LO KOUVERTIR | LAVI APRE LANMOR​—ESKI I POSIB?

Ki arive apre lanmor?

“Mon ti krwar i annan trwa landrwa en dimoun i kapab ale apre lanmor, lesyel, lanfer oubyen pirgatwar. Mon ti konnen mon pa ti sitan bon pour al dan lesyel oubyen tro move pour al dan lanfer. I pa ti kler pour mwan egzakteman kwa ki ti dan pirgatwar vi ki mon pa’n zanmen vwar sa dan Labib. I ti zis en keksoz ki dimoun in rakonte.”​—Lionel.

“Mon ti’n aprann ki tou dimoun i al dan lesyel apre lanmor me sa pa ti konvenk mwan. Mon ti krwar ki lanmor i lafen tou keksoz e ki napa okenn lavenir pour bann mor.”​—Fernando.

Eski ou’n deza demann ou lekor, ‘Kwa ki vreman pase apre lanmor? Eski nou bann defen pe soufer kekpar? Eski nou pou revwar zot ankor? Ki mannyer nou kapab asire?’ Silvouple, annou vwar ki Labib i vreman dir konsernan lanmor. Apre nou pou diskit lo sa lespwar ki Labib, Parol Bondye, i ofer nou.

 Ki kondisyon bann mor?

LABIB I REPONN: “Annefe bann vivan i konnen ki zot pou mor, me bann mor pa konn nanryen ditou, zot nepli annan rekonpans, parski zot souvenir in ganny oubliye. Tou sa ki ou lanmen i trouve pour fer, fer li avek tou ou lafors, parski napa ni travay, ni plan, ni konnesans, ni lasazes dan Latonm kot ou pe ale.” *​—Eklezyast 9:5, 10.

Latonm i senpleman en landrwa kot dimoun i ganny mete ler zot mor, i en landrwa senbolik oubyen en kondisyon kot en dimoun i nepli konsyan ouswa nepli kapab fer nanryen. Ki mannyer Zob sa zonm fidel ti konsider latonm? I ti’n perdi tou son byen ek son bann zanfan dan zis en zour, apre bann gro gro klou ti leve lo son lekor antye. I ti sipliy Bondye, “A! si ou kasyet mwan dan Latonm [“dan lanfer,” Catholic Douay Version], si ou kit mwan sekre.” (Zob 1:13-19; 2:7; 14:13) I kler, ki Zob pa ti pe vwar latonm konman en lanfer dife ni en landrwa kot i ti pou al soufer plis ankor. Me i ti plito vwar li konman en landrwa kot i ti pou ganny en soulazman.

I annan en lot fason pour aprann lo kondisyon bann mor. Nou kapab egzamin bann resi ki dan Labib konsernan wit dimoun ki ti ganny resisite.​—Vwar sa bwat “ Wit rezireksyon ki ganny rakonte dan Labib.”

Personn parmi sa wit dimoun pa ti dir ki zot sorti dan en landrwa zwaye oubyen tourman. Si sa bann dimoun ti’n al dan enn sa bann landrwa ler zot ti’n mor, eski zot pa ti pou’n rakont sa avek lezot? Eski sa pa ti pou’n ganny ekrir dan Labib pour tou dimoun vwar? Napa okenn sa bann keksoz ki’n ganny ekrir dan Labib. I kler ki sa wit dimoun ti napa nanryen pour dir lo sa size. Akoz? Parski zot pa ti konsyan nanryen parey ler en dimoun i dan en profon sonmey. Anfet Labib i servi sonmey konman en legzanp pour dekrir lanmor. Par egzanp David ek Etyenn de zonm fidel “ti tonm dormi dan lanmor, NW.”​—Akt 7:60; 13:36.

Alors, ki lespwar i annan pour bann mor? Eski zot kapab leve dan sa sonmey?

[Not anba lo paz]

[Bwat lo paz 4]

 WIT REZIREKSYON KI GANNY RAKONTE DAN LABIB *

Garson en vev Profet Eliya ti resisit garson en vev ki ti reste Tsarfat dan nor Izrael.​—1 Lerwa 17:17-24.

En garson Sounamit Sikseser Eliya, profet Elisa, ti resisit en pti garson dan lavil Sounenm e donn li dan lanmen son paran.​—2 Lerwa 4:32-37.

En zonm dan en tonbo Lekor en zonm Moabit ki ti’n fek mor, ti ganny balanse vitman dan menm latonm kot lekor mor Eliya ti’n ganny depoze. Sa zonm ti resisite ler son lekor ti tous avek lezo profet Eliya.​—2 Lerwa 13:20, 21.

Garson en vev dan lavil Nain Zezi ti enteronp en laprosesyon lanterman an deor lavil Nain pour resisit en zenn onm e kit li avek son manman ki ti dan sagrinasyon.​—Lik 7:11-15.

Pti fiy Zairis Zairis, en zofisye dan sinagog, ti sipliy Zezi pour geri son pti fiy ki ti malad. Zezi ti resisit li zis apre ki i ti’n mor.​—Lik 8:41, 42, 49-56.

Lazar, zanmi pros Zezi Lazar ti’n mor depi kat zour kan Zezi ti resisit li devan plizyer dimoun.​—Zan 11:38-44.

Dorkas, en vev Zapot Pyer ti resisit Dorkas, sa bon madanm byenneme ki ti ganny rekonnet pour son labonte.​—Akt 9:36-42.

Etikis Zapot Pol ti resisit Etikis, en zenn onm ki ti mor apre ki i ti’n tonbe sorti anler lo bor en lafnet ki ti byen o.​—Akt 20:7-12.

[Not anba lo paz]