Mme Mbụme Bible Oro Ẹbọrọde
Ntak emi prọfesi ẹdude ke Bible?
Ntak Emi Bible Eketịn̄de Se Iditịbede Ke Eyo Nnyịn Emi?—Luke 21:10, 11.
Prọfesi ẹyeyọhọ Bible. Ndusụk mmọ ẹsitịn̄ ke nde ke nde nte n̄kpọ editịbede. Idụhe owo emi ekemede nditịn̄ nnennen nnennen nte ini iso editiede. Ntre, mme prọfesi Bible oro ẹsude ẹnam inen̄ede inịm ke Bible edi Ikọ Abasi.—Kot Joshua 23:14; 2 Peter 1:20, 21.
Mme prọfesi Bible emi ẹsude ẹnam inyene ata eti ntak ndibuọt idem ye Abasi. (Mme Hebrew 11:1) Mmọ n̄ko ẹnam inịm ke kpukpru se Abasi ọn̄wọn̄ọde ndinam nnọ nnyịn oyosu. Omokụt do ke mme prọfesi Bible ẹnam inyene idotenyịn.—Kot Psalm 37:29; Rome 15:4.
Didie ke mme prọfesi Bible ẹn̄wam nnyịn?
Ndusụk prọfesi Bible ẹsinam ikọt Abasi ẹdiọn̄ọ se mmọ ẹkpenamde. Ke uwụtn̄kpọ, ke ini mme Christian eyo mme apostle ẹkekụtde nte ndusụk prọfesi ẹsude, mmọ ẹma ẹfehe ẹkpọn̄ Jerusalem. Nte ini akakade, ẹma ẹsobo obio oro ke ntak emi ata ediwak owo do ẹkesịnde Jesus, edi mme Christian ẹma ẹbọhọ sia mmọ mîkodụhe do.—Kot Luke 21:20-22.
Mfịn, mme prọfesi emi ẹsude ẹwụt ke Obio Ubọn̄ Abasi ọmọn̄ ososobo ukara owo. (Daniel 2:44; Luke 21:31) Ntre, ana owo kiet kiet anam n̄kpọ idahaemi man Jesus Christ emi Abasi emekde nte Edidem akpama enye.—Kot Luke 21:34-36.
