Nu si nya si gɔme woɖe be dzo mavɔ (Hebrigbe me nya “Sheol” kple Helagbe me nya “Hades”) fia koe nye yɔdo alo tsiẽƒe, ke menye teƒe aɖe si dzo nɔa bibim le tegbee si wowɔa funyafunya amewo lee o. Ame kawoe yia afi ma? Nu nyui wɔlawo kple nu gbegblẽ wɔlawo siaa. (Hiob 14:13; Psalmo 9:17) Biblia gblɔ be ameƒomea ƒe yɔdo siae nye afi si “agbagbeawo katã ƒoa ta kpli ɖo.”—Hiob 30:23.

 Yesu gɔ̃ hã yi tsiẽƒe si gɔme woɖe be dzo mavɔ esi wòku. Ke hã, “womegblẽe ɖe tsiẽƒe o,” elabe Mawu fɔe ɖe tsitre.​—Dɔwɔwɔwo 2:31, 32, Eʋegbe Biblia.

Ðe ame siwo yi teƒe si woyɔna be dzo mavɔ me la anɔ afi ma tegbeea?

 Yesu azã Mawu ƒe ŋusẽ atsɔ afɔ ame siwo katã yi tsiẽƒe si gɔme woɖena be dzo mavɔ la. (Yohanes 5:28, 29; Dɔwɔwɔwo 24:15) Wogblɔ le Nyaɖeɖefia 20:13 tso ame kukuwo ƒe tsitretsitsi ŋu be “ku kple Hades tsɔ ame kuku siwo nɔ wo me la na.” Ne wonya fɔ ame siwo katã le tsiẽƒe si gɔme wolɔ̃a ɖeɖe be dzo mavɔ me vɔ ko la, nu si amewo lɔ̃a yɔyɔ be dzo mavɔ la maganɔ anyi o, elabena “ku maganɔ anyi o.”—Nyaɖeɖefia 21:3, 4; 20:14.

 Gake menye ame sia ame si ku lae yina ɖe teƒe si woyɔna be dzo mavɔ la me o. Biblia gblɔ be ame aɖewo nyrɔ wo ɖokuiwo ɖe nu vɔ̃ɖi wɔwɔ me ale gbegbe be womagate ŋu atrɔ dzi me o. (Hebritɔwo 10:26, 27) Ne ame siawo ku la, womeyia teƒe si woyɔna be dzo mavɔ o, ke boŋ Gehena, si fia tsɔtsrɔ̃ ɖikaa. (Mateo 5:29, 30) Le kpɔɖeŋu me, Yesu gblɔ na subɔsubɔhakplɔla alakpanuwɔla siwo nɔ anyi le eŋɔli la be woayi Gehena.​—Mateo 23:27-33