Jehovah Adasefo robɔ mbɔdzen soronko bi dɛ wɔnye nkorɔfo a wɔkã Irelandfo nye Britainfo hɔn kurow mu kasa no bedzi nkitaho. a Sɛ yɛdze Borɔfo to nkyɛn a, kasa a wɔkã no bi nye Irish, Scottish Gaelic, nye Welsh.

Wɔ September 2012 mu no, yeyii jw.org wɛbsaet a yɛayɛ no fofor wɔ kasa ahorow pii mu no edzi, a Irish nye Welsh kã ho, na yenyaa no wɔ Scottish Gaelic so mu wɔ August 2014. Afei so yetsintsim Bible ho nwoma ahorow wɔ dɛm kasa ahorow yi mu. Ebɛnadze na efi dɛm mbɔdzembɔ yi mu aba?

Asɔr bi no sɔfoe gyee Bible ho krataaba bi wɔ Scottish Gaelic kasa mu, hɔ ara na ɔkenkaan no dzen, na ɔhyɛɛ ase dɛ orusũ. Ebɛnadze na okenyaan no dɛm? Nna mbrɛ wɔakyerɛ kasa no ase yie no yɛ no nwanwa ara ma ɔtsẽaa mu dɛ: “Woana kyerɛɛ iyi ase? Ɔyɛ kama dodow!”

Aber a yeyii jw.org wɛbsaet yi edzi fofor no, no bosoom kor ntamu no, nkorɔfo bɛyɛ 750 na wɔkɔr do wɔ Scottish Gaelic kasa mu.

Kyerɛkyerɛnyi bi a ɔwɔ National University of Ireland, Galway, kãa kyerɛɛ Ɔdasefo bi dɛ n’enyi nngye nyamesom ho. Naaso, aber a obohun dɛ obotum enya nwomaba a wɔato dzin The Bible​—What Is Its Message? no wɔ Irish kasa mu no, ɔkãa dɛ wɔmma no bi. No nsusui nye dɛ ɔsɛ dɛ obiara tum nya Bible ho nwoma wɔ nankasa no kurow mu kasa mu, na ɔkamfoo Jehovah Adasefo no wɔ edwuma pa a wɔreyɛ dɛ wɔbɛma Irishfo enya nwoma wɔ hɔn kurow mu kasa mu no.

Ɔbaapanyin bi kyerɛɛ mbrɛ n’enyi agye afa aber a ne nsa kãa Bible ho nwomaba wɔ Welsh kasa mu no, ɔkãa dɛ: “Nokwasɛm nye yi, sɛ nkyɛ hom maa me Borɔfo dze a, nkyɛ ibia mennkɛgye, naaso wɔ mankasa me kasaa mu dze, m’enyi gye ho paa.”

Wɔ August 2014 mu no, ndzɛmba a yɛyɛ no wɔ jw.org do wɔ Welsh kasa mu no, yɛdze bi kãa ho. Iyi ntsi nyimpa a wɔba hɛn wɛbsaet ha bɛkenkan nsɛm wɔ Welsh kasa mu no dodow bui bɔɔ ho mprɛnu wɔ dɛm bosoom no mu.

Aber a Jesus kyerɛkyerɛɛ Kyerɛwnsɛm no mu kyerɛɛ n’esuafo no mu beenu no, wɔdze enyigye kãa dɛ: “Ɔnye hɛn rekasa wɔ kwan mu, na obuee kyerɛwnsɛm no mu kyerɛɛ hɛn no, hɛn akoma annhyehye hɛn mu anaa?” (Luke 24:32) Sɛ wɔkyerɛkyerɛ Bible mu nokwasɛm mu kofee kyerɛ afofor wɔ hɔn kurow mu kasa mu a, ɔkã hɔn asetsena papaapa.

Ɔbarimba bi a wɔfrɛ no Emyr a ofi Wales awar Jehovah Adasefo no mu kor, naaso ɔmmbɛkãa ne yer noho wɔ no som no mu da. Ekyir yi ɔnye Ɔdasefo bi a wɔfrɛ no Russell faa nyɛnko. Emyr kãa dza ɔsesaa n’adwen no ho asɛm dɛ: “Misii gyinae dɛ mubosũa Bible no enyiberdo aber a Russell dze buukuu a wɔato dzin What Does the Bible Really Teach? b no baa me nkyɛn no. Ɔmaa me kor, na ɔkãa dɛ, ‘Buukuu yi wɔ Welsh kasa mu. Menye wo bɔbɔ mu esũa, yɛrehyɛ ase seseiara.’” Ebɛnadze na ɔmaa Emyr enyi gyee ɔkwan a Russell faa do no ho? Ɔkyerɛkyerɛ mu dɛ: “Ehu dɛ, yɛkã kasa kor, hɛn amambra yɛ kor, na yɛtse hɛnho ase.” Emyr n’akoma ‘hyehyee’ no mu, kyerɛ dɛ aber a wɔnye no susuu Bible no ho wɔ no kurow mu kasa Welsh mu no, opusuuw n’akoma, osiandɛ ɔtsee nkyerɛkyerɛmu no ase pefee.

Jehovah Adasefo bɔkɔ do ara aboa nkorɔfo ma woeesũa Nyankopɔn no ho adze wɔ hɔn kurow mu kasa mu, kasa a okenyan akoma no.