Imekeme ndikere ke nnyịn ikemeke ndin̄wam ufan nnyịn emi enyenede mfịna ibuot. Edi edieke in̄wamde enye ọyọ mfịna esie, oro oyowụt ke imama enye. Didie ke ikeme ndin̄wam enye?

“Ẹsọp ndikop ikọ.”​—JAMES 1:19.

N̄kpọ kiet emi ekemede ndinam n̄n̄wam ufan fo edi ndikpan̄ utọn̄ ini enye etịn̄de ikọ. Kûkere ke ana ọbọrọ kpukpru se enye etịn̄de. Nam enye ọdiọn̄ọ ke omokop se enye etịn̄de, ke omonyụn̄ ama enye. Domo ndifiọk nte etiede enye ke idem kûnyụn̄ usọp usua unọ enye. Kûfre ke enye ekeme nditịn̄ n̄kpọ emi enye mîkpetịn̄ke.​—Job 6:2, 3.

‘Tịn̄ ikọ emi ọsọn̄ọde owo idem.’​—1 THESSALONICA 5:14.

Esịt ekeme nditịmede ufan fo mîdịghe enye ekere ke imọ iwọrọke n̄kpọ. Edieke anamde enye ọdiọn̄ọ ke amama enye, oro ekeme ndisọn̄ọ enye idem onyụn̄ ọdọn̄ enye esịt, ekpededi udiọn̄ọke se ekpetịn̄de.

“Ata ufan amama ufan kpukpru ini.”​—MME N̄KE 17:17.

Sinam n̄kpọ n̄wam ufan fo. Bụp enye se enye oyomde anam ọnọ enye, utu ke ndikere ke ọmọdiọn̄ọ se enye oyomde. Edieke ọsọn̄de ufan fo nditịn̄ se enye oyomde anam ọnọ enye, emekeme ndibụp enye m̀mê enye akpama ndidi ẹsan̄a ntre ẹbọ ofụm, mîdịghe m̀mê enye akpama an̄wam enye edep n̄kpọ, ọkpọri  ufọk esie, m̀mê an̄wam enye anam n̄kpọ en̄wen.​—Galatia 6:2.

“Ẹnyene anyanime.”​—1 THESSALONICA 5:14.

Idịghe kpukpru ini ke ufan fo edima nditịn̄ ikọ. Nam enye ọdiọn̄ọ ke ayama ndikpan̄ utọn̄ n̄kop se enye etịn̄de ini ekededi emi ọdọn̄de enye nditịn̄ ikọ. Udọn̄ọ ekeme ndinam ufan fo etịn̄ mîdịghe anam n̄kpọ emi ayatde fi. Enye ekeme nditre ndinam se mbufo ẹkeduakde ndinam, mîdịghe ọtọn̄ọ ndifụhọ inikiet inikiet. Nyene ime ye enye nyụn̄ nam se ekekeme man an̄wam enye, sia ọdiọn̄ọde ke idịghe enye ama anam.​—Mme N̄ke 18:24.

“Mmesinam se n̄kekeme man ufan mi ekeme ndineme nneme ye ami. Kpa ye emi mmen̄kemeke ndinam udọn̄ọ esie okụre, mmesikụt nte ke mmakpan̄ utọn̄ n̄kop se enye etịn̄de. Ndusụk ini, n̄kukụre se ufan fo oyomde edi afo ndikpan̄ utọn̄ nnọ enye.”​—Farrah, a emi ufan esie mîsikemeke ndidia udia, enyenede editịmede esịt, esinyụn̄ enen̄erede ofụhọ.

“Ufan mi kiet ọfọn uwem etieti esinyụn̄ ọsọn̄ọ mi idem. Enye ama okot mi ndi ufọk esie ndidia udia. Ke itie udia oro, mma n̄keme nditịn̄ ofụri nte etiede mi ke idem nnọ enye. Oro ama ọsọn̄ọ mi idem etieti!”​—Ha-eun, emi esinen̄erede ofụhọ.

“Ime enen̄ede ọfọn. Ke ini n̄wan mi anamde se iyatde mi, mmesidọhọ idemmi ke idịghe enye ama anam, ke udọn̄ọ esie anam, sia enye ikesitiehe ntre. Emi esinam nnen̄ekede nyat esịt onyụn̄ anam ntetịm nse mban̄a enye.”​—Jacob, emi n̄wan esie esinen̄erede ofụhọ.

“N̄wan mi esinen̄ede an̄wam mi onyụn̄ ọsọn̄ọ mi idem. Esịt ama esinen̄ede etịmede mi, enye isinyịkke mi nnam n̄kpọ emi mmenyomke ndinam. Ndusụk ini enye isinamke n̄kpọ emi enye akpamade ndinam ke ntak oro. Mmama enye etieti sia enye esima ndinam n̄kpọ nnọ mi onyụn̄ ọfọn uwem.”​—Enrico, emi esịt esinen̄erede etịmede.