JA EPE̱ŃE̱!
Jowe̱ la njimbidi—Nje Bibe̱l e makwalano̱ e?
Bupisane̱ News Service, nika ńe nde ńuspepa ń’ebas’a Katolik, o pond’a mitin mō̱ o basilik Saint-Pierre, o 25 má So̱ṅe̱ 2022, papa François, a te̱m oboso ba njimbid’a Maria “a kwese̱ miso̱, a yo̱le̱ mulopo, a kane̱ o mulema.” A “so̱so̱me̱ye̱ Maria” ná a wane musango. Mulopo m’ekwali mō̱ ma Vatican News mu bati ná o muka mao, papa a bake̱ “mbel’a moto ńe̱se̱ o Mulema ma Bosangi ma Maria, tobotobo bato ba Rusia na ba Ukre̱n.”
O mo̱nge̱le̱ na nje e? Mo̱ e te̱nge̱n o kane̱ oboso ba njimbidi to̱ bolane̱ mo̱ o jowe̱ e? Ombwea ben bepasi ba Bibe̱l:
“O si po̱ngea wame̱ne̱ njimbidi to̱ bowan ba nje ye o mo̱ń, to̱ ye o wase, to̱ ye oteten a madiba ma wase; o si numa mabo̱ngo̱ wase oboso bao to̱ bolea mo̱; ebanja mba Yehova, Loba lo̱ngo̱, ne nde Loba la ko̱di ńena nu mako̱kise̱ bana ońola myobe ma basango babu nate̱na o ńo̱ṅo̱n ni londe̱ ilalo to̱ ine̱i ya ba ba singe̱ mba.”—Bebusedi 20:4, 5. a
“Njimbid’abu ye nde silba na gol, i po̱ngo̱be̱ nde na mā ma bato. I be̱n mudumbu, nde i si mato̱po̱; i be̱n miso̱, nde i si me̱ne̱. I be̱n matoi, nde i si masenga; i be̱n mpemba, nde i si masenga enumba. I be̱n mā, nde i si mabobe̱le̱ lambo; i be̱n myende, nde i si madangwa; i si mabusise̱ doi o ńingo. Ba ba malule̱ mo̱, ba mabe̱ nde bowan bao, babo̱ be̱se̱ bena ba lakisan mo̱.”—Myenge 115:4-8.
“Mba nde ne Yehova, dina lam di, na si mabola nupe̱pe̱ edub’am, to̱ njimbidi musesako mam.”—Yesaya 42:8.
“Ńa jowe̱ la losango mīla!”—1 Korinto 10:14.
“No̱ngo̱ jangame̱ye̱ ońola losango!”—1 Yohane 5:21.
Ná o bate bia nje Bibe̱l e makwalano̱ ońola bolane̱ la njimbidi o jowe̱, langa mulopo m’ekwali “D’après la Bibe̱l : Les images religieuses” to̱ ombwa sinima Mo̱ Loba a do̱lisane̱ bolane̱ la njimbidi o jowe̱ e?
We pe̱ ná o to̱ndo̱ bia nje Bibe̱l e makwalano̱ jombwea mam mato̱ti:
“Miracles et apparitions—Des manifestations divines?”
Photo credit: Vincenzo Pinto/AFP via Getty Images
a Dina la Loba ná Yehova. (Myenge 83:19) Ombwa mulopo m’ekwali “Nja ńe Yehova e?”