Yehova nde e Loba la mbale̱ la Bibe̱l, Muweked’a me̱se̱. (Bebīsedi 4:11) Mo̱ nde bato̱pedi ba mudī Abraham na Mose ba tano̱ bowe̱, kapo̱ ka Yesu. (Bebotedi 24:27; Bebusedi 15:1, 2; Yohane 20:17) A titi Loba la tumba diwo̱ buka te̱, nde la “wase ńe̱se̱.”—Myenge 47:3.

 Bibe̱l e makwala ná dina la Loba ná Yehova. (Bebusedi 3:15; Myenge 83:19) Di dina di mawa nde o eyal’a Bonahebe̱r e be̱n beteledi ná “timba be̱.” Bamabie̱ jita pe̱ ba makwala ná di dina di be̱n nde beteledi ná “A mabola ná e timbe be̱.” Be beteledi be te̱nge̱n jita n’epolo Yehova a be̱nno̱ ka Muwekedi na Mulondised’a mwano mao. (Yesaya 55:10, 11) Bibe̱l e mongwane̱ pe̱ biso̱ o bia njika pat’a moto Yehova eno̱, sepo̱n ede̱mo ao e kolo buka be̱se̱, ndolo.—Bebusedi 34:5-7; Lukas 6:35; 1 Yohane 4:8.

 Dina la Loba n’eyem’a Bonahebe̱r lena di be̱n litera ine̱i יהוה (YHWH), nde di tukwabe̱ na bwambo ba duala ná Yehova. Mbad’a pase̱le̱ la dina la Loba ńa kwaṅ ni te̱nge̱n na Bonahebe̱r e si biane̱. Nde mbad’a pase̱le̱ ná, “Yehova,” nde e biane̱ etum a ponda o jita la leme̱. O mbu 1530, nde di dina di busino̱ ka nged’a boso o Bibe̱l a Inglisi, o betukwedi ba William Tyndale ba kalati itanu yaboso ya Bibe̱l, yena i tilabe̱ nde na Mose. a

Ońola nje e si biane̱no̱ ne̱ni dina la Loba di tano̱ di belabe̱ kwaṅ na bwambo ba Bonahebe̱r e?

 Eyem’a Bonahebe̱r ya kwaṅ e si ta e tilabe̱ na myo̱di ma litera, nde na myom buka te̱. Mulangedi nu ta nu bia eyem’a Bonahebe̱r a ta be̱ a bata myo̱di ma litera na bo̱bise̱ la ńolo. Nde ponda Betiledi ba Bonahebe̱r (“Male ma Kwaṅ”) be bo̱le̱no̱ tilabe̱, o njo̱m a dubadubane̱, Bonayuda bō̱ ba si ta pe̱ be̱ne̱ ná e te̱nge̱n o bele̱ dina la Loba. Ponda te̱ ba tano̱ ba langa na doi la mo̱ń epas’a Betiledi e be̱n dina la Loba, ba ta nde ba we̱le̱ o epol’a di dina beto̱ti bepe̱pe̱ ka “Sango” to̱ “Loba.” Ombusa bebwea ba mimbu jita, di dubadubane̱ di timbi lańa kańena mbad’a kwaṅ ńa pase̱le̱ di dina e ńo̱ngo̱. b

 Bato bō̱ ba mo̱nge̱le̱ ná dina la Loba di ta nde di belabe̱ ná “Yahweh,” bape̱pe̱ ba be̱n mo̱nge̱le̱ ma ńai na ńai. M’bo̱m ma kalati mō̱ mwena mu so̱be̱ o Munja-ma-wanga, mwena mu be̱n dongo diwo̱ la kalat’a Levitiko n’eyem’a Grikia mu tuko nde dina la Loba na Iao. Batiledi ba Grikia ńa kwaṅ pe̱ ba makwala ná mbad’a pase̱le̱ ni te̱nge̱n ńe nde Iae, Iabe na Iaoue. Nde mboṅ to̱ po̱ ni mabamse̱ ná Bonahebe̱r ba kwaṅ ba ta ba bolane̱ ma mina e titi. c

Nje bato bō̱ ba mo̱nge̱le̱no̱ jombwea dina la Loba o Bibe̱l

 Jo̱nge̱le̱ la mpenga: Di s’angame̱n bolane̱ dina la Loba ebanja di si bi ná te̱ite̱i ne̱ni ba tano̱ ba bele̱ mo̱ na bwambo ba Bonahebe̱r.

 Mbale̱: Di jo̱nge̱le̱ di mawa nde na nin mbad’a dutea ni makwale̱ ná Loba a mapula ná bato ba be̱ne̱ nde ńai po̱ ńa bele̱ dina lao, to̱ e be̱ nde ná ba mato̱po̱ leme̱ le diwengisan. Nde Bibe̱l e malee̱ ná, baboledi ba Loba ba kwaṅ bena ba ta ba to̱po̱ leme̱ le diwengisan, ba si ta ba bele̱ mina ma bato ńai po̱.

 Di kwaleye k’eyembilan ońola Yosua, mukaisedi mō̱ ńa Bonayuda. Ye̱ke̱i te̱ kriste̱n a ńo̱ṅo̱n a boso yena i ta i to̱po̱ Bonahebe̱r i ta nde i bele̱ mo̱ ná Yehoshua. Yi pe̱ yena i ta i to̱po̱ Grikia na Iesous. Betukwedi ba dina la Yosua n’eyem’a Grikia be tilabe̱ o Bibe̱l, nika e malee̱ nde ná kriste̱n i ta nde i bele̱ mina ma bato bupisane̱ leme̱ labu.—Bebolo 7:45; Bonahebe̱r 4:8.

 Je pe̱ ná di bolane̱ mulemlem ma bete̱sedi jombwea betukwedi ba dina la Loba. O sumo te̱ mbad’a pase̱le̱ ni te̱nge̱n ni po̱so̱be̱, nje ye mweńa buka me̱se̱ ye nde ná dina la Loba di bolabe̱ epolo yangame̱n mo̱ o Bibe̱l.