SE IDUDE

Esịt esitịmede owo ke ini n̄kpọ afịnade enye m̀mê ke ini idem enyekde enye. Sia idude uwem ke idiọk ererimbot, esịt ekeme nditịmede owo nnyịn ekededi.

SE BIBLE ỌDỌHỌDE

Edidem David ekewet ete: “Esịt etịmede mi.” (Psalm 30:7) Nso ikan̄wam David ke ini esịt eketịmerede enye? Enye ama ọbọn̄ akam onyụn̄ an̄wan̄a esịt esie ọnọ Abasi. Enye ama enịm n̄ko ke Abasi ayaka iso ama onyụn̄ ọfọn ido ye imọ. (Psalm 13:5; 62:8) Abasi ọdọhọ nnyịn itịn̄ se ededi oro afịnade nnyịn inọ imọ. Akpa Peter 5:7 ọdọhọ ‘itop kpukpru editịmede esịt nnyịn idori Abasi ke idem, koro enye ekere aban̄a nnyịn.’

Edi enyene mme n̄kpọ emi ikpanamde man nnyịn ikûtịmede esịt ukaha. Ke uwụtn̄kpọ, ke ini apostle Paul eketịmerede esịt aban̄a mme esop, enye ama anam n̄kpọ man ọdọn̄ mmọ esịt onyụn̄ ọsọn̄ọ mmọ idem. (2 Corinth 11:28) Ọwọrọ editịmede esịt esie ama anam enye ekere se enye akpanamde man an̄wam mbon oro ẹkeyomde un̄wam. Ukem oro ke edi ye nnyịn. Edieke nnyịn mîkereke iban̄a mbon en̄wen, nnyịn idikemeke ndinam n̄kpọ man in̄wam mmọ.—Mme N̄ke 17:17.

“Ẹkûse ẹban̄a mbubehe mbufo kpọt, edi ẹse ẹban̄a mbubehe mbon en̄wen n̄ko.”—Philippi 2:4.

SE IDUDE

Mme owo ẹkeme nditịmede esịt mban̄a ndudue oro mmọ ẹkenamde ke ini edem, ẹtịmede ẹban̄a nte ini iso editiede, mîdịghe ẹtịmede ẹban̄a okụk. *

SE BIBLE ỌDỌHỌDE

Ndifịna idem mban̄a ndudue oro ikanamde: Mbemiso mme owo ke eyo mme apostle ẹkekabarede ẹdi mme Christian, ndusụk mmọ ẹkedi mme akpammịn, mbon n̄kanubọk, mbon use, ye mme inọ. (1 Corinth 6:9-11) Utu ke mmọ ndiketie n̄kere mban̄a nte mmọ ẹkesidude uwem, mmọ ẹma ẹkpụhọde ẹnyụn̄ ẹnịm ke Abasi ayatua mmimọ mbọm. Abasi ama onyụn̄ atua mmọ mbọm. Psalm 130:4 ọdọhọ ke ‘ata edifen nnọ oto Abasi, man ẹkpebak enye.’

Ndikere nte n̄kpọn̄ editiede: Jesus Christ ọkọdọhọ ete: “Ẹkûtịmede esịt ẹban̄a n̄kpọn̄, koro n̄kpọn̄ eyenyene editịmede esịt esie.” (Matthew 6:25, 34) Nso ke ikpep ito emi? Se ban̄a mfịna oro enyenede mfịn. Kûda mfịna emi ekerede ke eyenyene n̄kpọn̄ udûdian ye eke mfịn, sia emi ekeme ndinam ebiere n̄kpọ emi edituade n̄kpọfiọk nte ini akade. Ti n̄ko ke ediwak n̄kpọ oro nnyịn isitịmerede esịt iban̄a isitịbeke.

Ndifịna idem mban̄a okụk: Ete kiet ke Bible ọkọdọhọ Abasi ete: “Kûnọ mi ubuene kûnyụn̄ unọ mi inyene.” (Mme N̄ke 30:8) Enye ọkọdọhọ ke iyom ndiyụhọ ye se imọ inyenede, ndien se Abasi amade edi emi. Mme Hebrew 13:5 ọdọhọ ete: “Ẹkûyak usụn̄ uwem mbufo asan̄a ye ima okụk, edi ẹyụhọ ye se mbufo ẹnyenede. Koro [Abasi] ọdọhọde ete: ‘Ndidehedei n̄kpọn̄ fi, ndinyụn̄ nsịnke fi.’” Okụk ekeme ndikpu nnyịn, edi Abasi ikemeke ndikpu mbon oro ẹbuọtde idem ye enye mînyụn̄ iyomke ikpọ n̄kpọ.

“Akanam n̄kwe nte ẹkpọn̄de edinen owo ofụri ofụri, m̀mê nte nditọ esie ẹben̄ede udia.”—Psalm 37:25.

SE MME OWO ẸDỌHỌDE

Ke 2008, Harriet Green ekewet ke n̄wedmbụk n̄kpọntịbe emi ẹkotde The Guardian ete: “Esịt etịmede mme owo idahaemi akan nte akanam edide.” Ke 2014, Patrick O’Connor ekewet ke The Wall Street Journal ete ke “esịt etịmede mbon America idahaemi akan nte ekesidide.”

SE BIBLE ỌDỌHỌDE

“Editịmede esịt ayanam esịt ofụhọ, edi eti ikọ anam esịt adara.” (Mme N̄ke 12:25) Eti mbụk obio ubọn̄ Abasi edi ata “eti ikọ.” (Matthew 24:14) Obio Ubọn̄ oro edi ukara Abasi, ndien ibịghike enye eyetre kpukpru n̄kpọ oro esinamde esịt etịmede nnyịn, utọ nte idiọkn̄kpọ ye n̄kpa. “[Abasi] ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba.”—Ediyarade 21:4.

“Abasi emi ọnọde emem akpakam anam mbufo ẹyọhọ ye idatesịt ye emem oto ke mbufo ndinịm ke akpanikọ.”—Rome 15:13.