Le February 24, 2022 dzia, Russia va dze Ukraine dzi, esia wɔe be ame miliɔn gbogbo aɖewo ƒe agbe ɖo afɔku me eye wote sisi yi dukɔ bubuwo me enumake. a

 “Tukpewo nɔ ɖiɖim le afi sia afi. Wonɔ bɔmbwo dam. Menɔ vɔvɔm ale gbegbe be nye dzi katã koe tsi ya me. Esi míese be ketekewo le amewo kɔm yi dukɔ bubuwo mea, míetiae be míawo hã míasi. Màte ŋu atsɔ nu boo aɖeke o, akplo sue aɖe koe woɖe mɔ be ame sia ame natsɔ. Nu siwo míete ŋu tsɔ koe nye míaƒe agbalẽ vevi aɖewo, atikewo, tsinono kple numeɖenu aɖewo. Míegblẽ nu sia nu ɖi, eye míesi yi ketekeɖoƒea esime bɔmbwo nɔ wòwóm.”—Nataliia, etso Ukraine du si nye Kharkiv me.

 “Esime nu siawo katã nɔ dzɔdzɔma, mímesusui be ahe aʋa vɛ o. Menɔ bɔmb ƒe wòwó sem le dua ƒe akpa aɖewo, eye fesrewo nɔ ʋuʋum. Eya ta mesi, eye nu vevi aɖewo koe mete ŋu tsɔ. Medzo le aƒe me ŋdi ga 8 vae ɖo keteke yi Lviv eye meva ɖo ʋu yi Poland.”—Nadija, etso Ukraine du si nye Kharkiv me.

Nyati sia aɖo biabia siawo ŋu

•  Nu kawo koŋ tae wòva hiã be amewo nasi le Ukraine adi sitsoƒe?

•  Afi kae sitsoƒedilawo ate ŋu akpɔ akɔfafa le?

•  Ðe Biblia ate ŋu akpe ɖe sitsoƒedilawo ŋu egbea?

 Nu kawo koŋ tae wòva hiã be amewo nasi le Ukraine adi sitsoƒe?

 Amewo te sisi le Ukraine elabe Russia srafowo va dze Ukraine dukɔa dzi. Ke hã, Biblia na míenya nu siwo koŋ tae amewo va zua sitsoƒedilawo; esia ƒe ɖewoe nye:

•   Amegbetɔwo ƒe dziɖuɖu siwo le xexea me do kpo nu; womete ŋu le ameƒomea ƒe kuxiwo gbɔ kpɔm o. Dziɖuɖuwo zãa woƒe ŋusẽwo le mɔ gbegblẽ nu tsɔ tea amewo ɖe to.—Nyagblɔla 4:1; 8:9.

•   Satana Abosam, si nye “xexea dzi ɖula” kpɔ ŋusẽ gbegblẽ ɖe ameƒomea dzi ale gbegbe be Biblia gblɔ be: “Xexe blibo la katã le vɔ̃ɖitɔ la ƒe ŋusẽ te.”—Yohanes 14:30; 1 Yohanes 5:19.

•   Tsɔ kpe ɖe kuxi gbogbo siwo me tom ameƒomea le ƒe alafa geɖee nye esia ŋu la, fifiaa, míele ɣeyiɣi si ŋu nya wogblɔ ɖi le Biblia me be: “Le ŋkeke mamlɛawo me la, ɣeyiɣi sesẽ siwo me nɔnɔ asesẽ la ava.” (2 Timoteo 3:1) Gawu la, nu siwo anɔ dzɔdzɔm le ŋkeke mamlɛawo me ƒe ɖewoe nye aʋawɔwɔwo, dzɔdzɔmefɔkuwo, nuɖuɖu ƒe veve kple dɔvɔ̃wo. Nu siawo ate ŋu awɔe be amewo nasi le woƒe aƒewo me.—Luka 21:10, 11.

 Afi kae sitsoƒedilawo ate ŋu akpɔ akɔfafa le?

 Biblia ɖee fia be mía Wɔla, Yehowa b nye Mawu lɔ̃ame, eye eƒe dɔme trɔna ɖe ame siwo si le woƒe aƒewo me vae le sitsoƒe dim la ŋu. (5 Mose 10:18) Edo ŋugbe be yeava kpɔ ame siwo nye sitsoƒedilawo ƒe kuxiwo gbɔ na wo, to eƒe dziɖuɖu si le dziƒo, si woyɔna be Mawu Fiaɖuƒe la dzi. Fiaɖuƒe sia ava xɔ ɖe amegbetɔwo ƒe dziɖuɖuwo teƒe. (Daniel 2:44; Mateo 6:10) Yehowa ato eƒe Fiaɖuƒea dzi atsrɔ̃ Satana Abosam. (Romatɔwo 16:20) Fiaɖuƒe sia aɖu anyigba bliboa dzi, eye aɖe dukɔwo ƒe liƒowo siwo de mama dukɔwo dome la ɖa. Amegbetɔwo katã azu ƒome ɖeka le anyigba bliboa dzi. Magadzɔ gbeɖe be ame aɖe nasi le eƒe me o, elabe Biblia do ŋugbe be: “Wo dometɔ ɖe sia ɖe abɔbɔ nɔ eƒe wainka kple eƒe gboti te bɔkɔɔ, eye ame aɖeke mado voɖi na wo o, elabena aʋakɔwo ƒe Yehowa ƒe nue gblɔe.”—Mika 4:4.

 Mawu Fiaɖuƒea koe akpɔ sitsoƒe didi ƒe nya siawo katã gbɔ tegbee. Yehowa ato eƒe Fiaɖuƒea dzi aɖe nu siwo katã wɔnɛ be amewo va zua sitsoƒedilawoa ɖa. Kpɔ eƒe kpɔɖeŋu aɖewo ɖa:

•   Aʋawɔwɔ. “[Yehowa atsi] aʋawɔwɔwo nu.” (Psalmo 46:9) Be nànya ale si Mawu atsi aʋawɔwɔwo nua, xlẽ nyati si nye “Aleke Woawɔ Ahe Ŋutifafa Ava Anyigba Dzi?”

•   Ameteteɖeanyi kple ŋutasesẽ. “[Yehowa] aɖe wo tso teteɖeanyi kple ŋutasesẽ me.” (Psalmo 72:14) Be nàkpɔ ale si ame aɖe ate ŋu aɖe asi le nɔnɔme gbegblẽ aɖe si ƒo ke ɖe to ɖe eme ŋua, xlẽ nyati si nye “Àte Ŋu Aɖu Fuléle Dzi!”

•   Ahedada. “[Yehowa] aɖe ame dahe si le ɣli dom be woaxɔ na ye la.” (Psalmo 72:12) Be nànya ale si Mawu aɖe ahedada ɖa keŋkeŋ la, xlẽ nyati si nye “Is a Fair Economic System Possible?” (“Peut-on espérer un système économique plus juste?”)

•   Nuɖuɖu ƒe veve. “Agblemenukuwo ado agbogbo ɖe anyigba la dzi.” (Psalmo 72:16) Be nàkpɔ ale si Mawu akpɔ egbɔ be dɔ magawu ame aɖeke azɔ o la, xlẽ nyati si nye “A World Without Hunger?” (“Plus jamais la faim dans le monde?”)

 Ðe Biblia ate ŋu akpe ɖe sitsoƒedilawo ŋu egbea?

 Ɛ̃. Biblia do etsɔme nyui aɖe ƒe ŋugbe na sitsoƒedilawo, gake menye ema koe o. Biblia na mɔfiame nyui aɖewo siwo ate ŋu akpe ɖe wo ŋu woanɔ te ɖe kuxi siwo me tom wole la nu egbea gɔ̃ hã.

 Biblia ƒe mɔfiame: “Migatsi dzimaɖi le naneke ŋuti o, ke boŋ le nu sia nu me la, mito gbedodoɖa kple kokoƒoƒo kpakple akpedada dzi miana Mawu nanya miaƒe dzimedidiwo; eye Mawu ƒe ŋutifafa, si ƒo gɔmesesewo katã ta la, adzɔ miaƒe dziwo kple miaƒe tamesusuwo ŋu.”—Filipitɔwo 4:6, 7.

 Efia be: Bia Mawu be wòakpe ɖe ŋuwò be wò dzi kple susu me nadze akɔ anyi le nɔnɔme si me nèle la me. Kpɔ nyati si nye “Philippians 4:6, 7—‘Do Not Be Anxious About Anything’” (“Philippiens 4:6, 7: ‘Ne vous inquiétez de rien.’”)