Ndi Ama Ọfiọk?

Mmanie ẹkedi mme ewetn̄wed oro ẹkebiọn̄ọde Jesus?

Ke ini Jesus ọkọkwọrọde ikọ ke isọn̄, enye ama esisobo mme ewetn̄wed ke Jerusalem ye ke n̄kpri obio ye mme obio-in̄wan̄. Mme ewetn̄wed emi mîkodụhe ke Jerusalem ye mmọ oro ẹkedude ye mme Jew eken ke isenidụt ẹkedi n̄kpri mbon ukara oro ẹkefiọkde Ibet, emi ẹkesiwetde n̄wed ke mme esop obio.—Mark 2:6; 9:14; Luke 5:17-21.

Mme ewetn̄wed oro ẹkedude ke Jerusalem ẹkesidia ubọk udia kiet ye mbon ukara Jew. (Matthew 16:21) The Anchor Bible Dictionary ọdọhọ ke “etie nte mmọ ẹkesida ye mme oku ẹkpe ikpe, ẹkụt ẹte ke ẹnịm ibet ye ido edinam mme Jew, ẹnyụn̄ ẹnam utom ke esop Sanhedrin.” Sia mme ewetn̄wed emi ẹkedide ikpọ mme ekpep Ibet, ndusụk mmọ ẹkedi mbon esop Sanhedrin emi ekedide akwa esop mme Jew. Mmọ ẹkesidia ubọk udia kiet ye mme oku ye mme Pharisee.

Ẹwak ndidiọn̄ọ mmọ nte mme andibiọn̄ọ Jesus. Edi idịghe kpukpru mmọ ẹkebiọn̄ọ Jesus. Ke uwụtn̄kpọ, ewetn̄wed kiet ama ọdọhọ Jesus ete: “Nyetiene fi n̄ka ebiet ekededi eke afo oyomde ndika.” Jesus ama ọdọhọ ewetn̄wed en̄wen ete: “Afo uyomke usụn̄ ukpọn̄ obio ubọn̄ Abasi.”—Matthew 8:19; Mark 12:28-34.

Nso ke ndiyet owo aran ọkọwọrọ?

Ke eyo Bible, ẹkesiyet owo aran ke ibuot ke Ufọt Ufọt Edem Usiahautịn ndiwụt ke ẹkpono enye m̀mê ndiwụt ke ẹdara esenowo. Emi ekesiwak ndidi aran olive emi enemde utebe. Mbon Hebrew ẹma ẹsinyụn̄ ẹyet owo aran ke ibuot ke ini ẹmekde owo ẹte anam akpan utom. Ke uwụtn̄kpọ, ẹma ẹyet Aaron aran ke ini ẹkemekde enye akwa oku. (Leviticus 8:12) Ke ini ẹkeyomde ndimek David edidem, ‘Samuel ama ada nnụk aran eyet enye ke idem, ndien spirit Jehovah odụk David ke idem toto ke usen oro aka iso.’—1 Samuel 16:13.

Ikọ Hebrew oro ẹkabarede ediyet aran edi ma·shachʹ m̀mê ma·shiʹach, m̀mê Messiah. Eke Greek edi khriʹo m̀mê khri·stosʹ, m̀mê Christ. Ke ntre, ẹkeme ndikot Aaron ye David messiah, m̀mê enye oro ẹyetde aran. Ẹkot Moses n̄ko christ, m̀mê enye oro ẹyetde aran sia Abasi ekemek enye ndinam n̄kpọ ke ibuot Imọ.—Mme Hebrew 11:24-26.

Abasi ke idemesie ekemek Jesus eyen Nazareth onyụn̄ ọnọ enye akamba itie. Owo ikadaha ata aran iyet Jesus, edi ẹkeda edisana spirit Abasi ẹmek enye. (Matthew 3:16) Ẹkot Jesus Messiah m̀mê Christ sia enye edide Enye Oro Jehovah Eyetde Aran.—Luke 4:18.