Ọwọrọetop n̄wan kiet emi esinamde fim onyụn̄ anamde mbufa ọfọn̄ ọwọrọ etop ke idụt kiet ke Asia, ama enyịme ndikpep Bible. Enye ama ọsọsọp ọtọn̄ọ ndinam se enye ekpepde onyụn̄ ọduọn̄ọ n̄wed ibọk ye mme abasi Buddha esie.

Ufan esie kiet ama ekpe enye ubọk ete: “Tre ndikpep Bible isua  ita nyụn̄ sịn idem nam utom fo. Isua ita ama ebe emekeme ndifiak ntọn̄ọ.”

Enye ama ọbọrọ ete: “Mma nyom Jehovah ke ofụri isua 24. Ntak emi n̄kpafiakde mbet ofụri isua ita en̄wen mbemiso n̄kpepde mban̄a enye?”

Ke esịt urua emi enye ekenyenede akpa nnamn̄wụt esie ke Ufọkn̄wed Utom Ukara Abasi, mbon fim ẹma ẹnọ enye utom. Mmọ ẹma ẹdọhọ enye edinam fim ọnọ mmimọ isua inan̄, ke iyekpe enye ata ediwak okụk edieke enye enyịmede ndidi owo ekededi emi iyomde enye edi ke fim. Enye ama esịn. Ke May 2014, enye ama edi asuanetop emi mînaha baptism. Ekem enye ama ọdọhọ ke idikwọrọ ikọ hour 100 ke ọfiọn̄ August. Ke ini ẹkebụpde enye ntak, enye ọkọdọhọ ete: “Nyom ndidara isua 100 emi Jesus akarade idahaemi ke ndikwọrọ hour kiet nnọ isua kiet kiet.” Enye ama onyụn̄ ọkwọrọ hour 100 ọfiọn̄ oro. Ke January 2015 enye ama ana baptism. Enye edi asiakusụn̄ unọ un̄wam idahaemi.

Ke Sri Lanka, Ntiense Jehovah inan̄, iban iban, ẹma ẹka ukwọrọikọ ke obio kiet emi mbon Buddha ẹwakde etieti, emi mîdụhe eke esikwọrọde ikọ do. Ke ini mmọ ẹkesụk ẹkwọrọde ikọ do ke ọyọhọ usen iba, mọn̄k kiet ye awat a-taxi kiet ẹma ẹditịn̄ ikọ ẹyat esịt ye mmọ ke usụn̄. Iyọhọke-yọhọ minit ifan̄, n̄kpọ nte owo 30 ẹma ẹdiyọhọ do ẹnyụn̄ ẹtọn̄ọ utọk ye iban oro. Mme bodisi ẹma ẹdimụm iban oro ẹkesịn ke ufọk-n̄kpọkọbi ofụri okoneyo oro, kpa ye oro n̄kpọ ndomokiet mîdụhe emi ẹkedọhọde ke mmọ ẹdue. Ẹkesịn mmọ ye ata ndiọi mbon n̄kpọkọbi. Ẹma ẹsụn̄i mmọ ẹnyụn̄ ẹtịn̄ ndiọi ikọ ẹdọn̄ mmọ  ke utọn̄. Edi mmọ ẹma ẹda ufan̄ oro ẹkwọrọ ikọ do. Owo mmọ kiet ọkọdọhọ ete: “Ẹkesịn mi ye mme owotowo, edi mma nnam mmọ ẹdiọn̄ọ se Bible ekpepde. Idem ama akpa mmọ ndikụt mi ke otu mmọ, ndien mmọ ẹma ẹbụp ediwak mbụme ẹban̄a se nnyịn isikpepde mme owo. Owo kiet ke otu mmọ ama ọdọhọ mi ete: ‘Nso inam esịt enem fi ntem?’”

Mme bodisi ẹma ẹbiat unen mmọ ke ndimụm mmọ nsịn ke ufọk-n̄kpọkọbi ke ini edide inyeneke se mmọ ẹkeduede. Ima ikot mme bodisi ikpe ke N̄kponn̄kan Esopikpe Sri Lanka; owo ibiereke ikpe oro kan̄a.

Ke ini asiakusụn̄ kiet emi ekerede Michiko ke Japan, ekekpepde mma kiet ke ufọkibọk Bible ke usem idiọn̄ọ, enye ama obụp owo ufọkibọk m̀mê owo en̄wen odu emi ikemede ndikwọrọ ikọ nnọ. Ẹma ẹmen enye ẹkewụt Kazumi. Ke ini Kazumi ekedide isua 23, enye ama enyene aksiden; aksiden oro ama anam enye ikemeke ndin̄wọn̄ mmọn̄ m̀mê ndimen udia. Enye ekeme ndikop n̄kpọ edi ikemeke nditịn̄ ikọ. Enye ama obụp ediwak mbụme onyụn̄ enyịme ndikpep Bible.

Ke ini mmọ ẹkpepde n̄kpọ, esidi Michiko ama obụp mbụme, Kazumi ada ubọk owụt ibọrọ ke n̄wed mîdịghe ewewet ọnọ enye. Ke enye ama ekenyene fon, Michiko ama ọtọn̄ọ ndisineme ikọ Abasi eke usen ke usen ye enye kpukpru usenubọk. Kpa ye oro idem mîsọn̄ke Kazumi, enye osụk amama n̄kpọ Abasi, ama onyụn̄ ọdọhọ ke iyom ndidi Ntiense Jehovah. Ke enye ama ekekpep Bible ke isua 13, enye ama edi asuanetop emi mînaha baptism ke ini esịmde isua 61.

 Sia enye mîkemeke ndidaha nda ke bed, esop mmọ ẹsinam ndutịm man enye akpan̄ utọn̄ okop kpukpru ikọ Abasi ke mbono esop ye ke mme mbono eken. Enye esitịm idem ọnọ mbono esop onyụn̄ ewet ibọrọ mbụme ọnọ, ndien nsio nsio sista ẹsikot ibọrọ mbụme esie ke mbono esop.

Kazumi esima ndiwet nti leta emi ọsọn̄ọde owo idem nnọ mbon emi ẹkpepde Bible, emi ẹsinyụn̄ ẹdide mbono esop. Enye esikwọrọ ikọ ọnọ mbon ufọkibọk ye mbon emi ẹdide ndise enye. Enye esidọhọ owo mmọ kiet kiet ete: “Edieke ekpepde Bible, oyokop inemesịt.”

Ke idụt kiet ke Southeast Asia, sista kiet ama okụt mọn̄k ke ini akakade ufọkibọk ndikụt dọkta enyịn. Enye  ama obụp mọn̄k oro ete: “Ndi akpama ndidụn̄ ke ediye itie emi udọn̄ọ mîdụhe ke nsinsi?” Mbụme oro ama ada nneme edi, ndien enye ama ọnọ ete oro ediye ekpri n̄wed Kpan̄ Utọn̄ Nọ Abasi. Ete oro ama ọnọ enye nọmba fon, ndien enye ama emen ọsọk eyenete eren kiet ke esop. Eyenete oro ama ọsọsọp enyene nneme ye ete oro onyụn̄ okot enye ete edidụk san̄asan̄a ikọ Abasi. Ete oro ama edi, ndien emi ama enem ete oro tutu. Se ikenemde enye ikan ekedi ikwọ nnyịn ye nte kpukpru owo ẹkedarade enye.

Ke ini enye okobụpde m̀mê Mme Ntiense Jehovah ẹnyene ufọkn̄wed ntaifiọk m̀mê ufọkn̄wed mme oku, emi mbon mmọ ẹsikade ẹkekpep Ikọ Abasi, eyenete oro ama ọdọhọ enye ke nnyịn isisasan̄a ikpep mme owo Bible onyụn̄ ọdọhọ m̀mê enye akpama isitie ye enye ikpep. Mbemiso urua oro eketienede okụre, ete oro ama okot ibuot 1 ke n̄wed Nso ke Bible Enen̄ede Ekpep? ama. Enye ama aka iso ekpep Bible, ọtọn̄ọ ndidụk mbono esop, onyụn̄ esibọrọ mbụme ke Ukpepn̄kpọ Enyọn̄-Ukpeme.

Ke ini enye akakade mbono circuit, owo emi okotode Bethel edi ama ọdọhọ enye edise Bethel. Urua oro eketienede, enye ama aka Bethel, ndien akada enye n̄kpọ nte hour duop ndisịm do. Ẹma ẹnen̄ede ẹdara enye ke Bethel. Ke utịt February 2015, enye ama etre ndidi mọn̄k, aka iso ekpep Bible, esidụk mbono esop onyụn̄ etiene abuana ke se ẹnamde.

Ẹma ẹnọ mme asiakusụn̄ ẹka obio kiet ke India, emi edide ebịghi owo ikwọrọke ikọ. Mme owo do ẹma ẹma ikọ Abasi tutu mme asiakusụn̄ oro ẹyom itie emi ẹkpenịmde mbono esop. Ke ini mmọ ẹkekade ndikpep owo  Bible, mmọ ẹma ẹkụt obufa ufọk emi owo mîdiọn̄ke ima, ẹnyụn̄ ẹdọhọ ke akpana ibụp m̀mê ẹyema ndinọ mmimọ ufọk oro. Ke mmọ ẹma ẹkesan̄a ẹka iso ekpri, mmọ ẹma ẹdọhọ yak ifiak ikobụp. Ke edemesa ufọk oro, mmọ ẹma ẹkụt mma kiet ẹnyụn̄ ẹdọhọ ke mmimọ idi Mme Ntiense Jehovah. Esịt ama enem mma oro. Enye ama ọdọhọ ke imọ n̄ko idi Ntiense Jehovah, ada mmọ odụk ufọk ye inemesịt, onyụn̄ owụt mmọ mme n̄wed nnyịn emi enye ekenyenede toto ke 1970 tutu esịm n̄kpọ nte 1990. Mme asiakusụn̄ ẹma ẹsikpep mma oro Bible isua 30 emi ekebede; enye ama esinyụn̄ odụk mbono esop kpa ye oro ebe esie ekesisịnde mfịna. Enye ama enịm ke Mme Ntiense Jehovah ẹsikpep akpanikọ, edi  enye ikekwe mmọ aba ke ini mme asiakusụn̄ oro ẹkekpọn̄de do. Kpukpru nditọ esie ẹma ẹtọn̄ọ ndika nsio nsio ufọkabasi, edi enye ikamaha ndika ndomokiet.

Ndondo emi, nditọ esie ẹma ẹtọn̄ọ ndiyịre enye ẹte aka ufọkabasi Catholic ekesịn enyịn̄ man mbon Catholic ẹbụk enye, enye ama akpa. Udun̄wan eka esie ama emen enye aka ndisịn enyịn̄ ke Catholic, edi mmọ ẹma ẹfiak ẹnyọn̄ sia moto ama awak ke usụn̄ tutu mmọ ikemeke ndiwat mbe. Enye ama ọdọhọ ke iyedimen enye ika edem usen, edi enye ama ọdọn̄ọ. Ndien uwemeyo oro ke Mme Ntiense oro ẹkeka ufọk mma oro. Enye ke ekpep Bible, ke esidụk mbono esop, esinyụn̄ ọdọhọ nditọ ye nditọ nditọ esie ẹtiene imọ ẹkpep Bible.