Se ibede mbahade iba ke otu mbon emi ẹdade ofụri ini mmọ ẹkabade n̄wed nnyịn idụhe ke n̄kọk itieutom inam utom oro. Edi ẹdu ke mme itie emi ẹbọpde ẹnọ mme akabade n̄wed, emi ẹsinyụn̄ ẹkotde RTO. Ntak emi ọfọnde mme akabade n̄wed ẹdu ke itie emi ẹbọpde ẹnọ mmọ? Nso utọ n̄kpọutom ke mmọ ẹsiyom man ẹkeme ndinam utom mmọ ọfọn? Ndi mme akabade n̄wed ndidu ke itie emi ẹbọpde ẹnọ mmọ enen̄ede an̄wam mmọ ẹnam utom mmọ ọfọn?

 Ndibọp mme itie ukabade n̄wed anam mme akabade n̄wed ẹkeme ndidụn̄ ke mme itie emi ẹsemde usem emi mmọ ẹkabarede. Karin, emi esitienede akabade n̄wed esịn ke usem Low German, ọdọhọ ete: “Tọn̄ọ ikọwọrọ idi itie ukabade n̄wed nnyịn mi ke Cuauhtémoc ke Chihuahua ke Mexico, nnyịn mme akabade n̄wed isineme nneme idahaemi ke usem nnyịn, ikwọrọ ikọ ke usem nnyịn, inyụn̄ itịn̄ ikọ ye mme owo ke usem nnyịn ke ini iyomde ndidep n̄kpọ ke urua. Mbon emi ẹsemde usem nnyịn ẹdodụn̄ ẹkan nnyịn ẹkụk. Imesikop mmọ ẹtopde n̄ke emi edide ebịghi etieti ikokop, ndien edieke n̄kpọ okpụhọrede ke usem nnyịn, imesisọp idiọn̄ọ.”

 James, emi esitienede akabade n̄wed esịn ke usem Frafra ke Ghana, ọdọhọ ke ndusụk ini, esidọn̄ imọ nte ikpafiakde ikodu ke Bethel. Edi enye ọdọhọ n̄ko ete: “Enem mi tutu ndidu ke itie ukabade n̄wed nnam utom. Se isinemde mi ikan edi ndikwọrọ ikọ ke usem nnyịn nnyụn̄ n̄kụt nte mme owo ẹmade ndikop eti mbụk.”

 Nso ke ẹsida ẹbiere ebiet emi ẹkpebọpde itie ukabade n̄wed? Joseph, emi anamde utom ke Itieutom Emi Ẹsede Ẹban̄a Ubọpn̄kpọ ke Ofụri Ererimbot ke ibuot itieutom nnyịn ke Warwick ke U.S.A. ọdọhọ ete: “Akpan mfịna kiet emi isinyenede edi ke ndusụk itie, owo isinyeneke ikan̄, mmọn̄, ye Intanet kpukpru ini. Ntre ke ini iyomde ndibọp itie ukabade n̄wed, imesisan̄a iyom itie emi mme n̄kpọ isụk isiakde mi ẹdude​—ebiet emi mbon emi ẹsemde usen oro ẹnyụn̄ ẹdude.”

 Edi ndibọp itie ukabade n̄wed ke okụre Ufọkmbono Obio Ubọn̄, Itie Mbono, m̀mê ke ufọkidụn̄ mme isụn̄utom esimem urua onyụn̄ ọsọp owo ubọk akan. Ndien mme akabade n̄wed ẹsito ufọk mmọ ẹkenam utom do. Edieke owo mînyeneke utọ itie oro, ẹsidep ufọk ye ọfis ẹnọ mme akabade n̄wed ẹdu ẹnam utom. N̄kpọ okpokpụhọde nte ini akade, ẹkeme ndinyam ufọk oro ẹda okụk ẹnam n̄kpọ en̄wen.

 Se ikabiatde ise iban̄a mme itie ukabade n̄wed nnyịn ke isua utom 2020 ama ebe biliọn naira ition. Mme n̄kpọ emi isinọde mme akabade n̄wed ẹkama ẹnam utom esịne kọmputa, mme n̄kpọ emi ẹsidade ẹ-rekọd ikwọ ye vidio, Intanet, ye mme n̄kpọ ntre. Okụk emi isibiatde idep kọmputa ye mme n̄kpọutom eken inọ akabade n̄wed kiet kpọt esibe tọsịn naira ikie ita. Imesidọn̄ nsio nsio n̄kpọ ke kọmputa emi idepde inọ mme akabade n̄wed nnyịn. N̄kpọ emi esinam utom mmọ efere onyụn̄ anam mmọ ẹkụt mme n̄wed esop Abasi emi ẹdọn̄ọde ke Intanet.

 Ẹsinyụn̄ ẹnọ mme akabade n̄wed nnyịn n̄kpọ emi mmọ ẹdidade i-rekọd se mmọ ẹkabarede, i-rekọd vidio, ye mme ikwọ nnyịn. Mme n̄kpọ emi ama enen̄ede an̄wam mme akabade n̄wed ẹka iso ke utom mmọ akpan akpan ke ini idiọk udọn̄ọ COVID-19 ọkọtọn̄ọde.

 Nditọete emi ẹdụn̄de ẹkpere itie ukabade n̄wed nnyịn ẹsitiene ẹn̄wam ẹkot se ẹkabarede man ẹse m̀mê ayan̄wan̄a owo. Mmọ ẹsinyụn̄ ẹtiene ẹn̄wam ke mme utom eken do. Cirstin, emi esitienede akabade n̄wed ẹsịn ke usem Afrikaans ke Cape Town ke South Africa ọdọhọ ete: “Ediwak mme asuanetop ye mme asiakusụn̄ ofụri ini ẹsitiene ẹn̄wam nnyịn ke utom.”

 Esinen̄ede enem nditọete nditiene n̄n̄wam ke utom ke itie ukabade n̄wed nnyịn. Sista kiet emi esitienede an̄wam nnyịn ọdọhọ ke ndinam utom do esitie imọ nte idu ke Paradise. Ndusụk nditọete emi ẹdụn̄de ẹkpere itie ukabade n̄wed nnyịn ẹsitiene ẹn̄wam ẹ-rekọd ikwọ, vidio, ye mme n̄wed. Juana, emi esitienede akabade n̄wed esịn ke usem Totonac ke obio Veracruz ke Mexico, ọdọhọ ete: “Tọn̄ọ ikọwọrọ ididu ikpere ebiet emi ẹsemde usem nnyịn, emem ediwak nditọete utom ndidi ndin̄wam nnyịn n̄-rekọd ikwọ, vidio, ye mme n̄wed nnyịn.”

 Edi, ndi mme akabade n̄wed ndidu ke mme itie emi ẹsemde usem mmọ anam se mmọ ẹkabarede enem onyụn̄ an̄wan̄a owo? Cédric, emi esitienede akabade n̄wed esịn ke usem Kongo ke Democratic Republic of Congo, ọdọhọ ete: “Ndusụk nditọete ẹkesidọhọ ke usem Kongo emi nnyịn ikabarede edi eke Enyọn̄-Ukpeme sia nte ikesikabarede Enyọn̄-Ukpeme ama okpụhọde ye nte ẹsisemde usem Kongo. Edi idahaemi, mmọ ẹdọhọ ke nnyịn ikabade ata usem Kongo, ke nte ẹsisemde usem mmimọ edi oro.”

 Andile emi esitienede akabade n̄wed esịn ke usem Xhosa ọdọhọ ke imokop nditọete ẹtịn̄de ukem ikọ oro ke South Africa. Enye ọdọhọ n̄ko ete: “Ediwak owo ẹdọhọ ke nte ikabarede n̄wed nnyịn idahaemi enen̄ede okpụhọde. Idem nditọwọn̄ ẹmi ẹkesikotde Enyọn̄-Ukpeme akpa ke Ikọmbakara ẹdikot idahaemi ke usem Xhosa. Mmọ ẹnen̄ede ẹma nte ẹkabarede obufa Bible nnyịn sia ẹkabade enye nte ẹsinyụn̄ ẹtịn̄de ikọ ke usem nnyịn.

 Okụk oro mme owo ẹnọde ke imaesịt ẹte ẹda ẹnam utom Abasi ke ofụri ererimbot ke ẹsida ẹbọp mme itie ukabade n̄wed emi ẹnyụn̄ ẹdep n̄kpọutom ẹnọ mme akabade n̄wed. Ediwak owo ẹsinọ enọ imaesịt mmọ ke donate.isa4310.com.