SARAH * odụn̄ ke Ghana, ndien isua 17 edi emi tọn̄ọ enye ye Jacob ẹkedọ ndọ. Enye ọdọhọ ete: “Imesiwak nditọhọ ke ntak okụk. Kpa ye ofụri se nnamde ke ubon, ebe mi isinamke ndiọn̄ọ m̀mê okụk ifan̄ ke inyene. Emi esibiak mi tutu ndien imesidop kiet eken uyo ke ediwak urua.”

Jacob ebe esie ọdọhọ ete: “Enyene mme ini emi isitịn̄de ikọ iyatesịt ye kiet eken. Emi esiwak nditịbe ke ini nnyịn mînen̄ekede ineme se iyomde ndinam m̀mê ke ini se owo kiet etịn̄de m̀mê anamde mîn̄wan̄ake owo enye eken. N̄kpọ en̄wen edi ke imesiyak n̄kpri n̄kpri n̄kpọ ayat nnyịn.”

Nathan, emi ọdọde ndọ obufa onyụn̄ odụn̄de ke India, etịn̄ se iketịbede usen kiet ke ini ete-an̄wan esie akaduatde eka-an̄wan esie. Enye ọdọhọ ete: “Esịt ama ayat eka-an̄wan mi, ndien enye ama ọwọrọ ke ufọk. Ke ini n̄kobụpde ete-an̄wan mi se ikanamde enye aduat n̄wan esie ntre, enye ama ọdọhọ ke mmọsọn̄ọ imọ enyịn onyụn̄ ọtọn̄ọ ndiduat kpukpru nnyịn.”

Ekeme ndidi afo n̄ko emesikụt nte utọk asiahade ke ubon ke ntak emi owo etịn̄de se enye mîkpetịn̄ke ke ini esịt mînemke owo. Ẹsidọhọ ke ikọ mbre mbre aman utọk. Imọfiọk ke idụhe owo emi mîsiduehe ke ikọ-inua, ntre owo ekeme ndida se owo en̄wen etịn̄de ke usụn̄ en̄wen mîdịghe ekere ke enyene n̄kpọ en̄wen emi anamde enye etịn̄ ikọ oro. Edi imosụk ikeme ndinam n̄kpọ man emem odu.

Nso ke akpanam ke ini utọk asiahade? Nso ye nso ke akpanam man ubon mbufo ẹfiak ẹdu ke emem? Nso ke ubon ẹkpenam man emem odu ke ufọk? Mbọk kot ibuotikọ oro etienede.