Nso Idi Baptism?
Se Bible ọdọhọde
Baptism edi ndinyịni owo ke mmọn̄ nsio. * Oro anam ikụt ntak emi Jesus akanade baptism esie ke inyan̄. (Matthew 3:13, 16) Owo Ethiopia kiet ke Bible ama onyụn̄ ọdọhọ ẹnịm imọ baptism ini mmọ ẹkedide “ẹdisịm mmọn̄.”—Utom 8:36-40.
Se baptism ọwọrọde
Bible emen baptism odomo ye ndibụk owo. (Rome 6:4; Colossae 2:12) Owo ndina baptism owụt ke enye ọkpọn̄ akani uwem esie onyụn̄ ọtọn̄ọ ndidu obufa uwem nte Christian emi ayakde idem ọnọ Abasi. Kpukpru se anade owo anam man odot ndina baptism, edi ndutịm emi Jehovah Abasi anamde man ada Jesus Christ anam nnyịn ikeme ndibiere ndinam se ifọnde. (1 Peter 3:21) Jesus ama ekpep ke ana mme mbet esie ẹna baptism.—Matthew 28:19, 20.
Ndi baptism esiyet idiọkn̄kpọ?
Ihih. Bible ọdọhọ ke iyịp Jesus kpọt ekeme ndiyet idiọkn̄kpọ nnyịn. (Rome 5:8, 9; 1 John 1:7) Man iyịp Jesus eyet idiọkn̄kpọ nnyịn, ana ibuọt idem ke uwa Jesus, itre ndiọi n̄kpọ, idu uwem nte Jesus ọdọhọde, inyụn̄ ina baptism.—Utom 2:38; 3:19.
Nso idi christening?
Ikọ oro “christen” m̀mê “christening” idụhe ke Bible. Christening edi edinam emi ndusụk ufọkabasi ẹsinamde ẹnịm nsek nditọ baptism (ẹsiduọk nditọ oro mmọn̄ ke ibuot mîdịghe ẹsesịme mmọ mmọn̄ ke idem) ẹnyụn̄ ẹsio mmọ enyịn̄.
Ndi Bible ọdọhọ ẹnịm nsek nditọ baptism?
Ihih, idọhọke. Ana owo ọdiọn̄ọ onyụn̄ enịm “eti mbụk aban̄ade obio ubọn̄ Abasi” ke akpanikọ mbemiso enye anade baptism. (Utom 8:12) Ana enye ekpep Ikọ Abasi, enịm se enye ekpepde, onyụn̄ akabade esịt—nsekeyen ikemeke ndinam kpukpru emi.—Utom 2:22, 38, 41.
Bible owụt ke Abasi ada n̄kpri nditọ emi mme ete ye eka mmọ ẹdide Christian ke edisana, ke ntak nti n̄kpọ emi mme ete ye eka mmọ ẹnamde. (1 Corinth 7:14) Ekpedi akana nsek nditọ ẹna baptism, Abasi ikpadaha nti n̄kpọ mme ete ye eka mmọ ibat mmọ ke edisana. *
Se mme owo ẹsitịn̄de ẹban̄a baptism
Se mme owo ẹsitịn̄de: Ndiduọk owo mmọn̄ ke ibuot m̀mê ndisesịme ke idem ke ini baptism etie nte ndinyịni owo ke mmọn̄.
Akpanikọ: Ke Bible, ẹma ẹnyịni kpukpru mbon oro ẹkenade baptism ke mmọn̄. Ke uwụtn̄kpọ, ke ini Philip emi ekedide mbet Jesus okoyomde ndinịm owo Ethiopia baptism, mmọ mbiba ẹma “ẹsụhọde ẹdụk mmọn̄.” Ekem, “mmọ [ẹwọrọ] ke mmọn̄ ẹdọk.”—Utom 8:36-39. *
Se mme owo ẹsitịn̄de: Bible owụt ke ini ẹkenịmde ofụri ufọk mme owo baptism, ke nsek nditọ ẹma ẹsịne. Uwụtn̄kpọ kiet edi eke owo n̄kpọkọbi ke Philippi: “Enye ye ufọk esie [ẹma] ẹna baptism.”—Utom 16:31-34.
Akpanikọ: Mbụk owo n̄kpọkọbi oro owụt ke “ikọ Jehovah” ama an̄wan̄a enye ye kpukpru mbon ufọk esie oro ẹkenade baptism, ndien mmọ ẹma “ẹdara etieti.” (Utom 16:32, 34) Emi owụt ke nsekeyen ndomokiet ke ufọk ete oro ikanaha baptism, sia idụhe nte nsekeyen ekemede ndidiọn̄ọ ikọ Jehovah.
Se mme owo ẹsitịn̄de: Jesus ama enyịme ẹnịm nsek nditọwọn̄ baptism sia enye ọkọdọhọ ke Obio Ubọn̄ Abasi enyene mmọ.—Matthew 19:13-15; Mark 10:13-16.
Akpanikọ: Idịghe baptism ke Jesus eketịn̄ aban̄a ini enye etịn̄de ikọ oro. Utu ke oro, enye ọkọdọhọ ke ana mbon oro ẹyomde ndidụk Obio Ubọn̄ Abasi ẹtie nte nditọwọn̄—ẹsụhọde idem ẹnyụn̄ ẹnyịme ndikpep n̄kpọ.—Matthew 18:4; Luke 18:16, 17.
^ ikp. 1 Ẹda ikọ oro “baptism” ẹto ikọ emi ọwọrọde “ndinam odụk ofụri ofụri” ke usem Greek. Se Theological Dictionary of the New Testament, Volume I, page 529.
^ ikp. 6 N̄wed emi ẹkotde The International Standard Bible Encyclopedia, ọdọhọ ke “idụhe itie ndomokiet ke Obufa Testament emi ọdọhọde ẹnịm nsek nditọ baptism.” N̄wed oro onyụn̄ ọdọhọ n̄ko ke se ikanamde ẹtọn̄ọ ẹnịm nsek nditọ baptism edi ke mme owo ẹnịm ke baptism esiyet idiọkn̄kpọ owo efep.—Volume 1, page 416-417.
^ ikp. 8 Kop se ẹtịn̄de mi ke ibuotikọ emi “Baptism (eyo Bible),” ke n̄wed New Catholic Encyclopedia. Ẹdọhọ ke ibuotikọ oro ẹte: “Mme n̄kpọ mme n̄kpọ ẹwụt ke mme Christian ke eset ẹkesibobụk owo ke mmọn̄ ẹsio ke ini ẹnịmde owo baptism.”—Volume 2, page 59.
Ekeme Ndidi Ayama Mmọ Emi N̄ko
BIBLE EKEME NDIBỌRỌ MBỤME FO
Ndi Kpukpru Ufọkabasi Ẹdi Kiet? Ndi Kpukpru Mmọ Ẹkpono Ata Abasi?
N̄kpọ iba ọwọrọ ada ke ibọrọ mbụme oro ke Bible.
BIBLE EKEME NDIBỌRỌ MBỤME FO
Ndinam Didie Ndiọn̄ọ Mbon Oro Ẹkponode Ata Abasi?
Ndi ufọkabasi enye emi ke n̄kpaka?
ESSENTIAL BIBLE TEACHINGS
Ndi Abasi Enyịme Nsio Nsio Usụn̄ Oro Mme Owo Ẹtuakde Ibuot Ẹnọ Enye?
Ediwak owo ẹkere ke Abasi enyịme kpukpru ido ukpono m̀mê ufọkabasi.
