INAAMWO ika án popuch kewe Atam me Efa álleasolap a atoto tipis me máló ngeni meinisin, nge ese atai letipen Kot fán iten aramas. Lón unusen án Kot we Kapas ewe Paipel, fán fite a alúkúlúkúkich pwe ese siwil met a tipeni.

• “Ekewe chon pwüng repwe fanüeni ewe fanü o nonom won tori feilfeilachök.”​—Kölfel 37:29.

• “Kot ewe Samol mi Lapalap epwe aükätiu mäla, pwe esap chüen wor tori feilfeilachök. Epwe talü chönün mas seni won mesen aramas meinisin.”​—Aisea 25:8.

• “Ewe amüchülan chon oputan epwe mola, iei mäla.”​—1 Korint 15:26.

• “Esap chüen wor mäla ika letipeta ika kechü ika cheuch.”​—Pwärätä 21:4.

Ifa usun Kot epwe “aükätiu mäla” are áwesaaló máló? Ewe Paipel a fen affata pwe “ekewe chon pwüng” repwe nóm “tori feilfeilachök.” Nge a pwal erá pwe “esap fokun wor eman chon pwüng won fanüfan a chök föri mine a pwüng fansoun meinisin.” (Än Salomon Afalafal 7:20) Ren án Kot epwe aúkatiw máló, itá a wewe ngeni pwe epwe pwisin atai an na allúk pwe chókkewe rese unuséch repwe manaw tori feilfeiló? Aapw esap ina weween! Esap fókkun féri ena pokiten “Kot . . . esap chofona.” (Titus 1:2) Iwe met Kot epwe féri pwe epwe apwénúetá an kókkót mi fiti tong lupwen a fératá aramas?

Jiowa Kot a awora ewe méén kepich pwe epwe tongeni méénisefáli aramas pwe resap máló. Ina eú kókkót mi fiti tong. Méén kepich a wewe ngeni ekkesiwilin och liwin mi taitap aúchean ngeni ewe mettóch mi fen ta are komuséchún och mettóch fán pwúngún allúk. Iwe pokiten aramas meinisin iir chón tipis me ra fen angei kapwúngún máló, iwe Paipel a erá: “Ellet esap wor eman a tongeni isetiu penmanauen pwin ika ngeni Kot liwinin manauan. Pun liwinin manauen eman aramas a men mömong. Esap fokun naf an epwe möni manauan.”​—Kölfel 49:7, 8.

Atun emén ese unuséch a máló, a chék omusa liwinin pwisin an tipis, nge ese tongeni ekkesiwili manawan fán iten pwisin i are fán iten ekkewe ekkóch. (Rom 6:7) A lamot ngenikich emén mi unuséch me ese wor tipisin an epwe fangóló manawan, esap fán iten pwisin an tipis nge fán iten ach kewe tipis.​—Ipru 10:1-4.

Ina met Kot a akkóta an epwe fis. A tiinatiw Néún we Jesus seni láng pwe epwe uputiw fénúfan nge a unuséch me ese wor tipisin. (1 Petrus 2:22) Jesus a erá pwe a “fangala manauan fänäsengesiir pwe möön manauer.” (Markus 10:45) A máló pwe epwe mééni ach kewe tipis me angasakicheló seni máló pwe sipwe tongeni eáni manaw.​—Johannes 3:16.

Ikenái, sia manaw atun “fansoun weires,” ina pwénútáán án Paipel oesini. A affata pwe sia nónnóm lón ekkewe “ränin lesopolan” lón ei ótót mi ngaw. (2 Timoty 3:1) Ekkewe ránin lesópwólóón epwe muchúló ren “ewe ranin apung, ranin an ekkewe aramas ingau poutmwalilo.” (2 Petrus 3:3, 7, Testament Mi Fö) Nge chókkewe mi tongei Kot repwe manawewu seni ena kapwúng me repwe feiéch ren “manau esemüch.”​—Mateus 25:46.

Fite million chókkewe mi manawsefál repwe pwal tufichin kúna manaw esemuch. Jesus a féri  eú manawsefál atun a ló lón ewe telinimw itan Nain. Néún emén fefin mi má seni pwúlúwan we ákkáeménún át, a má seni, me pokiten Jesus “a fokun tongei,” a amanawasefáli ena át. (Lukas 7:11-15) Pwal och, ewe aposel Paulus a erá: “Üa pwal apilükülük lon ewe Kot . . . pwe aramas meinisin, ekewe chon pwüng me ekewe aramas mi ngau, repwe manausefäl seni mäla.”​—Föför 24:15.

Ekkewe fite billion repwe manawsefál ra tongeni mwétéresiti ar repwe manaw tori feilfeiló. Ewe Paipel a erá: “Ekewe chon pwüng repwe fanüeni ewe fanü o nonom won tori feilfeilachök.” (Kölfel 37:29) Lón ena fansoun repwe pwapwa me péchékkúletá ren pwénútáán alon aposel Paulus we mi makketiw arapakkan 2,000 ier lóóm, mi erá: “En mäla, ifa om win? En mäla, ifa om manamanen akafeiengau?” (1 Korint 15:55) Máló án chón ei fénúfan we féúnen oput, epwe úkúffóch!