July 2013 mu no, Jehovah Adasefo bi a hɔn dodow yɛ 28 a wɔwɔ Brazil tuu kwan fii São Félix do Xingu kurow no mu kɔr Cayapo nye Yuruna nsaase a ɔwɔ India no do. Wɔdze hɛmba a ne tsentsen yɛ mita 15 (anamɔn 50) twaa kwan faa Xingu Esutsen no a ne tsentsen yɛ kilomita 2,092 (akwansin 1,300) no do. Wɔdze hɔn enyi kyerɛɛ etsifi afamu kopuee Amazon Esutsen no do.

Dɛm Adasefo yi twaa kwan tsentsen yi dɛ wɔrekɛkã Nyankopɔn n’Ahenman no ho asɛmpa akyerɛ hɔn a wɔtsetse bɛn esutsen no ho no. Wɔ da a otsĩa ebiasa no mu no, Adasefo yi dur ekuraa bi a wɔfrɛ no Kokraimoro no ase. Nna kurow no mu hɔfo no pɛ ahɔhoyɛ na wɔserew so, na wɔgyee ahɔho yi fɛw do. Wohyiaa basia bi a ɔdze enyigye dze ne nsa kasaa kyerɛɛ hɔn. Nyia nna ofi kurow no mu hɔ a ɔrekyerɛ hɔn kwan no kyerɛkyerɛɛ dza basia no kãe no mu kyerɛɛ hɔn dɛ: “Dza basia no repɛ akyerɛ nye dɛ: ‘Hom nyinara mbra. Yɛpɛ dɛ yɛnye hom nyinara bɔ nkɔmbɔ!’”

Adasefo no nye obiara kasae​—binom wɔ Portuguese kasa mu, na afofor so dze, wɔdze hɔn nsa kasaa kyerɛɛ hɔn. Wɔdze mfonyin ahorow a ɔwowɔ Bible mu nwoma ahorow a wɔdze kɔree no mu no so dzii dwuma ma ɔboaa hɔn paa. Kurow no mu hɔfo no gyee nwoma ahorow, tsitsir no nwomaba a wɔato dzin Tsie Nyankopɔn no.

Gerson a ɔyɛ ɔkwampaaefo tsitsir wɔ São Félix do Xingu no kaa mbrɛ obi dze enyigye gyee nwoma a wɔato dzin My Book of Bible Stories no. Ɔkã dɛ: “Ɔhwɛɛ nwoma no, na ɔdze ne nsa ebien no nyinara suoo mu dzendzenndzen; nna ɔmmpɛ dɛ obegyaa mu ato hɔ enyibu kakraabi mpo.”

Jehovah Adasefo no gyaa hɔn a wɔtsetse nkurobaase a ɔbembɛn esutsen no ho no a wɔkyerɛɛ enyisɔ no mbukuu, magazine, nye nwomaba ahorow a no dodow si 500. Wɔ Kawatire ekurobaase no, kurow no mu hɔfo no dze enyigye tsiee Bible mu anohoba a ɔfa asaase a wɔbɛdan no paradise no ho no. Tonjaikwa a ɔyɛ Indianyi Cayapo no kãa dɛ: “Hɔn a wɔbɛtsena Paradise no asetsena bɛyɛ dɛ hɛndze yi bi”.

Nna hɔn a wɔtsetse São Félix do Xingu kurow no mu no mu pii nyim hɛn nserahwɛ no ho asɛm. Simone a ɔkã nyimpakuw a wotuu kwan no ho no kãa dɛ, nna no kurowmufo no mu binom adwen mu yɛ hɔn konsee wɔ akwantu no ho. Nna wɔdwen dɛ, bi a hɔn a wɔtsetse ekuraa no ase no remma hɔn kwan mma wɔmmba hɔ. Naaso wodur hɔ no, woennhyia ɔhaw biara dɛm. Simone kãa dɛ: “Wɔgyee hɛn fɛw do, na yɛkãa asɛmpa no kyerɛɛ obiara.”