Mme Hebrew 5;1-14
5 Koro ẹmek kpukpru akwa oku eke ẹsiode ke otu owo ẹnịm ke ibuot mme owo ndise mban̄a mme n̄kpọ Abasi,+ man enye emen mme enọ ọsọk Abasi onyụn̄ awa uwa kaban̄a mme idiọkn̄kpọ.+
2 Enye ekeme ndime ime ye mme ọkọi ye mbon oro ẹnamde ndudue sia enye ọfiọkde ete imọ n̄ko imenyene mmeme imọ,+
3 ndien ke ntak emi enye enyene ndiwa uwa idiọkn̄kpọ mban̄a idemesie kpa nte enye awade aban̄a mbio obio.+
4 N̄ko, owo idaha itie ukpono emi ke idemesie,+ edi n̄kukụre ke ini Abasi okotde enye,+ kpa nte okokotde Aaron.+
5 Ntre n̄ko Christ ikọnọhọ idemesie ubọn̄+ ke ndikabade ndi akwa oku,+ edi andinọ enye ubọn̄+ oro edi enye emi ọkọdọhọde enye ete: “Afo edi eyen mi; mfịn emi, ami mmakabade ndi ete fo.”+
6 Kpa nte enye ọdọhọde n̄ko ke ebiet en̄wen ete: “Afo edi oku ke nsinsi ke ukem usụn̄ oro Melchizedek ekedide.”+
7 Ke mme usen oro Christ okodude ke obụkidem, enye ama anam eben̄e onyụn̄ anam n̄kpeubọk+ n̄ko, ke ọkpọsọn̄+ eseme ye mmọn̄eyet, ọnọ Enye emi ekemede ndinyan̄a enye nsio ke n̄kpa, ndien ẹma ẹyere enye ke ntak emi enye abakde Abasi.+
8 Okposụkedi enye ekedide Eyen, enye ama ekpep n̄kopitem oto ndutụhọ oro enye okokụtde;+
9 ndien ke ẹma ẹkenam enye ọfọn ama,+ enye akabade edi ntak nsinsi edinyan̄a+ ọnọ kpukpru owo eke ẹkopde uyo esie,+
10 koro Abasi okokotde enye san̄asan̄a ete edi akwa oku ke ukem usụn̄ oro Melchizedek ekedide.+
11 Nnyịn imenyene ekese n̄kpọ nditịn̄ mban̄a enye, emi onyụn̄ ọsọn̄de ndinam an̄wan̄a, sia utọn̄ mbufo ama akakabade odobi ndikop n̄kpọ.+
12 Koro okposụkedi mbufo ẹkpedide mme andikpep+ adan̄aemi, mbufo ẹmefiak ẹyom owo ekpep mbufo mme akpa editọn̄ọ n̄kpọ+ ke edisana ikọ Abasi;+ ẹmenyụn̄ ẹkabade ẹdi mbon oro ẹyomde mmọn̄eba, utu ke ọkpọsọn̄ udia.+
13 Koro owo ekededi emi ọn̄wọn̄de mmọn̄eba imeheke ye ikọ edinen ido, koro enye edide eyenọwọn̄.+
14 Edi ọkpọsọn̄ udia enyene mbon oro ẹkọride ẹsịm ọyọhọ idaha, kpa mbon oro ẹnọde ukeme ufiọk n̄kpọ+ mmọ ukpep ke ndida enye nnam n̄kpọ man ẹdiọn̄ọ se inende ye se ikwan̄ade.+
