danielle dzii no ama mehu dɛ hom yɛ nyimpa pa. Meda hom ase a ɔnnsa da. Nyankopɔn nhyira edwuma a hom reyɛ no do.”

 Abosoom kakra ekyir no, Danielle ne papa hyiaa ɔbarimba a wɔdze ne baag maa no no. Ɔkaa kyerɛɛ Danielle ne papa dɛ, wɔdze baag no brɛɛ no no, annkyɛr biara na ɔno so hun dɛ obi n’adze ayew. Dza osii nye dɛ, nna oridzi gua wɔ beebi, na ohun dɛ baag bi a sika hyɛ mu da famu. Ɔno so hwehwɛɛ baag no wura na ɔdze n’adze maa no bio. Ɔdze baag no maa no wura no, ɔmaa ohun siantsir a ɔdze ne baag no abrɛ no. Ɔkaa kyerɛɛ maame no dɛ, ɔnnkyɛree biara na obi so dze ne baag a ayew brɛɛ no. Ɔdze kaa ho dɛ: “Nokwardzi ketseaba do wɔ mfaso, na sɛ obiara reyɛ dɛm a nkyɛ wiadze bɛyɛ kama paa.”