Ntoboa ahorow a Jehovah Adasefo fi hɔn pɛ mu yi no nye ɔkwan tsitsir a yɛfa do tua ɔsom edwuma a yɛyɛ wɔ wiadze nyinara no ho kaw. a Yɛdze ntoboa ndaka sisi mbea a yehyia mu som no. Na sɛ ekɔ “Donations” ɔfa a ɔwɔ hɛn wɛbsaet hɔ so a ibohu akwan afofor a yɛfa do yi ntoboa. Wɔayɛ no wɔ kwan bi do a obi botum eyi sika aboa wiadze nyina som edwuma no nye kaw ahorow a yɛbɔ no wɔ hɛn asafo no mu no, anaa ebien no nyina.

 Wɔnnhwɛ kwan dɛ Jehovah Adasefo botua tithe, na wonntwaa sika pɔtsee bi a ɔsɛ dɛ obiara tua nntoo hɔ. Bio so wɔnnhwɛ kwan dɛ wɔdze sika a wonya no mu dodow bi bɛba. (2 Corinthfo 9:7) Yɛnngyegye kɔlɛhyen biara wɔ hɛn nhyiamu ahorow ase. Dɛmara so na sɛ hɛn mpanyimfo no boa obi ma onuma, ɔyɛ eyi, ayefor anaa biribi a ɔtse dɛm a wɔnngye no hwee. Nkyii so, yɛnntɔn ndzɛmba wɔ hɛn nhyiamu ase, yɛnnyɛ Harvest, Kofi na Ama, nye ndzɛmba a ɔtsetse dɛm. Afei, yɛnnserɛserɛ sika so. Sɛ obi yi ntoboa a yɛmmfa ne dzin nnto gua. (Matthew 6:2-4) Yɛnngye sika mmfi ndwumakuw hɔ mmfa mmbɔ hɔn ndzɛmba ho dawur wɔ hɛn wɛbsaet do anaa wɔ hɛn nwoma ahorow mu.

 Bosoom biara, Jehovah Adasefo asafo ahorow no bu hɔn ntoboa ahorow no ho akontaa na wɔdze to gua ma obiara tse. Woyi hɔn mpanyimfo no mu kor ma ɔhwehwɛ hɔn sikasɛm no mu hwɛ dɛ woebu biribiara ho akontaa pɛpɛɛpɛ a.—2 Corinthfo 8:20, 21.

•  ● Ntoboa ndaka: Ibotum dze sika anaa check ato ntoboa ndaka a wɔdze sisi Ahendzi Asa, Ehyiadzi Asa, nye mbea ahorow a yehyia mu som no.

•  ● Ntoboa A Woyi Wɔ Intanɛt Do: Aman ahorow pii do no, ibotum dze credit card, debit card, mobile money anaa bank transfer eyi ntoboa wɔ “Donate to Jehovah’s Witnesses” ɔfa a ɔwɔ hɛn wɛbsaet do no. b Adasefo binom so ayɛ nhyehyɛɛ a ɔma bosoom biara wɔtsew sika pɔtsee bi fi hɔn bank account mu dze yi ntoboa.—1 Corinthfo 16:2.

•  ● Ndzɛmba A Wɔdze Kyɛ: Akwan afofor bi so a obi botum afa do eyi ntoboa no mu bi wɔ hɔ a, gyedɛ mbranyimfo bi boa wo ma etse ase. Binom ebisa mbrɛ wobotum ayɛ nhyehyɛɛ dze akyɛdze eyi ntoboa aber a wɔtse ase nye hɔn wu ekyir mpo, na mbuae a woenya no aboa hɔn ma woesi gyinae pa. Akwan ahorow a odzidzi do yi, sɛ epɛ dɛ efa no mu bi do yi ntoboa a, enye Jehovah Adasefo edwumayɛbea a ɔwɔ wo man mu no ndzi nkitaho:

  •  ● bank account

  •  ● insurance na pension sika

  •  ● adan na nsaase

  •  ● stock na bonds

  •  ● will na trusts

 Sɛ epɛ dɛ ihu akwan afofor so a ibotum afa do eyi ntoboa wɔ wo man mu a, kɔ “Donate to Jehovah’s Witnesses” ɔfa a ɔwɔ hɛn wɛbsaet do no.